'कुंभमेळ्यातील चेंगराचेंगरीत शेकडो भाविकांचा मृत्यू, जबाबदारी स्वीकारुन मोदींनी राजीनामा द्यावा'; काय म्हणाले बाबा आढाव?
"महा कुंभमेळा आणि तेथील चेंगराचेंगरीत बेपत्ता झालेले व मृत्युमुखी पडलेल्यांची संख्या लक्षात घेता सरकारचा हलगर्जीपणा दिसून येतो. त्यामुळे सरकारने जबाबदारी स्वीकारलीच पाहिजे आणि पंतप्रधान नरेंद्र मोदी यांनी राजीनामा दिला पाहिजे."
सातारा : सध्या संपूर्ण देशामध्ये धर्मांधतेचे वातावरण पसरविण्याचे काम सत्ताधाऱ्यांकडून जाणीवपूर्वक केले जात आहे. प्रयागराज येथील महाकुंभ मेळ्यात चेंगराचेंगरी होऊन शेकडो भाविक मृत्युमुखी पडले असून, तितकेच बेपत्ता झाले असावेत; पण केंद्र शासन याचा खरा आकडा जाहीर करत नाही आणि खरे आकडे समोर येऊ देत नाही. शासनाची व एकूणच प्रशासनाची यासंदर्भात बेपर्वाई दिसून येते. याप्रकरणाची जबाबदारी स्वीकारून पंतप्रधान नरेंद्र मोदी यांनी राजीनामा द्यावा, अशी मागणी ज्येष्ठ सामाजिक कार्यकर्ते व विचारवंत डॉ. बाबा आढाव यांनी केली.
कोल्हापूरला जाताना काल सकाळी डॉ. बाबा आढाव हे रिक्षा पंचायतीचे सरचिटणीस नितीन पवार व ओंकार मोरे यांच्यासह साताऱ्यात अल्पवेळ थांबले होते. ९४ व्या वर्षीही डॉ. आढाव यांचा उत्साह वाखाणण्यासारखा होता. या वेळी त्यांनी विविध विषयांवर भाष्य केले. या वेळी फुले, शाहू, आंबेडकरवादी, तसेच परिवर्तनवादी कार्यकर्त्यांकडून डॉ. आढाव यांनी सध्याच्या राजकीय व सामाजिक स्थितीबद्दल माहिती जाणून घेतली.त्या वेळी डॉ. बाबा आढाव म्हणाले, ''महा कुंभमेळा आणि तेथील चेंगराचेंगरीत बेपत्ता झालेले व मृत्युमुखी पडलेल्यांची संख्या लक्षात घेता सरकारचा हलगर्जीपणा दिसून येतो. त्यामुळे सरकारने जबाबदारी स्वीकारलीच पाहिजे आणि पंतप्रधान नरेंद्र मोदी यांनी राजीनामा दिला पाहिजे. सध्याची देशातील सामाजिक परिस्थिती अस्वस्थ करणारी आहे. या संदर्भात तरुणाईनेच आता उचल खाल्ली पाहिजे आणि संविधान टिकवले पाहिजे. आता निर्भय बनून रस्त्यावर उतरण्याशिवाय पर्याय नाही.''विद्रोही सांस्कृतिक चळवळीचे महाराष्ट्राचे उपाध्यक्ष विजय मांडके यांनी प्रास्ताविक केले. या वेळी जयंत उथळे, मिनाज सय्यद, अरिफभाई बागवान, सुदामराव आवडे, शिरीष जंगम, दिलीप ससाणे, नारायण जावळीकर, प्रा. संजीव बोंडे, डॉ. राजश्री देशपांडे, नीलिमा देशपांडे, सलमा कुलकर्णी-मोरे, डॉ. धनंजय देवी, राहुल गंगावणे, महेश गुरव, सलीम आत्तार, ॲड. विकास उथळे, डॉ. गीतांजली पोळ, अभिजित शिंदे वगैरे विविध संघटनांचे कार्यकर्ते उपस्थित होते.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.