महाशक्तीलाही वरचढ राजकारण; 13 आमदार गळाला, आणखीही फोडण्याची तयारी; 'ऑपरेशन तीर' सुरु
२०२२ मध्ये शिवसेना, २०२३ मध्ये राष्ट्रवादी काँग्रेस यांच्यानंतर आता आणखी एक प्रादेशिक पक्ष फुटीच्या उंबरठ्यावर आहे. घराणेशाहीवर चालणारा पक्ष दुभंगण्याची शक्यता निर्माण झाली आहे. त्यासाठी सत्ताधारी पक्षानं आक्रमक राजकारण सुरु केलं आहे.
शिवसेनेत फूट, ठाकरे सरकार कोसळलं
२०२२ मध्ये महाराष्ट्राच्या राजकारणात भूकंप झाला. एकनाथ शिंदे यांनी शिवसेनेच्या इतिहासातील सर्वात मोठं बंड फडवलं. त्यांच्या बंडामुळे उद्धव ठाकरेंच्या नेतृत्त्वातील महाविकास आघाडीचं सरकार कोसळलं. ठाकरे मुख्यमंत्री असताना त्यांचाच पक्ष फुटला. शिंदे यांनी भाजपच्या साथीनं सरकार स्थापन केलं.
सेनेपाठोपाठ राष्ट्रवादी काँग्रेसची शकलं
२०२३ मध्ये म्हणजेच वर्षभरानंतर अजित पवारांनी बंड केलं आणि राष्ट्रवादी काँग्रेस पक्ष दुभंगला. राज्याच्या राजकारणात या घडामोडींनी भूकंप उघडला. वर्षभरात दोन प्रादेशिक फुटले आणि राज्याचं राजकारण बदललं. आपल्यामागे महाशक्ती असल्याचं एकनाथ शिंदे यांनी सेनेच्या इतिहासातील सगळ्यात मोठं बंड करताना सांगितलं होतं.
आणखी एक प्रादेशिक पक्ष फुटीच्या उंबरठ्यावर
शिवसेना आणि राष्ट्रवादी काँग्रेस यांच्यानंतर आणखी एक प्रादेशिक पक्ष फुटीच्या उंबरठ्यावर आहे. विशेष म्हणजे या पक्षदेखील कुटुंब केंद्रीत आहे. बिहार विधानसभा निवडणुकीतील दारुण पराभवानंतर लालू प्रसाद यादव यांच्या राजदमध्ये मोठी फूट पडण्याची शक्यता आहे. विशेष म्हणजे या फुटीमागे महाशक्ती नाही.
जेडीयूचं ऑपरेशन तीर सुरु
दहाव्यांदा मुख्यमंत्री झालेल्या नितीश कुमार यांच्या संयुक्त जनता दलानं ऑपरेशन तीर हाती घेतलं आहे. राजदसोबतच काँग्रेस, एमआयएम, बसपमध्येही फूट पाडण्याचे प्रयत्न सुरु आहेत. राजदचे २५ पैकी १३ आमदार पक्षाला सोडचिठ्ठी देण्याच्या तयारीत आहेत. पण पक्षबदल कायद्यापासून वाचण्यासाठी आणखी आमदारांना गळाला लावण्याचे प्रयत्न सुरु आहेत.
दोन तृतीयांश आमदार गळाला लागणार?
पक्षबदल कायद्यानुसार, दोन-तृतीयांश आमदार फुटणं आवश्यक आहे. अन्यथा आमदारकी रद्द होऊ शकते. राजदचे १९ आमदार फुटल्यास जेडीयूसाठी अडचणीचा विषय नसेल. त्यामुळे आणखी ६ आमदारांना गळाला लावण्यासाठी जेडीयू प्रयत्न करत आहे.
जेडीयूकडून ६ मंत्रीपदं रिक्त
बिहारमध्ये एकूण ३६ मंत्रीपदं आहेत. पण मुख्यमंत्र्‍यांसह केवळ २७ जणांचा शपथविधी झाला आहे. ऑपरेशन तीरच्या माध्यमातून फोडाफोड सुरु असल्यानं जेडीयूच्या आमदारांचा आकडा वाढू शकतो. त्यामुळे जेडीयूं त्यांच्या कोट्यातली ६ मंत्रीपदं रिक्त ठेवली आहेत.
...तर जेडीयू मोठा भाऊ ठरणार
सध्याच्या घडीला भाजपचे ८९, तर जेडीयूचे ८५ आमदार आहेत. राजदमध्ये पद्धतशीर फूट पडल्यास जेडीयू १०० च्या पलीकडे जाईल. बिहारमधील सगळ्यात मोठा पक्ष ठरेल. २०२० पासून भाजप एनडीएमध्ये मोठा भाऊ आहे. पण ऑपरेशन तीर यशस्वी झाल्यास जेडीयू भाजपला मागे टाकेल.
राजदचं विरोधी पक्षनेतेपद जाणार?
विधानसभा निवडणुकीतील पराभवानंतर राजद संकटात सापडला आहे. लालू प्रसाद यादव यांच्या कुटुंबात रणकंदन सुरु आहे. त्यातच पक्ष फूट झाल्यास विधानसभेत राजदला विरोधी पक्षनेतेपदही मिळणार नाही. विरोधी पक्षनेतेपद मिळवण्यासाठी विधानसभेत किमान २४ आमदार असणं गरजेचं आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
