Breaking News! पुण्यात जैन बांधवांचा विराट मोर्चा! भाजप वगळता इतर सर्व पक्ष सहभागी! आचार्यांचा अन्नत्याग! पुण्यात खळबळ!
केंद्रीय मंत्री मुरलीधर मोहोळ आणि तथाकथित बिल्डरांविरोधात संतप्त जैन समाजाच्या मोठ्ठ्या मोर्चाने पुण्यात खळबळ, आचार्य गुप्तीनंदजी महाराज यांचा अन्नत्याग तर विश्वस्तांनी निर्णय न बदलल्यास मुंबई येथील त्यांच्या घरावर विराट मोर्चा नेणार असल्याचे माजी खासदार राजू शेट्टी यांचे सूतोवाच, जैन समाजावर अन्याय होऊ देणार नसल्याचे मुख्यमंत्री देवेंद्र फडणवीस यांचे आश्वासन !
डॉ. संदेश शहा.
‘अहिंसा
परमो धर्म की जय’, ‘धर्माचा व्यापार बंद करा’, ‘धर्म खरेदी किंवा विकायची
वस्तू नाही’, ‘शेठ हिराचंद नेमचंद जैन दिगंबर बोर्डिंगची जागा वाचवा’, ‘जैन
मंदिर वाचवा’, ‘जब तक सूरज चांद रहेगा एचएनडी हॉस्टेल तेरा नाम रहेगा’ अशा
घोषणा देत हजारो प्रक्षुब्ध जैन समाजाने एकत्र येऊन विश्वस्तांच्या जैन
बोर्डिंग व मंदिरच्या जागा विक्रीच्या निर्णयाला विरोध केला.
दिवाळी सणाच्या प्रारंभी भर उन्हात झालेल्या या मोर्चाने जैन समाजाचा असंतोष व्यक्त झाला. भव्य मोर्चाद्वारे आपल्या मागण्यांचे निवेदन पुणे जिल्हाधिकारी यांना देण्यात आले. याचिकाकर्ता आनंद कांकरिया, स्वप्नील गंगवाल, ॲड योगेश पांडे, ॲड. जिंतूरकर, अक्षय जैन यांच्यासह हजारो युवा कार्यकर्ते आणि बोर्डिंगमधील आजी, माजी विद्यार्थी मोर्चात सहभागी झाले होते. मोर्चाच्या अग्रभागी श्री १०८ आचार्य गुरुदेव गुप्तीनंदजी महाराज ससंघ, कोल्हापूर येथील भट्टारक श्री लक्ष्मीसेन महाराज, आचार्य प्रविण ऋषिजी महाराज, माताजी महाराज होते. मॉडेल कॉलनी परिसरातील पब्लिक चॅरिटेबल ट्रस्ट अंतर्गत असलेल्या शेठ हिराचंद नेमचंद जैन दिगंबर बोर्डिंगची (जैन बोर्डिंग) जागा काही विश्वस्तांनी बेकायदेशीरपणे विकली आहे. या निर्णयाला जैन समाजाचा तीव्र विरोध आहे. जमीन विक्रीविषयी जाहीर नाराजी व्यक्त करण्यासाठी जैन बोर्डिंग बचाव कृती समितीच्या वतीने महाराष्ट्रातील जैन बांधवांनी काळ्या फिती लावून आणि निषेधाचे फलक घेऊन आज दि. १७ ऑक्टोबर रोजी जैन बोर्डिंग ते जिल्हाधिकारी कार्यालय असा भव्य मोर्चा काढला.
माजी खासदार राजू शेट्टी, अभय छाजेड,
प्रशांत जगताप, अरविंद शिंदे, आमदार सिद्धार्थ शिरोळे, रवींद्र धंगेकर
यांनी भेट देऊन जैन समाजाच्या मागणीस पाठींबा दर्शविला. केंद्रीय मंत्री,
विकासक तथा भाजप खासदार मुरलीधर मोहोळ यांचे या व्यवहारात नाव असल्याने
भाजप वगळता दोन्ही शिवसेना, दोन्ही राष्ट्रवादी काँग्रेस, शेतकरी संघटना,
विविध संस्थांनी या मोर्चास जाहीर पाठिंबा दिला.
महाराष्ट्राच्या
कानाकोपऱ्यातून आलेले जैन बांधव भगिनी मोठ्या संख्येने जैन बोर्डिंगच्या
आवारात एकत्र आले. येथे आचार्य गुरुदेव श्री गुप्तीनंदजी महाराज यांनी जमीन
विक्री बेकायदा असून त्याविरोधात सर्वांनी एकत्रितपणे लढा द्यायचा आहे,
असे आवाहन केले. यावेळी त्यांनी अन्नत्याग केल्याचे घोषित करताच
मोर्चेकऱ्यांनी या व्यवहारातील सर्व व्यक्तींबद्दल तीव्र संताप व्यक्त
केला. त्यानंतर
जैन बोर्डिंग येथून मोर्चाला सुरुवात झाली. संचेती हॉस्पिटल, जुना बाजार
मार्गे जिल्हाधिकारी कार्यालयापर्यंत शांततेत मोर्चा संपन्न झाला. हजारो
नागरिक या मोर्चात सहभागी झाले होते. जैन समाजातील शिष्टमंडळाने
जिल्हाधिकारी यांना निवेदन सादर करून आपल्या भावना व्यक्त केल्या.
शेठ हिराचंद नेमचंद स्मारक ट्रस्ट ही सन
१९५८ साली स्थापन झालेली सार्वजनिक धर्मदाय संस्था असून संस्थेच्या
ताब्यात मॉडेल कॉलनी येथील सुमारे १२ हजार चौरस मीटर क्षेत्रफळाचा भूखंड
मोक्याच्या जागेवर आहे. या जागेवर गेल्या अनेक वर्षांपासून शेठ हिराचंद
नेमचंद दिगंबर जैन बोर्डिंग व श्री १००८ भगवान महावीर दिगंबर जैन मंदिर
अस्तित्वात आहे.
ट्रस्टच्या संपत्ती बाबत काही व्यक्तींमार्फत विकासकांशी व्यवहार करण्यात आल्याचे निदर्शनास आले असून हा मुद्दा सध्या न्यायप्रविष्ट आहे. तरीही स्थानिक स्तरावर विकास कामे व हस्तक्षेप होत असल्याचे दिसून येत आहे. यामुळे जैन समाजामध्ये तीव्र असंतोष आहे. या ठिकाणी असलेले श्री १००८ भगवान महावीर जैन मंदिर हजारो जैन बांधवांच्या श्रद्धेचे केंद्र असून ते धार्मिक, सामाजिक व शैक्षणिक दृष्ट्या अत्यंत महत्त्वाचे आहे.मंदिर व वसतिगृहाच्या अस्तित्वावर कोणत्याही प्रकारे गदा येऊ नये ही जैन बांधवांची अपेक्षा आहे. जैन मुनी आचार्य गुरुदेव श्री गुप्तीनंदजी महाराज हे त्यांच्या संघासह सध्या जैन बोर्डिंग येथे वास्तव्यास आहेत. आठ ऑक्टोबर २०२५ रोजीचा ट्रस्ट आणि विकासक यांच्या तील विक्रीकरार आणि त्यानंतरचा कर्जकरार रद्द करावा आणि वसतिगृहाची मालमत्ता वसतिगृह आणि ट्रस्टच्या संबंधित धर्मादाय कारणांसाठीच वापरली जावी, अशी वसतिगृहातील विद्यार्थी आणि जैन समाजाची एकमुखी आग्रही मागणी आहे.जैन बोर्डिंग जमीन विक्री प्रकरणी लक्ष्मीकांत खाबिया व ॲड. योगेश पांडे आणि आनंद कांकरिया यांनी गुरुवार दि. १६ ऑक्टोबर रोजी मुख्यमंत्री देवेंद्र फडणवीस यांची पुण्यात भेट घेऊन सर्व वस्तुस्थिती त्यांच्या निदर्शनास आणून दिली. यावेळी मुख्यमंत्र्यांनी सर्व कायदेशीर बाबी समजून घेतल्या. मुख्यमंत्र्यांनी जैन समाजातील शिष्ट मंडळाशी दूरध्वनीद्वारे संपर्क साधून वसतिगृह आणि मंदिराविषयी समाजावर अन्याय होणार नाही, अशी स्पष्ट ग्वाही देऊन सर्वतोपरी सहकार्य करण्याचे आश्वासन दिले असल्याचे लक्ष्मीकांत खाबिया यांनी सांगितले.
या
मोर्चात अखिल भारतीय अल्पसंख्याक समितीचे राष्ट्रीय सचिव संदीप भंडारी,
दिगंबर जैन ग्लोबल महासभेचे राष्ट्रीय उपाध्यक्ष पारस लोहाडे, तीर्थरक्षा
कमिटीचे राष्ट्रीय उपाध्यक्ष संजय पापडीवाल, महाराष्ट्र प्रदेशाध्यक्ष
मिहीर गांधी, हुमड जैन फेडरेशनचे माजी अध्यक्ष डॉ. श्रेणिक शहा, जीव मंगल
ट्रस्टचे अध्यक्ष डॉ. कल्याण गंगवाल, दक्षिण भारत जैन सभेचे अध्यक्ष
भालचंद्र पाटील, विश्वस्त सागर चौगुले, सुजाता शहा, सुरेंद्र गांधी,
सूर्यकांत शहा, वीरेंद्र शहा, प्रीतम मेहता सहभागी झाले होते.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
