सांगली :- दिरासोबत बाईकवरून जाताना भीषण अपघात; महिलेचा मृत्यू, तर दीर जखमी, सांगलीत हळहळ
सांगली: मिरज सिव्हिल रुग्णालयासमोर एक भीषण अपघात झाला. डंपरने मोटरसायकलला धडक दिल्याने नंदिनी मच्छिंद्र दोलतडे या 32 वर्षीय महिलेचा जागीच मृत्यू झाला. या अपघातात मनोज कृष्णदेव दोलतडे हे जखमी झाले असून त्यांच्यावर मिरज शासकीय रुग्णालयात उपचार सुरू आहेत. हा अपघात सोलापूरच्या दिशेने जात असताना झाला असून पोलिसांनी घटनास्थळी धाव घेऊन पंचनामा केला असून पुढील तपास सुरू आहे.
मिळालेल्या माहितीनुसार, मनोज दोलतडे आणि त्यांची भावजय नंदिनी दोलतडे हे दोघे सोलापूरच्या दिशेने मोटरसायकलवरून प्रवास करत होते. त्याचवेळी पाठीमागून वेगाने आलेल्या एका डंपरने त्यांच्या मोटरसायकलला मागून धडक दिली. ही धडक इतकी जोरदार होती की, मोटरसायकलवर मागे बसलेल्या नंदिनी दोलतडे या खाली पडल्या आणि दुर्दैवाने त्या थेट डंपरच्या चाकाखाली सापडल्या. या भीषण अपघातात नंदिनी दोलतडे यांचा जागीच मृत्यू झाला. या अपघातात मनोज दोलतडे हे जखमी झाले. त्यांना तातडीने मिरज शासकीय रुग्णालयात दाखल करण्यात आले असून त्यांच्यावर उपचार सुरू आहेत.
पोलिसांची तातडीची कारवाई
या घटनेची माहिती मिळताच मिरज शहर पोलीस तात्काळ घटनास्थळी दाखल झाले. पोलिसांनी घटनास्थळाचा पंचनामा केला. त्यानंतर, नंदिनी दोलतडे यांचा मृतदेह शवविच्छेदनासाठी मिरज शासकीय रुग्णालयात पाठवण्यात आला. या संपूर्ण घटनेची नोंद मिरज शहर पोलिसात करण्यात आली असून पोलीस या प्रकरणाचा अधिक तपास करत आहेत. अपघाताचे नेमके कारण शोधण्याचा प्रयत्न पोलीस करत आहेत. या अपघातात एका महिलेला आपला जीव गमवावा लागल्यामुळे परिसरात हळहळ व्यक्त केली जात आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
