एका WhatsApp मेसेजमुळे महिला डॉक्टरला अटक
हैदराबादमध्ये एका महिला डॉक्टरला पोलिसांनी बेड्या ठोकल्या आहेत. डॉक्टरला अटक करण्याचं कारणही तितकंच धक्कादायक आहे. महिला डॉक्टरला कोकेनसह अटक करण्यात आली आहे. आरोपी डॉक्टरने 1,2 नव्हे तर तब्बल 5 लाखांचं कोकेन मागवलं होतं अशी माहिती पोलिसांनी दिली आहे.
नम्रता चिगुरुपती असं या महिला डॉक्टरचं नाव असून, पोलिसांनी तिला कोकेन स्विकारताना रंगेहाथ पकडलं आहे. नम्रता चिगुरुपतीने सहा महिन्यांपूर्वी ओमेगा हॉस्पिटल्सच्या सीईओपदाचा राजीनामा दिला होता. नम्रता चिगुरुपतीने मुंबईतील पुरवठादार वंश धक्कर याच्याकडून कोकेन मागवलं होतं. कुरिअरद्वारे पाठवण्यात आलेले हे कोकेन स्विकारत असताना तिला अटक करण्यात आली. तिच्यासह वंश धक्कर याचा सहकारी बालकृष्ण जो कोकेनच्या डिलिव्हरीसाठी आला होता, त्यालाही पकडण्यात आलं आहे.
पोलिसांनी दिलेल्या माहितीनुसार, 34 वर्षीय नम्रता चिगुरुपतीने व्हॉट्सपअपच्या माध्यमातून कोकेनची ऑर्डर दिली होती. तिने सर्व पैसे ऑनलाइन ट्रान्सफर केले होते. "नम्रता नावाच्या एका डॉक्टरने मुंबईतील वंश याच्याकडून ड्रग्ज मागवले होते. दोघे एकमेकांना ओळखत होते. त्यानंतर बालकृष्ण नावाचा एक व्यक्ती ड्रग्जची डिलिव्हरी घेऊन पोहोचला होता. त्याने ते रायदुर्गम येथे तिच्याकडे सोपवले," अशी माहिती वरिष्ठ पोलिस अधिकारी वेंकण्णा यांनी दिली आहे. पोलीस अधिकारी वेंकण्णा यांनी पुढे सांगितलं की, "पोलिसांनी माग काढत त्यांना अटक केली आहे. 10 हजारांची रोख आणि 53 ग्रॅम कोकेन सापडलं असून, त्यांच्याकडून दोन मोबाईल जप्त करण्यात आले आहेत". त्यांच्याविरुद्ध संबंधित कलमांखाली गुन्हे दाखल करण्यात आले आहेत आणि त्यांना न्यायालयीन कोठडीत पाठवण्यात आले आहे, असं वेंकण्णा म्हणाले. चौकशीदरम्यान, तिने आतापर्यंत ड्रग्जवर सुमारे 70 लाख रुपये खर्च केल्याची कबुली दिली आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
