नागरीकांसाठी पाणी नाही आणि आमदारांच्या कारसाठी फायर ब्रिगेड! भाजप आमदार रामनिवास शाह यांचा बेताल सवाल - "गाडी काय आमदार धुतात का?"
काही आमदार, खासदारांचा थाट पाहून डोळे विस्फारतात. अशाच एका आमदाराचा थाट समोर आला आहे. आपल्या मालकीची कार धुवण्यासाठी या आमदारांनी चक्क फायर ब्रिगेडला कामाला लावले. एवढेच नाही तर यावरून टीका होऊ लागताच त्यांनी टीकाकारांची थेट लायकीच काढली. गाडी काय आमदार धुवतात का?, असे सांगायलाही ते विसरले नाहीत.
मध्य प्रदेशातील सिंगरौली मतदारसंघाचे भाजपचे आमदार रामनिवास शाह यांचा हा थाट कॅमेरात कैद झाला आहे. हा व्हिडिओ सोशल मीडियात व्हायरल झाला असून त्यावरून टीकेची झोड उठली आहे. फायर ब्रिगेड ही आपत्कालीन सेवा आहे. असे असताना आमदारांकडून त्याचा वापर खासगी कामासाठी तोही कार धुवायला केला जात असल्याने नागरीक संताप व्यक्त करत आहेत.
व्हिडिओ व्हायरल झाल्यानंतर याबाबत मीडियाने आमदार शाह यांच्याकडे विचारणा केली. त्यावर त्यांनी हा विषय उचलून धरणाऱ्या लोकांची लायकी काय आहे, असे सांगत एकप्रकारे आपण काही चुकीचे केले नाही, यावर शिक्कामोर्तब केले. गाडी काय आमदार धुवतात का, असे म्हणत त्यांनी कहरच केला. शाह यांच्यावर काँग्रेससह सर्वच विरोधी पक्षांकडून टीका केली जात आहे. त्यावरूनही शाह यांना काँग्रेसवर पलटवार केला.
काँग्रेसने सोशल मीडियात पोस्ट करत म्हटले आहे की, काहीवेळा काही भाजपचे नेते जनतेला भाडे का टट्टू म्हणतात, तर यांच्यासारखे आमदार जनतेचा अशाप्रकारे अपमान करत आहेत. जनतेला लुटा, मजा करा आणि कुणी प्रश्न विचारला तर त्यांना शिव्या द्या, हा भाजप नेत्यांचा फंडा असल्याची टीका काँग्रेसने केली आहे.आमदार शाह यांनी खुलासा करताना सांगितले की, मीही व्हिडिओ पाहिला आहे. आमदार किंवा खासदार आपली गाडी स्वत: धुवत नाही. चालकाने सांगितले की, फायर ब्रिगेडची गाडी महापौरांच्या घरी पाणी भरण्यासाठी आली होती. त्याचवेळी माझी गाडी तिथे उभी होती. यावेळी चालकाने थोडे पाणी मारले. मी चालकाला याबाबत खडसावले आहे, असे पुन्हा करू नये.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
