कोल्हापुरात प्रसुतीनंतर डिस्चार्ज घेऊन घरी जाताना अपघात, बाळंतीणचा मृत्यू, सात दिवसांचं बाळ जखमी, PI ची तडकाफडकी बदली
कोल्हापूर: गडहिंग्लज-चंदगड राज्यमार्गावर कानडेवाडी येथे झालेल्या भीषण अपघातानंतर नेसरी पोलीस ठाण्यातील सहाय्यक पोलीस निरीक्षक आबा गाढवे यांची कोल्हापूर पोलिस अधीक्षकांनी तडकाफडकी बदली केली आहे.
बाळंतपणानंतर घरी जाणाऱ्या सुवर्णा राहुल कुंदेकर (वय 29, रा. अडकूर, ता. चंदगड) यांचा या अपघातात मृत्यू झाला. त्यानंतर ग्रामस्थांनी पोलिसांवर संशयित चालकाला संरक्षण दिल्याचा आरोप करत आक्रमक आंदोलन केले. या तणावपूर्ण प्रसंगाने उफाळलेल्या संतापामुळे पोलिस प्रशासनाने घाईघाईने कारवाई करत गाढवे यांची पोलीस कंट्रोल रूमला रवानगी केली.
कारवाईऐवजी पोलिसांकडून संरक्षण मिळाल्याचा आरोप
गुरुवारी दुपारी नेसरीहून अडकूरकडे जाणाऱ्या राहुल कुंदेकर (वय 32) यांच्या मोटारीला (एमएच 04 डीएम 3749) चंदगडहून नेसरीकडे येणाऱ्या स्वप्निल रानगे (राहणार चंदगड) यांच्या मोटारीने (एमएच 09 जीए 7515) समोरासमोर धडक दिली. रानगे हे चंदगड नगरपंचायतीतील कर निर्धारण अधिकारी आहेत. या धडकेत सुवर्णा यांच्यासह त्यांचा सात दिवसांचा नवजात बाळ, दोन वर्षांचा रुद्र आणि आरती भाबर (वय 60, रा. हलकर्णी) असे चार जण जखमी झाले. सुवर्णा यांचा कोल्हापूर रुग्णालयात मृत्यू झाला, तर इतरांची गडहिंग्लजमधील दवाखान्यांत प्रकृती स्थिर आहे. ग्रामस्थांच्या मते, अपघातानंतर नेसरी पोलिसांनी संशयित रानगे याला तात्काळ अटक न करता संरक्षण दिले. यामुळे हजारो अडकूरकरांनी मृतदेह पोलिस ठाण्यासमोर ठेवून मोर्चा काढला आणि एका गाडीला आग लावली.
आंदोलनाचा उद्रेक आणि पोलिसी हस्तक्षेप
अपघातानंतर माजी उपनगराध्यक्ष महेश कोरी आणि संग्राम कुपेकर यांनी जखमींना वाहनातून बाहेर काढून 108 रुग्णवाहिका बोलावली. मात्र, पोलिसांची कारवाई रखडल्याने ग्रामस्थांनी 'रानगे हजर करा, गाढवे निलंबित करा' अशा घोषणा देत पोलिस ठाण्यावर मोर्चा काढला. गडहिंग्लज उपविभागीय पोलिस अधिकारी रामदास इंगवले आणि चंदगड पीआय विश्वास पाटील यांनी पोलिस बळ सतर्क केले.
चंदगडच्या आमदारांची घटनास्थळी धाव
या संकटकाळात आमदार शिवाजी पाटील यांनी घटनास्थळी धाव घेतली. त्यांनी गाढवे यांच्यावर कारवाई आणि रानगे याला गडहिंग्लज कोर्टात हजर करण्याची हमी दिली. यानंतर ग्रामस्थ शांत झाले आणि अडकूर येथे सुवर्णा यांच्यावर अंत्यसंस्कार झाले. कोल्हापूर पोलीस अधीक्षक योगेश कुमार गुप्ता यांनी तात्काळ गाढवे यांची बदली करून प्रकरण शांत केले.नेसरी पोलिसांकडून अपघाताची नोंद करण्यात आली असून, रानगे यांच्यावर गुन्हा दाखल करण्यात आला आहे. जिल्हा पोलिस प्रशासनाने वाहनचालकांना सावधगिरी बाळगण्याचे आवाहन केले आहे. तर "या अपघाताची आम्ही अधिक चौकशी करत असून आरोपीला शिक्षा नक्कीच मिळेल, नागरिकांनी थोडा संयम बाळगावा." अशी प्रतिक्रिया पोलीस अधीक्षक योगेश कुमार गुप्ता यांनी दिली आहे.दरम्यान, या प्रकरणाने स्थानिक राज्यमार्गावरील सुरक्षा आणि पोलिस कारवाईची निष्पक्षता यांच्यावर प्रश्नचिन्ह उपस्थित झाले आहे. मात्र, या प्रकरणी तपासात नेमक्या कोणकोणत्या गोष्टी समोर येतात, हे देखील पाहणं महत्त्वाचं ठरणार आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
