राज्यातील आठ राजकीय पक्षांची निवडणूक आयोग नोंदणी रद्द करणार
बंगळूर : भारतीय निवडणूक आयोगाने सक्रियपणे कार्यरत नसलेल्या आठ राजकीय पक्षांना नोंदणी यादीतून काढून टाकण्याचा निर्णय घेतला आहे. बंगळूर शहराचे अतिरिक्त जिल्हा निवडणूक अधिकारी असलेले उपायुक्त जगदीश जी. यांनी सांगितले की, या संदर्भात १८ जुलै रोजी कर्नाटकच्या मुख्य निवडणूक अधिकाऱ्यांच्या कार्यालयात सुनावणी होईल.
निवडणूक आयोगाने लोकप्रतिनिधी कायदा, १९५१ च्या कलम २९ (ए) अंतर्गत नोंदणीकृत आठ राजकीय पक्षांना कारणे दाखवा नोटीस बजावली आहे. त्यामध्ये सक्रिय नसलेल्या नम्म काँग्रेस, प्रजा रयत राज्य पक्ष, कल्याण क्रांती पक्ष, भारतीय डॉ. बी. आर. आंबेडकर जनता पक्ष, रक्षक सेने, महिला प्रधान पक्ष, आंबेडकर जनता पक्ष आणि कर्नाटक प्रजा विकास पक्ष या पक्षांचा समावेश आहे.
हे पक्ष सक्रिय नसल्याने आणि त्यांचे पत्ते शोधता येत नसल्याने आणि सहा वर्षांत त्यांनी कोणतीही लोकसभा, विधानसभा किंवा पोटनिवडणूक लढवली नसल्याने त्यांना यादीतून वगळण्याचा निर्णय घेण्यात आला आहे. तथापि, त्यापूर्वी या राजकीय पक्षांना त्यांचे म्हणणे नोंदवण्याची संधी देण्यात आली आहे.
पक्षाचे नेते, अध्यक्ष आणि सरचिटणीस यांना १८ जुलै २०२५ रोजी पक्षाध्यक्ष आणि सरचिटणीसांचे प्रतिज्ञापत्र, इतर कागदपत्रे आणि अर्जासह सुनावणीसाठी उपस्थित राहण्यास सांगण्यात आले आहे. जर पक्षाकडून निर्धारित वेळेत कोणताही लेखी अर्ज प्राप्त झाला नाही, तर पक्षाकडून कोणतेही निवेदन मिळालेले नाही, असे मानले जाईल. पक्षाशी सल्लामसलत न करता निवडणूक आयोग पुढील निर्णय घेईल, असे एडीईओ यांनी सांगितले.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
