नाशिक शहरासह जिल्ह्याला भूकंपाचा जोरदार धक्का; ४.३ रिश्टर स्केलची नोंद, नागरिकांमध्ये घबराट
नाशिक शहर आणि परिसरात शनिवारी रात्री १० वाजून १ मिनिटाच्या सुमारास भूकंपाचे जोरदार धक्के जाणवले. राष्ट्रीय भूकंप विज्ञान केंद्र आणि जिल्हा प्रशासनाने दिलेल्या माहितीनुसार, या भूकंपाची तीव्रता ४.३ रिश्टर स्केल इतकी नोंदवली गेली आहे. या घटनेमुळे नाशिककरांमध्ये काही काळ भीतीचे वातावरण निर्माण झाले, मात्र सुदैवाने कोणतीही जीवित किंवा मोठी वित्तहानी झालेली नाही.
दिंडोरीतील शिंदपाडा ठरले भूकंपाचे केंद्र
या भूकंपाचा केंद्रबिंदू दिंडोरी तालुक्यातील शिंदपाडा परिसरात नोंदवला गेला आहे. जमिनीपासून अवघ्या ५ किलोमीटर खोलीवर हा भूकंप झाल्याने त्याची तीव्रता अधिक जाणवली. भूकंपाची खोली कमी असल्यानेच याचे हादरे ग्रामीण भागासह नाशिक शहरापर्यंत दूरवर पसरले असल्याचा अंदाज व्यक्त केला जात आहे.
ग्रामीण भागासह शहरातही हादरे
नाशिक जिल्ह्याच्या पश्चिम पट्ट्यात गेल्या काही दिवसांपासून सातत्याने भूकंपाचे सौम्य धक्के बसत आहेत. पेठ, सुरगाणा, कळवण आणि दिंडोरी या तालुक्यांमध्ये वारंवार हादरे बसत असतानाच आता ही मालिका नाशिक शहरापर्यंत येऊन पोहोचली आहे.शहरातील पुढील प्रमुख भागांमध्ये नागरिकांना काही सेकंद स्पष्ट हादरे जाणवले:शहरी भाग: इंदिरानगर, पंचवटी, पाथर्डी, मेन रोड परिसर, हिरावाडी, म्हसरूळ, आनंदवल्ली आणि सातपूर.ग्रामीण व इतर परिसर: कळवण, सुरगाणा, दिंडोरी, कसारा घाट ते रामशेत किल्ला परिसर.
घरातील भांडी आणि खिडक्या हलल्या
रात्रीच्या वेळी अचानक जमीन हादरल्याने आणि घरातील भांडी, दरवाजे तसेच कपाटे हलल्याने नागरिक घाबरून घराबाहेर पडले. अनेक ठिकाणी नागरिकांनी एकमेकांना फोन करून परिस्थितीची माहिती घेतली.
प्रशासनाचे घाबरून न जाण्याचे आवाहन
भूकंपामुळे कुठल्याही प्रकारची जीवितहानी झालेली नसून परिस्थिती नियंत्रणात आहे. जिल्हा प्रशासनाने नागरिकांना कोणत्याही अफवांवर विश्वास न ठेवण्याचे आणि घाबरून न जाता शांतता राखण्याचे आवाहन केले आहे. तसेच, सुरक्षिततेच्या दृष्टिकोनातून नागरिकांनी सतर्क राहावे अशा सूचना देण्यात आल्या आहेत.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
