नगरच्या 6 नामांकित डॉक्टरांकडून अवयवांची 'तस्करी' करुन मृतदेहाची
परस्पर विल्हेवाट केल्याप्रकरणी गुन्हा दाखल; राज्याच्या वैद्यकीय
क्षेत्रात प्रचंड खळबळ
नगर, ता. 19 : रुग्णालयात दाखल झालेल्या एका वृद्धाला करोना पॉझिटिव्हचा खोटा रिपोर्ट बनवून चुकीचे उपचार दिले. या चुकीच्या उपचारादरम्यान रुग्णाचा मृत्यू झाला. परंतु, रुग्णाच्या मृत्यूनंतर शरिरातील अवयवांची तस्करी करण्यासाठी व पुरावा नष्ट करण्यासाठी मृतदेहाची परस्पर विल्हेवाट लावल्याचा धक्कादायक प्रकार उघडकीस आला आहे.
याप्रकरणी उच्च न्यायालयाच्या छत्रपती संभाजीनगर खंडपीठाने दिलेल्या आदेशानुसार अहिल्यानगर शहरातील सहा नामांकित डॉक्टरांसह अनोळखी कर्मचार्‍यांविरोधात तोफखाना पोलीस ठाण्यात शनिवारी (ता.18) गुन्हा दाखल करण्यात आला आहे. या प्रकारामुळे राज्याच्या वैद्यकीय क्षेत्रात प्रचंड खळबळ उडाली आहे.
डॉ. गोपाळ बहुरुपी, डॉ. सुधीर बोरकर (रा. पाईपलाईन रस्ता, सावेडी), डॉ. सचिन पांडुळे, डॉ. अक्षयदीप झावरे, डॉ. मुकुंद तांदळे (सर्व रा. नगर) आणि एका लॅब तज्ज्ञ डॉक्टरसह इतर कर्मचार्‍यांवर हा गुन्हा दाखल झाला आहे. याप्रकरणी मयत वृद्धाचे पुत्र अशोक बबनराव खोकराळे (वय 47, रा. सावेडी) यांनी फिर्याद दिली आहे.
पोलिसांनी दिलेल्या माहितीनुसार, अशोक खोकराळे यांचे वडील बबनराव खोकराळे (वय 79) यांना 13 ऑगस्ट 2020 रोजी घशात खवखव आणि बद्धकोष्ठतेचा त्रास होत होता. खोकराळे यांचे सर्व रिपोर्ट नॉर्मल असतानादेखील त्यांना डॉ. पांडुळे यांच्या पटियाला हाऊस येथील कोविड सेंटरमध्ये उपचारासाठी दाखल करण्यात आले होते . त्यांना निरीक्षणाखाली ठेवण्यात आले. त्यानंतर फिर्यादी अशोक खोकराळे यांना कोणतीही कल्पना न देता त्यांच्या वडिलांना डॉ. बहुरुपी आणि डॉ. बोरकर यांच्या न्युक्लिअस हॉस्पिटलमध्ये परस्पर हलवण्यात आले.
न्युक्लिअस हॉस्पिटलमध्ये गेल्यानंतर बबनराव यांनी मुलगा अशोक आणि अरविंद यांना फोन करून, हे लोक मला मारून टाकतील, मला बेडला बांधून ठेवतात, खूप रक्त काढले, मला इथून घेऊन जा, अशी विनवणी केली. फिर्यादीने भेटण्याचा प्रयत्न केला असता त्यांना अडवण्यात आले. करोना पॉझिटिव्ह असल्याचे सांगून डिस्चार्ज देण्यास टाळाटाळ केली. त्यानंतर 18 ऑगस्ट 2020 रोजी फिर्यादीला वडिलांच्या मृत्यूची बातमी मिळाली.दरम्यान, हॉस्पिटल प्रशासनाने 1 लाख 84 हजार रुपयांचे बिल भरण्यास सांगितले. बिल भरल्यानंतर, मृतदेह सिव्हिल हॉस्पिटलला पाठवल्याचे सांगितले. मात्र, फिर्यादीने सिव्हिल हॉस्पिटल, अमरधाम आणि न्युक्लिअस हॉस्पिटलमध्ये शोधाशोध करूनही वडिलांचा मृतदेह आजपर्यंत सापडलेला नाही. याप्रकरणी फिर्यादीने उच्च न्यायालयात धाव घेतली. जिल्हा शल्यचिकित्सकांनी नेमलेल्या समितीने देखील डॉक्टरांनी गैरव्यवहार, निष्काळजीपणा आणि हलगर्जीपणा केल्याचा अहवाल न्यायालयात सादर केला. अखेर, 18 ऑक्टोबर 2025 रोजीच्या उच्च न्यायालयाच्या निर्देशानुसार, हा गुन्हा दाखल करण्यात आला आहे.याप्रकरणी न्युक्लिअस हॉस्पिटलचे डॉ. गोपाळ बहुरुपी, डॉ. सुधीर बोरकर (रा. पाईपलाईन रस्ता, सावेडी), डॉ. सचिन पांडुळे, डॉ. अक्षयदीप झावरे, डॉ. मुकुंद तांदळे (सर्व रा. नगर) आणि डॉ. विखे पाटील मेमोरियल हॉस्पिटल लॅबचे तज्ञ डॉक्टर यांच्यासह इतर कर्मचाऱ्यांवर हा गुन्हा दाखल झाला आहे. कटकारस्थान, फसवणूक आणि मृत्यूस कारणीभूत ठरल्याप्रकरणी गुन्हा दाखल करण्यात आला आहे. पुढील तपास पोलीस निरीक्षक आनंद कोकरे करत आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
