हजारो लोकांचे प्राण वाचवणाऱ्या IAS अधिकारी बीला वेंकटेशन यांचे निधन
चेन्नई: तमिळनाडूच्या प्रशासकीय सेवेतील १९९७ च्या बॅचच्या IAS अधिकारी डॉ. बीला वेंकटेशन यांचे बुधवारी (२४ सप्टेंबर २०२५) वयाच्या ५५व्या वर्षी चेन्नईतील त्यांच्या निवासस्थानी निधन झाले. कोविड-१९ महामारीच्या काळात आरोग्य सचिव म्हणून त्यांनी केलेल्या अतुलनीय कार्यामुळे हजारो लोकांचे प्राण वाचले. त्यांच्या अकाली निधनाने संपूर्ण राज्यात हळहळ व्यक्त होत आहे. गुरुवारी त्यांच्या दोन मुलींनी त्यांना अश्रूपूर्ण अंतिम निरोप दिला.
कोविड काळातील नेतृत्व आणि योगदान -
कोविड-१९ च्या सुरुवातीच्या काळात बीला वेंकटेशन यांनी तमिळनाडूच्या आरोग्य सचिव म्हणून महामारीविरुद्धच्या लढ्याचे नेतृत्व केले. त्यांनी आपल्या वैद्यकीय प्रशिक्षणाचा आणि प्रशासकीय कौशल्याचा समन्वय साधत प्रभावीपणे काम केले. विशेषतः तब्लीगी जमात प्रकरणाला साम्प्रदायिक रंग देण्याच्या प्रयत्नांना त्यांनी ठामपणे विरोध केला होता. "कोणतीही महामारी साम्प्रदायिक नसते. रोग कोणत्याही जाती-धर्मात भेद करत नाही," असे त्यांनी एका मुलाखतीत स्पष्ट केले होते. रोजच्या पत्रकार परिषदांमधून त्यांनी जनतेला माहिती देत विश्वास निर्माण केला. त्यांच्या या कार्यामुळे त्या सर्वांच्या स्मरणात राहतील.
प्रशासकीय कारकीर्द आणि सामाजिक योगदान
१९६९ मध्ये कन्याकुमारी जिल्ह्यात जन्मलेल्या बीला यांनी मद्रास मेडिकल कॉलेजमधून MBBS पूर्ण केल्यानंतर १९९७ मध्ये भारतीय प्रशासकीय सेवेत प्रवेश केला. त्यांनी चेंगलपट्टू येथे उपजिल्हाधिकारी म्हणून कारकीर्दीला सुरुवात केली. त्यानंतर मत्स्यव्यवसाय, वस्त्रोद्योग, व्यावसायिक कर, आपत्ती व्यवस्थापन आणि सामाजिक कल्याण अशा विविध खात्यांमध्ये त्यांनी महत्त्वाची जबाबदारी सांभाळली. जून २०२३ पासून त्या राज्याच्या ऊर्जा सचिव होत्या. याशिवाय त्यांनी मुख्यमंत्री कार्यालयात विशेष अधिकारी, मत्स्यव्यवसाय आयुक्त आणि नगर व ग्राम नियोजन आयुक्त म्हणूनही काम केले.
वैयक्तिक आयुष्य आणि संघर्ष -
बीला यांचा जन्म माजी डीजीपी एल. एन. वेंकटेशन आणि काँग्रेस नेत्या राणी वेंकटेशन यांच्या पोटी झाला. त्यांनी १९९२ मध्ये IPS अधिकारी राजेश दास यांच्याशी विवाह केला, परंतु नंतर दोघेही विभक्त झाले. डिसेंबर २०२३ मध्ये राजेश दास यांच्यावर यौन शोषणाचा आरोप सिद्ध झाल्यानंतर बीला यांनी कायदेशीररित्या त्यांचे नाव बीला राजेश वरून बीला वेंकटेशन असे बदलले. त्यांच्या कुटुंबात त्यांची आई आणि दोन मुली आहेत.
ब्रेन ट्यूमरने संपला प्रवास -
काही महिन्यांपूर्वी बीला यांना ब्रेन ट्यूमरचे निदान झाले होते, त्यानंतर त्या उपचारांसाठी रजेवर होत्या. बुधवारी त्यांनी चेन्नईतील निवासस्थानी अखेरचा श्वास घेतला. त्यांच्या निधनाने तमिळनाडूच्या प्रशासकीय क्षेत्रात पोकळी निर्माण झाली आहे. तमिळनाडूचे मुख्यमंत्री एम. के. स्टालिन आणि राज्यपाल आर. एन. रवी यांनी त्यांच्या निधनाबद्दल शोक व्यक्त केला आहे. IAS असोसिएशननेही त्यांच्या योगदानाला सलाम करताना त्यांचे निधन हे प्रशासकीय सेवेसाठी अपूरणीय क्षती असल्याचे म्हटले आहे. आरोग्य, ऊर्जा, मत्स्यव्यवसाय आणि आपत्ती व्यवस्थापन क्षेत्रातील बीला वेंकटेशन यांचे योगदान कायम स्मरणात राहील. त्यांच्या करुणेने आणि कर्तव्यनिष्ठेने भरलेल्या नेतृत्वाने अनेकांना प्रेरणा दिली. त्यांच्या आत्म्याला शांती लाभो, अशी प्रार्थना त्यांचे सहकारी आणि चाहते करत आहेत.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
