मिरज: महात्मा गांधी चौक पोलिसांची रोडरोमिओ आणि विनानंबर वाहनांवर धडक कारवाई; ४२ दुचाकी जप्त, हजारो रुपयांचा दंड वसूल
मिरज :- सांगली जिल्ह्यात फौजदारी गुन्ह्यांमध्ये विनानंबरप्लेट आणि फॅन्सी नंबरप्लेट असलेल्या वाहनांचा वापर मोठ्या प्रमाणात होत असल्याचे समोर आले आहे. या पार्श्वभूमीवर सांगलीचे पोलीस अधीक्षक तुषार दोशी, अप्पर पोलीस अधीक्षक कल्पना बारवकर आणि मिरज विभागाचे उपविभागीय पोलीस अधिकारी अजय कोकाटे यांच्या आदेशानुसार मिरज शहरात विशेष मोहीम राबवण्यात आली. या धडक मोहिमेअंतर्गत विनानंबरप्लेट, फॅन्सी नंबरप्लेट आणि ट्रिपल सीट फिरणाऱ्या ४२ दुचाकींवर कडक कारवाई करत पोलिसांनी ३३,९०० रुपयांचा दंड वसूल केला आहे.
विविध भागात अचानक नाकाबंदी
महात्मा गांधी चौक पोलीस ठाण्याचे प्रभारी सहाय्यक पोलीस निरीक्षक संदीप शिंदे यांच्या मार्गदर्शनाखाली पोलिसांची वेगवेगळी पथके तयार करण्यात आली होती. या पथकांनी पोलीस ठाण्याच्या हद्दीतील प्रमुख रस्ते आणि संवेदनशील भागांमध्ये गस्त वाढवली. यामध्ये प्रामुख्याने:कुपवाड रोडछत्रपती शिवाजी महाराज रोडरेल्वे स्टेशन रोडआंबेडकर उद्यान परिसरविविध शाळा, महाविद्यालये आणि रुग्णालयांचा परिसरया भागात पोलिसांनी अचानक नाकाबंदी करून संशयीत आणि नियमबाह्य वाहन चालवणाऱ्यांची धरपकड केली.
४२ दुचाकींवर दंडात्मक कारवाई
या मोहिमेदरम्यान पोलिसांनी विनानंबरप्लेट, फॅन्सी नंबरप्लेट आणि ट्रिपल सीट फिरणाऱ्या रोडरोमिओंच्या एकूण ४२ मोटारसायकली ताब्यात घेतल्या. पोलिसांनी केवळ दंड न थोपवता, संबंधित वाहनांची कागदपत्रे आणि वाहनचालकांची ओळख पटवून खात्री केली. त्यानंतर कायदेशीर प्रक्रिया पूर्ण करत एकूण ३३,९०० रुपयांचा दंड वसूल करण्यात आला.
पोलिसांचे आवाहन: 'डायल ११२' वर माहिती द्या
सांगली जिल्हा पोलीस प्रशासनाकडून रोडरोमिओ आणि संशयीत इसमांविरोधात ही प्रभावी मोहीम यापुढेही अधिक व्यापक प्रमाणात राबवली जाणार आहे. नागरिकांना आपल्या परिसरात अशा प्रकारची संशयीत वाहने किंवा व्यक्ती आढळल्यास त्यांनी तात्काळ 'डायल ११२' या क्रमांकावर पोलीस प्रशासनाला माहिती द्यावी, असे आवाहन सांगली जिल्हा पोलीस दलातर्फे करण्यात आले आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
