लाडक्या बहिणींना मिळणार मकर संक्रातीची भेट! १४ जानेवारीपूर्वीच
मिळणार डिसेंबर-जानेवारीचा लाभ; 'एवढ्या' महिलांच्या खात्यात जमा होणार
प्रत्येकी ३००० रुपये
सोलापूर : मुख्यमंत्री माझी लाडकी बहीण योजनेअंतर्गत सोलापूर जिल्ह्यातील पावणेअकरा लाख तर राज्यभरातील दोन कोटी ६९ लाखांहून अधिक महिलांनी अर्ज केले आहेत. विधानसभा निवडणुकीपूर्वी लाभार्थी महिलांना नोव्हेंबरपर्यंत लाभ देण्यात आला असून आता डिसेंबरचा लाभ राहिलेला आहे.
पुढे १४ जानेवारीला मकर संक्रांत असल्याने लाडक्या बहिणींना दोन महिन्यांचा लाभ एकत्रितपणे (८,१०० कोटी) देण्याचे नियोजन राज्य सरकारच्या महिला व बालकल्याण विभागाने केले आहे. हिवाळी अधिवेशनातील पुरवणी मागण्यांमध्ये महिला व बालविकास विभागासाठी दोन हजार १५५ कोटींची तरतूद करण्यात आली आहे. आता नव्या मंत्रिमंडळाच्या पुढील बैठकीत दोन महिन्यांच्या निधीला मान्यता अपेक्षित आहे. तत्पूर्वी, राज्य सरकारने २०२४-२५ या आर्थिक वर्षात एक लाख कोटी रुपयांचे कर्ज घेण्यासाठी रिझर्व्ह बॅंकेकडून मान्यता मिळविली आहे. विधानसभेपूर्वी वैयक्तिक लाभाच्या योजनांसाठी आठवड्याला साधारणत: तीन ते साडेतीन हजार कोटींचे कर्ज घेण्यात आले. पण, आता कर्जाची मर्यादादेखील संपत आल्याने त्या रकमेचे नियोजन काटेकोरपणे केले जात आहे.
निवडणुकीनंतर आमदारांना देखील विकासकामांचा निधी मिळालेला नाही. जिल्हा नियोजन समित्यांचाही निधी प्रलंबित आहे. या पार्श्वभूमीवर लाडक्या बहिणींना डिसेंबर व जानेवारीचा लाभ एकत्रित देऊन पुढे अर्थसंकल्पी अधिवेशनापूर्वी दोन महिन्यांचा लाभ दिला जाईल, असेही वरिष्ठ सूत्रांनी सांगितले. मार्चनंतर शक्य झाल्यास लाडक्या बहिणींना १ एप्रिलपासून प्रत्येकी २,१०० रुपये दिले जावू शकतात, असेही सांगण्यात आले.
पडताळणी निश्चित, पण निर्णयासाठी 'वेट ॲण्ड वॉच'
मुख्यमंत्री माझी लाडकी बहीण योजनेसाठी १५ ऑक्टोबरच्या मुदतीपर्यंत पावणेतीन कोटी महिलांनी अर्ज केले आहेत. पण, त्यात संजय गांधी निराधार योजनेतील देखील लाभार्थी महिला आहेत. याशिवाय कुटुंबाचे वार्षिक आर्थिक उत्पन्न अडीच लाखांहून अधिक असलेल्या व एकाच कुटुंबातील दोनपेक्षा अधिक महिलादेखील अर्जदार आहेत. दरम्यान, शासनाच्या दुसऱ्या वैयक्तिक योजनेचा लाभ घेणाऱ्या महिलांना एकाच योजनेचा लाभ घेता येतो. त्यामुळे अर्जांची पडताळणी निश्चितपणे होणार आहे, पण तुर्तास त्यासंबंधीचा शासन निर्णय झाला नाही.
काही दिवसांत जमा होईल लाभाची रक्कम
मुख्यमंत्री माझी लाडकी बहीण योजनेतील लाभार्थींना डिसेंबर महिन्यातील लाभ काही दिवसांत अपेक्षित आहे. मंत्रिमंडळाची बैठक पार पडल्यानंतर महिलांना योजनेच्या लाभाची रक्कम वितरित होईल. दरम्यान, योजनेतील लाभार्थींच्या अर्जांच्या पडताळणीसंदर्भात अद्याप कोणताही निर्णय झाला नाही.
- प्रसाद मिरकले, महिला व बालकल्याण अधिकारी, सोलापूर
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
