योगगुरू रामदेव बाबांना धक्का ! कंपनीचे कोट्यवधींचे शेअर्स केले फ्रीज
नवी दिल्ली : बॉम्बे स्टॉक एक्‍सचेंज आणि नॅशनल स्टॉक एक्‍सचेंजने बाबा रामदेव यांच्या पतंजली फूड्‌स कंपनीवर मोठी कारवाई केली आहे. स्टॉक एक्‍स्चेंजने कंपनीच्या प्रवर्तक समूहातील 29.26 कोटी शेअर्स गोठवले आहेत. कंपनी निर्धारित वेळेत किमान सार्वजनिक शेअर होल्डिंगचे निकष पूर्ण करण्यात अयशस्वी ठरली. त्यामुळेच त्याच्यावर ही कारवाई करण्यात आली असल्याचे समजते.
पतंजली फूड्‌समधील सार्वजनिक शेअरहोल्डिंग डिसेंबर अखेरीस 19.18 टक्के होती. सेबीच्या नियमांनुसार, कोणत्याही लिस्टेड कंपनीमध्ये किमान 25 टक्के सार्वजनिक भागधारक असणे आवश्‍यक आहे. पतंजली फूड्‌स पूर्वी रुची सोया इंडस्ट्रीज म्हणून ओळखले जात होते.
डिसेंबर 2017 मध्ये, एनसीएलटीने त्याविरुद्ध दिवाळखोरीची कारवाई सुरू केली. जुलै 2019 मध्ये, न्यायाधिकरणाने पतंजली आयुर्वेदाच्या संकल्प योजनेला मंजुरी दिली. रिझोल्यूशन प्लॅनच्या अंमलबजावणीनंतर, कंपनीतील सार्वजनिक शेअरहोल्डिंग 1.1 टक्‍क्‍यांपर्यंत खाली आले.
कंपनीने एका निवेदनात म्हटले आहे की 21 प्रवर्तक संस्थांचे शेअर्स गोठवण्यात आले आहेत. पतंजली आयुर्वेदचा कंपनीत सर्वाधिक ३९.४ टक्के हिस्सा आहे. जोपर्यंत कंपनी सेबीच्या नियमांची पूर्तता करत नाही तोपर्यंत हे शेअर्स गोठवले जातील. बुधवारी पतंजली फूड्‌सचा शेअर एनएससी वर 1.3 टक्‍क्‍यांनी वाढून 964.40 रुपयांवर बंद झाला. त्यात यावर्षी आतापर्यंत 19 टक्‍क्‍यांनी घट झाली आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
