कराडमधील डॉक्टरला 16 लाखांचा गंडा
कराड : सीमा शुल्क विभागातून बोलत असल्याचे सांगत तोतयांनी कराडातील डॉ. प्रणोती रूपेश जडगे यांना तब्बल सोळा लाख रुपयांना गंडा घातला. दिल्ली विमानतळावर पकडलेल्या साहित्यात तुमच्या नावाचे पासपोर्ट आणि ड्रग्ज सापडल्याचे सांगून गुन्हा दाखल करण्याची भीती घालत या डॉक्टरच्या बँक खात्यावरील रक्कम संबंधित तोतयांनी स्वत:च्या बँक खात्यावर हस्तांतरित करून घेतली.
याबाबत डॉ. प्रणोती जडगे यांनी कराड शहर पोलिस ठाण्यात फिर्याद दिली आहे. पोलिसांनी दिलेल्या माहितीनुसार, 20 सप्टेंबर रोजी सकाळी नऊ वाजण्याच्या सुमारास डॉ. प्रणोती जडगे यांच्या मोबाईलवर अज्ञात क्रमांकावरून फोन आला. संबंधिताने आपण इंदिरा गांधी आंतरराष्ट्रीय विमानतळाच्या कंट्रोल रूममधून सीमाशुल्क अधिकारी सुमित मिश्रा बोलत असल्याचे सांगून, तुमच्या नावाचे दिल्ली ते मलेशियासाठीचे पार्सल विमानतळावर अडवून ठेवले आहे.त्यामध्ये 16 पासपोर्ट, 58 एटीएम कार्ड आणि 140 ग्रॅम ड्रॅग असून तुमच्या नावाचे सर्व डिटेल्स त्या पार्सलमध्ये आहेत. त्यामुळे हा गुन्हा ज्या पोलीस ठाण्याला गुन्हा नोंदवला त्या पोलीस ठाण्यातील अधिकार्यांशी बोला. त्याने वसंतकुंज पोलीस ठाण्यातील सुनील कुमार या व्यक्तीशी फोन जोडून दिला. सुनील कुमार याने डॉ. प्रणोती जडगे यांना गुन्हा दाखल होण्याची भिती घालून न्यायालयाने तुमची सर्व बँक खाती गोठविण्याचे आदेश दिले आहेत, असे सांगितले. तसेच दिल्ली न्यायालयाच्या नावे असलेल्या आदेशाची एक प्रत डॉ. प्रणोती जडगे यांच्या व्हॉट्सअॅपला पाठवून दिली.
त्यानंतर सुनील कुमारने त्यांना व्हिडिओ कॉल करून तुम्हाला यातून निर्दोष बाहेर पडायचे असेल तर तुमच्या बँक खात्यामध्ये जेवढी रक्कम असेल तेवढी रक्कम रिझर्व बँकेच्या खात्यामध्ये वर्ग करा, असे सांगितले. डॉ. जडगे यांनी त्यांच्या बँक खात्यातील 16 लाख 25 हजार 100 रुपये संबंधित व्यक्तीने दिलेल्या बँक खात्यावर ऑनलाइन हस्तांतरित केले.
रिझर्व बँकेकडून चौकशी पूर्ण झाल्यानंतर ही रक्कम तुमच्या खात्यात पुन्हा जमा होईल, असे सुनील कुमार याने सांगीतले होते. मात्र, त्यानंतर सुनील कुमार व सुमित मिश्रा या दोघांचेही फोन लागले नाहीत. आपली फसवणूक झाल्याचे निदर्शनास आल्यानंतर डॉ. प्रणोती जडगे यांनी शुक्रवारी याबाबत कराड शहर पोलीस ठाण्यात फिर्याद दिली आहे. सहाय्यक फौजदार सुभाष फडतरे तपास करीत आहेत.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
