ठाण्यातील घोडबंदर रोडवर भीषण अपघात, डंपरखाली सापडून 21 वर्षांच्या तरुणीच्या शरीराचे दोन तुकडे
ठाण्यातील घोडबंदर रोडवर नागला बंदर परिसरात रविवारी एक भीषण अपघात झाला होता. या अपघातामध्ये 21 वर्षीय तरुणीचा मृत्यू झाला होता. येथील कॅडबरी जंक्शनजवळ ही तरुणी दुचाकीवरुन जात असताना ती डंपरखाली आली आणि तिचा जागेवरच मृत्यू झाला. हा अपघात इतका भीषण होता की, या तरुणीच्या शरीराचे दोन तुकडे झाले होते. गजल टुटेजा असे या तरुणीचे नाव होते. ती घोडबंदर परिसरातील एका सोसायटीत राहत होती. गजल तुटेजा रविवारी रात्री 10 वाजता येथील पेट्रोल पंपाजवळून जात असताना डंपरने तिला चिरडले. गजल ही तिच्या कुटुंबातील एकटी कमावणारी होती. तिच्या मृत्यूमुळे घोडबंदर परिसरात हळहळ व्यक्त केली जात आहे.
या अपघातानंतर स्थानिक नागरिकांकडून घोडबंदर रोडची अवस्था, रस्त्यांची झालेली चाळण आणि वाहतूक कोंडीबद्दल संताप व्यक्त केला जात आहे. गजलचा अपघात झाला त्या नागला बंदर परिसरात डांबरी रस्त्याची अक्षरश: चाळण झाली आहे. येथील रस्ताही प्रचंड वर-खाली आणि येथे खूप खड्डे आहेत. त्यामुळे गजलचे स्कुटीवरील नियंत्रण सुटून ती डंपरखाली गेल्याची शक्यता वाहतूक पोलिसांकडून वर्तविली जात आहे. डंपर अंगावरुन गेल्याने गजलच्या शरीराचे दोन तुकडे झाले होते. गजलच्या
मृतदेहाला कोणीही हात लावण्यासाठी तयार नव्हते. तिचा भाऊ आणि आई घटनास्थळी
आल्यानंतर आईने एका चादरीत गजलचा मृतदेह उचलून रुग्णवाहिकेत ठेवला. तिला
रुग्णालयात नेण्यात आले. मात्र, तिने जागेवरच प्राण सोडले.
'दीदीच्या शरीराचे दोन तुकडे झाले होते'; गजलच्या भावाने सांगितली अंगावर काटा आणणारा प्रसंग
गजल तुटेजा ही ठाण्यातील एका खासगी कंपनीत कामाला होती. तिला वडील नसल्यामुळे घराची जबाबदारी तिच्या खांद्यावर होती. तिच्या घरात आई आणि लहान भाऊ होता. घराचा गाडा ओढण्यासाठी गजल ही नोकरीसोबत पोळीभाजीचा व्यवसायही करायची. प्रचंड कष्ट करुन तिने आपल्या घराचा आर्थिक गाडा रुळावर आणला होता. गजलचा तिच्या लहान भावावर प्रचंड जीव होता. 12 तारखेल अपघाताच्या दिवशी गजलने तिचा भाऊ अक्की याला बाहेर जेवायला जाऊ असे सांगितल होते. मी दोन मिनिटांत घराच्या खाली येतेय, तू खाली ये, आपण मस्त जेवायला जाऊयात, असे गजल म्हणाली होती. त्यानंतर अवघ्या काही मिनिटांतच गजलचा अपघात झाला.गजलचा भाऊ अक्की याने रस्त्यावर पडलेला आपल्या बहिणीचा मृतदेह पाहिला. तो पेट्रोल पंपाजवळ बहिणीची वाट पाहत होता. तेव्हा त्याला रस्त्यावर प्रचंड गर्दी दिसली. तिथे जाऊन पाहिल्यानंतर अक्कीला त्याच्या बहिणीचा मृतदेह दिसला. त्याने सांगितले की, 'मी खाली गेलो, दिदीला खूप फोन लावले, पण तिने फोन उचलला नाही, थोडे पुढे गेलो तेव्हा तिथे गर्दी दिसली मी त्या गर्दीतून वाट काढत गेलो. तेव्हा मला दिसले की, दीदीच्या अंगावरुन डंपर गेला होता तिच्या शरीराचे दोन तुकडे झाले होते. मी लगेच आईला फोन केला', असे अक्की तुटेजा याने सांगितले.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
