काळजाचा थरकाप! रात्री झोपेतच एसीचा भीषण स्फोट; धुराचे लोट पसरून निवृत्त IES अधिकाऱ्याचा गुदमरून दुर्दैवी मृत्यू
नवी दिल्ली : दिल्लीतील हौझ खास येथील निवासस्थानी आग लागल्यामुळे निवृत्त आयएएस अधिकारी धनेंद्र कुमार यांचे निधन झाल्याची दुर्दैवी घटना समोर आली आहे. प्राथमिक तपासानुसार एसीच्या स्फोटामुळे आगीचा भडका उडाला. या घटनेच्या वेळी घरात पाच जण उपस्थित होते. धनेंद्र कुमार यांचा मुलगा सध्या रुग्णालयात उपचार घेत आहे.
दिल्ली अग्निशमन दलाच्या माहितीनुसार, हौझ खास एन्क्लेव्ह येथील एका घरात आग लागल्याची माहिती रात्री ११:२४ वाजता मिळाली. त्यानंतर, पाण्याचा टँकर असलेल्या अग्निशमन दलाच्या दोन गाड्या तात्काळ घटनास्थळी रवाना करण्यात आल्या.
तीन मजली घराला मध्यरात्री आग
अधिकाऱ्यांनी दिलेल्या माहितीनुसार, मध्यरात्री १२:२० वाजताच्या सुमारास आगीवर नियंत्रण मिळवण्यात आले. या आगीने तळ मजल्यावर ठेवलेल्या घरगुती वस्तू, तसेच 'ग्राउंड-प्लस-टू' (तीन मजली) इमारतीच्या पहिल्या मजल्यावर बसवलेल्या लाकडी खिडक्यांना आपल्या विळख्यात घेतले होते.
धुरात गुदमरुन मृत्यू
अग्निशमन दलाचे जवान घटनास्थळी पोहोचण्यापूर्वीच, पीसीआर कर्मचारी आणि स्थानिक नागरिकांच्या मदतीने दोन जखमींना 'एम्स'च्या ट्रॉमा सेंटरमध्ये दाखल करण्यात आले होते. धुरात गुदमरल्यामुळे धनेंद्र कुमार यांचा उपचारादरम्यान मृत्यू झाला. त्यांचा मुलगा सध्या उपचार घेत आहे.
एसीच्या इनडोअर युनिटमध्ये स्फोट
पोलिसांनी दिलेल्या माहितीनुसार, गुन्हे अन्वेषण पथकाने घटनास्थळाची पाहणी केली आहे. घरामध्ये बसवलेल्या वातानुकूलित यंत्राच्या 'इनडोअर युनिट'मध्ये झालेल्या स्फोटामुळे ही आग लागली असावी, असे प्राथमिक तपासावरुन सूचित होते. घटनेच्या वेळी कुटुंबातील सदस्य आणि नोकर असे एकूण पाच जण त्या निवासस्थानी उपस्थित होते. घरातील विद्युत उपकरणांची तपासणी केली जात आहे. प्रत्यक्षदर्शींचे जबाब नोंदवून घेण्यात आले असून, आतापर्यंत यामध्ये कोणत्याही प्रकारचा घातपात किंवा कट असल्याचा संशय समोर आलेला नाही.
कोण होते धनेंद्र कुमार?
हरियाणा केडरचे १९६८ च्या तुकडीतील आयएएस अधिकारी धनेंद्र कुमार हे ८० वर्षांचे होते. त्यांनी जागतिक बँकेत कार्यकारी संचालक म्हणूनही काम केले होते. याव्यतिरिक्त, ते 'भारतीय स्पर्धा आयोगाचे' पहिले अध्यक्ष राहिले होते. सीसीआय ही एक सरकारी संस्था आहे, जी कोणतीही कंपनी आपल्या बाजारातील वर्चस्वाचा गैरवापर करणार नाही, याची खात्री बाळगते. सीसीआयची स्थापना २००३ मध्ये करण्यात आली होती. मे २००९ मध्ये हे आयोग पूर्णपणे कार्यान्वित झाले.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
