मुंबई :- महाराष्ट्र सरकारने शुक्रवारी राज्यातील सर्व शाळांच्या ५०० मीटर परिसरात स्टिंग एनर्जी ड्रिंक तसेच इतर कोणत्याही नशायुक्त पदार्थांच्या विक्रीवर पूर्णपणे बंदी घालण्याची घोषणा केली.
या पेयामध्ये असलेल्या काही घटकांबाबत व्यक्त करण्यात आलेल्या चिंतेच्या पार्श्वभूमीवर हा निर्णय घेण्यात आला असून, हे घटक मुलांच्या आरोग्यासाठी हानिकारक असल्याचे मानले जाते.
अन्न व औषध प्रशासन मंत्री नरहरी झिरवळ यांनी इशारा देत सांगितले की, शाळांच्या परिसरात स्टिंग एनर्जी ड्रिंकच्या विक्रीबाबत माननीय सदस्यांनी व्यक्त केलेली चिंता मोठ्या प्रमाणात योग्य आहे. कोणत्याही शाळेच्या ५०० मीटर परिसरात स्टिंग एनर्जी ड्रिंक किंवा इतर कोणत्याही नशायुक्त पदार्थांची विक्री होत असल्याचे आढळल्यास संबंधितांवर तात्काळ आणि कठोर कारवाई करण्यात येईल.
चर्चेदरम्यान आमदार विक्रम पाचपुते यांनी सरकारला १८ वर्षांखालील मुलांना एनर्जी ड्रिंक्सची विक्री करण्यास बंदी घालण्यासाठी नवीन नियम आणण्याबाबतही विचारणा केली. याशिवाय, आमदार राहुल कुल आणि आमदार वरुण सरदेसाई यांनीही मुलांना अशा पेयपदार्थांची सहज उपलब्धता रोखण्यासाठी सरकारने आणखी कठोर उपाययोजना कराव्यात, अशी मागणी केली. यावर उत्तर देताना मंत्री नरहरी झिरवळ यांनी सरकार प्रस्तावित निर्बंधांची प्रभावी अंमलबजावणी करेल, तसेच शाळा स्तरावरील जनजागृती मोहिमा अधिक बळकट करून विद्यार्थ्यांना एनर्जी ड्रिंक्सच्या दुष्परिणामांविषयी योग्य माहिती दिली जाईल, असे आश्वासन दिले.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
