Breaking News! राज आणि उद्धव ठाकरेंचं ठरलं, मुंबईसह 4 शहरात एकत्र लढणार, संजय राऊतांकडून घोषणा
नाशिक: मराठी भाषेच्या मुद्द्यावर शिवसेना उद्धव बाळासाहेब ठाकरे पक्षाचे प्रमुख उद्धव ठाकरे आणि मनसे अध्यक्ष राज ठाकरे हे दोन बंधू एका मंचावर आल्यानंतर आता दोन्ही पक्षांच्या राजकीय युतीची बोलणी हळूहळू पुढे सरकू लागली आहेत. राज्यात काही महिन्यांत होणाऱ्या स्थानिक स्वराज्य संस्थांच्या निवडणुका हे दोन्ही पक्ष एकत्र लढवण्याची शक्यता वर्तवली जात असताना आज नाशिकमध्ये बोलताना ठाकरेंच्या शिवसेनेचे नेते आणि खासदार संजय राऊत यांनी मोठी घोषणा केली आहे. मुंबई महानगरपालिकेची निवडणूक तर आम्ही एकत्र लढूच, पण त्याशिवाय इतरही अनेक शहरांत आमची युती होईल, अशी घोषणा खासदार राऊत यांनी केली आहे.
शिवसेना उद्धव बाळासाहेब ठाकरे आणि मनसे या युतीबद्दल बोलताना संजय राऊत म्हणाले की, "मुंबई महानगरपालिका ही उद्धव ठाकरे आणि राज ठाकरे हे ठाकरे बंधू एकत्र येऊन जिंकणार आहेत. नाशिकमध्येही आम्ही एकत्र लढू. यासह ठाणे, कल्याण-डोंबिवली या महानगर पालिकांच्या निवडणुका आम्ही एकत्र लढू. अशा अनेक महानगरपालिका आहेत जिथं आमची एकत्र लढण्याबाबत चर्चा सुरू आहे. उद्धव ठाकरे आणि राज ठाकरे यांची ताकद ही मराठी माणसाच्या एकजुटीची ताकद आहे. आता कोणतीही अघोरी शक्ती आली तरी मराठी माणसाची ही वज्रमूठ तोडू शकत नाही," असा विश्वास संजय राऊत यांनी व्यक्त केला आहे.
पंतप्रधान मोदींवर घणाघात
संजय राऊत यांनी यावेळी पंतप्रधान नरेंद्र मोदी यांच्यावरही जोरदार टीका केली आहे. "आपला देश 2014 साली स्वतंत्र झालाय, असं काही लोकांना वाटतं. पण देश 2014 नंतर खड्ड्यात गेला आहे. देशाच्या आजपर्यंतच्या प्रत्येक पंतप्रधानांनी काहीतरी योगदान दिलंय. पण भाजपने हा धार्मिक असलेला देश धर्मांध केला आहे. ही धर्मांधता आता देशात जातीय आणि धार्मिक फूट पाडत आहे आणि आपल्या देशाच्या स्वातंत्र्याला ते अत्यंत घात आहे," असा हल्लाबोल संजय राऊत यांनी केला आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
