सांगली दर्पण Exclusive! राज्य उत्पादन शुल्क विभागाचा धक्कादायक कारभार: पीडित महिला कर्मचारी अजूनही 'प्रवीण अण्णा'च्या दहशतीखाली, वरिष्ठांनी तक्रार दाबल्याने जनतेतून संताप!
सांगली :- महिला सुरक्षेच्या आणि सक्षमीकरणाच्या गप्पा मारणाऱ्या शासकीय विभागांमध्ये प्रत्यक्षात महिला कर्मचाऱ्यांनाच मानसिक त्रासाला आणि दहशतीला सामोरे जावे लागत असल्याचा संतापजनक प्रकार राज्य उत्पादन शुल्क विभागात समोर आला आहे. येथील एका महिला कर्मचाऱ्याने 'प्रवीण अण्णा' नावाच्या व्यक्तीविरोधात गंभीर स्वरूपाची लेखी तक्रार देऊन तब्बल सहा महिने उलटले, तरीही ढिम्म प्रशासनाने यावर कोणतीही कारवाई केलेली नाही. उलट या गंभीर तक्रारीला केराची टोपली दाखवून वरिष्ठांनी संबंधित संशयिताला एकप्रकारे मूक संमती दिल्याचा आरोप आता होऊ लागला आहे.
तक्रार देऊन ६ महिने झाले, तरी साधी चौकशीही नाही!
मिळालेल्या माहितीनुसार, राज्य उत्पादन शुल्क विभागातील एका महिला कर्मचाऱ्याने कार्यालयातील 'प्रवीण अण्णा' याच्या त्रासाला कंटाळून वरिष्ठांकडे रीतसर लेखी तक्रार दाखल केली होती. शासकीय नियमांनुसार महिला छळवणुकीच्या तक्रारींवर तत्परतेने समिती गठीत करून चौकशी होणे बंधनकारक आहे. मात्र, या प्रकरणात या नियमांना केराची टोपली दाखवण्यात आली आहे. सहा महिने झाले तरी पीडित महिलेला साधे बोलावून विचारण्याची तसदीही वरिष्ठांनी घेतलेली नाही. या उदासीनतेमुळे पीडित महिला कर्मचारी आजमितीसही त्या प्रवीण अण्णाच्या मानसिक दहशतीखाली वावरत आहे.
वरिष्ठांचे 'प्रवीण अण्णा'वर प्रेम का?
एकीकडे पीडित महिला न्यायाच्या प्रतीक्षेत अपमानित आयुष्य जगत असताना, दुसरीकडे मात्र संशयित प्रवीण अण्णा राजरोसपणे कार्यालयात वावरत आहे. त्यामुळे "वरिष्ठांचा या प्रवीण अण्णावर असा कोणता विशेष आशीर्वाद आहे?" असा थेट प्रश्न आता उपस्थित होत आहे. गंभीर तक्रार असतानाही त्याला वाचवण्याचा प्रयत्न विभागातील मोठे अधिकारी का करत आहेत, याबाबत आता संशयाचे धुके गडद झाले आहे.
जनतेतून संतप्त सवाल: 'त्याची' गच्छंती कधी होणार?
शासकीय कार्यालयातच जर महिला कर्मचारी सुरक्षित नसतील आणि त्यांच्या तक्रारींची अशी वासलात लावली जात असेल, तर सामान्य महिलांनी न्याय कोणाकडे मागायचा? हा प्रश्न आता सामान्य जनतेला पडला आहे.पीडित महिला कर्मचाऱ्याला न्याय मिळणार का?तक्रार दाबणाऱ्या संबंधित वरिष्ठ अधिकाऱ्यांवर कारवाई होणार का?या मुजोर 'प्रवीण अण्णा'ची या कार्यालयातून तात्काळ हाकलपट्टी (गच्छंती) होणार का?हे प्रश्न सध्या अनुत्तरित असून, राज्य उत्पादन शुल्क विभागाच्या या संशयास्पद भूमिकेमुळे संपूर्ण सांगली जिल्ह्यात आणि प्रशासकीय वर्तुळात तीव्र संताप व्यक्त केला जात आहे. जर यावर तात्काळ योग्य पाऊल उचलले गेले नाही, तर हे आंदोलन अधिक आक्रमक होण्याची शक्यता वर्तवली जात आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
