खासदार, आमदार नव्हे, तर जनतेच्या हक्कांसाठी लढा! सांगलीत 'रेशनिंग कृती समिती'च्या चर्चासत्रात अन्यायाविरुद्ध एल्गार

खासदार, आमदार नव्हे, तर जनतेच्या हक्कांसाठी लढा! सांगलीत 'रेशनिंग कृती समिती'च्या चर्चासत्रात अन्यायाविरुद्ध एल्गार

सांगली :- रेशन वितरण व्यवस्थेतील त्रुटी, रेशन बंद करण्यासंदर्भातील मनमानी नोटिसा, वित्तीय संस्थांकडून होणारी चुकीची कर्जवसुली आणि सर्वसामान्य नागरिकांचे कायदेशीर अधिकार या अतिशय संवेदनशील व ज्वलंत विषयांवर 'रेशनिंग कृती समिती, सांगली' यांच्या वतीने नुकतेच एक महत्त्वपूर्ण लोकसहभाग आणि लोकपुढाकार चर्चासत्र उत्साहात पार पडले. सांगली आणि कोल्हापूर जिल्ह्यातील विविध तालुक्यांमधून आलेल्या सामाजिक कार्यकर्ते, पत्रकार आणि आरोग्यदूतांनी या चर्चासत्रात मोठ्या संख्येने सहभाग नोंदवत आपले प्रश्न व अनुभव मांडले.

​कार्यकर्त्यांची भूमिका आणि संघटित संघर्षाचे महत्त्व

​कार्यक्रमाच्या प्रास्ताविकात आणि मार्गदशनात व्याख्याते कैलास पाटील यांनी सामाजिक जाणिवा, कार्यकर्त्यांची खरी भूमिका आणि सामाजिक कार्य करताना लागणारी तळमळ यावर सविस्तर प्रकाश टाकला. 

लोकांच्या हक्कांच्या प्रश्नांसाठी संघटितपणे कसे लढावे, संघर्षाची दिशा कशी ठरवावी तसेच समाजकार्यात युवकांसाठी असणाऱ्या विविध संधी याविषयी त्यांनी उपस्थितांना मोलाचे मार्गदर्शन केले. एक आदर्श सामाजिक कार्यकर्ता कसा असावा आणि समाजातील तळागाळातील प्रश्न कसे समजून घ्यावेत, याचे त्यांनी धडे दिले.

​चुकीच्या कर्जवसुलीवर अनिफ डफेदार यांचे कायदेशीर मार्गदर्शन

​सध्याच्या काळात अनधिकृत आणि चुकीच्या पद्धतीने होणारी कर्जवसुली, यामुळे कर्जदारांना व सर्वसामान्य कुटुंबांना नाहक सहन करावा लागणारा मानसिक त्रास आणि अशा जाचाला सामोरे जाताना नागरिकांनी कोणती बचावात्मक व आक्रमक भूमिका घ्यावी, याबाबत अनिफ डफेदार यांनी उपस्थितांना मार्गदर्शन केले. बँक व वित्तीय संस्थांच्या मुजोरीविरोधात कायदेशीर बडगा कसा उगारला पाहिजे, हे त्यांनी उदाहरणांसह स्पष्ट केले.

​कायद्याचा धाक आणि न्यायासाठी जागरूकतेचे आवाहन

​अॅड. सुहासिनी शिंदे यांनी आपल्या मार्गदर्शनात संविधानात्मक व विविध कायदेशीर तरतुदींची माहिती दिली. नागरिकांनी स्वतःच्या हक्कांसोबतच कायदेशीर बाबींची माहिती करून घेणे आजच्या काळात किती गरजेचे आहे, हे सांगत त्यांनी अन्यायाविरुद्ध गप्प न बसता कायदेशीर मार्गाने दाद मागण्याचे आवाहन केले. कायदेशीर लढा कसा द्यावा, याचे प्रात्यक्षिक कायदेविषयक दाखले देत त्यांनी स्पष्ट केले.

​रेशन लाभार्थ्यांच्या अडचणी आणि माहिती अधिकाराचा प्रभावी वापर

​चर्चासत्रादरम्यान सांगली व कोल्हापूर जिल्ह्यातील विविध भागांतून आलेल्या प्रमुख पदाधिकाऱ्यांनी आपापल्या भागातील रेशन वितरणातील समस्यांचा पाढा वाचला. विशेषतः, अनेक गरीब लाभार्थ्यांना अचानक रेशन धान्य बंद करण्यासंदर्भात प्राप्त झालेल्या मनमानी नोटिसांवर या वेळी गांभीर्याने चर्चा करण्यात आली. 

या नोटिसींच्या कायदेशीर बाजू स्पष्ट करताना माहिती अधिकार व्याख्याते शाहीन शेख यांनी उपस्थितांचे योग्य प्रबोधन केले. लाभार्थ्यांनी कसलेही भय बाळगू नये, नोटिसीतील मजकूर काळजीपूर्वक वाचून योग्य व कायदेशीर मार्गाचा अवलंब करावा, असा सल्ला त्यांनी दिला. माहिती अधिकाराच्या हत्याराचा वापर करून कशा प्रकारे न्याय मिळवता येतो, हे त्यांनी दाखवून दिले.

​जनजागृतीची गरज आणि उज्ज्वल भविष्याचा संकल्प

​कार्यक्रमाच्या उत्तरार्धात उपस्थित पत्रकार, सामाजिक कार्यकर्ते, आरोग्यदूत आणि विविध संघटनांच्या पदाधिकाऱ्यांनी मनोगते व्यक्त केली. रेशन व्यवस्था, कर्जवसुलीचा ससेमिरा आणि सर्वसामान्य नागरिकांचे हक्क यावर सातत्याने अशा प्रकारची जनजागृतीपर चर्चासत्रे आणि कार्यशाळा आयोजित करण्याची गरज यावेळी सर्वानुमते व्यक्त करण्यात आली.

​सामाजिक प्रश्नांवर मतभेद बाजूला सारून एकत्र येणे, नागरिकांना त्यांच्या हक्कांची जाणीव करून देणे आणि अन्याय करणाऱ्या यंत्रणांविरोधात कायदेशीर मार्गाने लढा उभा करणे, हा या संपूर्ण चर्चासत्राचा मुख्य उद्देश असल्याचे या वेळी अधोरेखित करण्यात आले. सांगलीत पार पडलेल्या या यशस्वी चर्चासत्रामुळे आगामी काळात सर्वसामान्य नागरिकांच्या हक्कांच्या लढ्याला अधिक धार येईल, असा विश्वास उपस्थितांनी व्यक्त केला.

​

➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.