धोक्याची घंटा: मुंबईवर एकाच वेळी चार विषाणूंचे संकट! कोरोना, H1N1, इन्फ्लूएंझा आणि RSV चा वेगाने प्रसार.
मुंबई: राज्यातील नागरिकांच्या आरोग्याबाबत एक मोठे आव्हान उभे राहिले आहे. मुंबई शहरात एकाच वेळी कोरोना (Covid-19), स्वाइन फ्लू (H1N1), इन्फ्लूएंझा-A आणि रेस्पिरेटरी सिन्सिशिअल व्हायरस (RSV) या चार वेगवेगळ्या विषाणूंचा वेगाने प्रसार होत आहे.
शहरातील सरकारी आणि खाजगी रुग्णालयांमध्ये तीव्र ताप आणि श्वसनाच्या त्रासामुळे येणाऱ्या रुग्णांची गर्दी लक्षणीयरीत्या वाढली आहे. आरोग्य तज्ज्ञांच्या मते, यंदाचा लांबलेला मान्सून आणि हवेतील वाढलेली दमट आर्द्रता या विषाणूंच्या वाढीस कारणीभूत ठरत आहे. दमट हवामानामुळे हे विषाणू वातावरणात जास्त काळ टिकून राहत आहेत. ब्रीच कँडीसारख्या मोठ्या रुग्णालयांमध्ये दररोज कोरोना किंवा स्वाइन फ्लूचे सरासरी 7 पेक्षा जास्त रुग्ण आढळत आहेत.
हे सर्व विषाणू सारखीच लक्षणे दाखवत असल्याने, नेमका आजार कोणता हे ओळखणे कठीण झाले आहे. रुग्णांना 102 ते 103 डिग्री फॅरेनहाइट ताप, प्रचंड अंगदुखी आणि छातीत कफ होणे अशा समस्या जाणवत आहेत. यासाठी आता केवळ लक्षणांवर अवलंबून न राहता ‘पीसीआर पॅनेल’ चाचण्यांचा वापर केला जात आहे.जरी सध्याचा कोरोनाचा प्रकार सौम्य असला, तरी ज्येष्ठ नागरिक, गर्भवती महिला आणि जुनाट आजार असलेल्या रुग्णांसाठी हा काळ धोक्याचा आहे. एकाच वेळी दोन विषाणूंचा संसर्ग झाल्यास फुफ्फुसांवर विपरीत परिणाम होऊ शकतो.या परिस्थितीवर नियंत्रण मिळवण्यासाठी डॉक्टरांनी काही महत्त्वाचा सल्ला दिला आहे:डॉक्टरांच्या सल्ल्याशिवाय कोणतीही अँटीबायोटिक्स किंवा पॅरासिटामॉल घेऊ नका, अन्यथा शरीरात औषधांविरोधी प्रतिकारशक्ती तयार होऊ शकते. गर्दीच्या ठिकाणी जाताना मास्कचा वापर करा आणि वारंवार हात स्वच्छ धुवा. घरात रुग्ण असल्यास पल्स ऑक्सिमीटरने ऑक्सिजन पातळी तपासा आणि श्वास घेण्यास त्रास झाल्यास त्वरित तज्ज्ञांशी संपर्क साधा. घरगुती उपाय करण्याऐवजी डॉक्टरांचे मार्गदर्शन घेणे कधीही सुरक्षित ठरेल.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
