मुंबईतील ताडदेव परिसरात एका गृहनिर्माण संस्थेत (सोसायटी) 'नॉनव्हेज' खाण्यावरून निर्माण झालेल्या वादात महाराष्ट्र नवनिर्माण सेनेने (मनसे) नेहमीप्रमाणे आक्रमक भूमिका घेत उडी घेतली खरी, परंतु या प्रकरणातील मूळ तथ्ये समोर आल्यानंतर मनसेची मोठी अडचण झाली आहे. रोजच्या जगण्यातील नागरी समस्या बाजूला ठेवून केवळ खाण्यापिण्याच्या आणि आहाराच्या वादात राजकीय फायदा शोधणाऱ्या मनसेच्या या 'स्टंटबाजी'वर आता तीव्र टीका होत आहे.
काय आहे नेमका प्रकार?
ताडदेव येथील एका सोसायटीत घर विक्रीच्या जाहिरातीवरून वाद निर्माण झाला होता. मराठी माणसावर अन्याय होत असल्याचा दावा करत मनसेच्या कार्यकर्त्यांनी संबंधित इस्टेट एजंटच्या कार्यालयाच्या बोर्डाला कोंबडीच्या पायाचा हार घालून निषेध नोंदवला आणि जोरदार ड्रामा केला. मात्र, या संपूर्ण प्रकरणात असा ट्विस्ट आला की मनसेच्या सैनिकांवरच तोंडावर पडण्याची वेळ आली आहे.
प्रकरणातील मूळ तथ्ये:
घर विकणारा मराठी: ज्या व्यक्तीला आपले घर विकायचे होते, ती व्यक्ती मराठी असून एका निष्ठावंत वारकरी कुटुंबातील आहे.
विकत घेणाराही मराठी: ज्या ग्राहकाने हे घर खरेदी केले आहे, तोही मराठीच आहे.
खाजगी अट व परस्पर संमती: वारकरी परंपरेचे पालन करणाऱ्या मूळ मराठी घरमालकाची आपली मालमत्ता नॉनव्हेज न खाणाऱ्या व्यक्तीलाच विकण्याची स्वतःची इच्छा होती. खरेदीदार मराठी व्यक्तीने ही अट पूर्णपणे मान्य केली आणि नियमांनुसार हा व्यवहार पूर्ण झाला.
एजंटही मराठी: ज्या इस्टेट एजंटने या व्यवहाराची जाहिरात केली, तोही मराठीच आहे.
मराठी माणसावर अन्याय कुठे अन् धोक्यात कोण?
जेव्हा घर विकणारा मराठी, घेणारा मराठी आणि मध्यस्थी करणारा एजंटही मराठीच आहे, तसेच खरेदी-विक्रीचा व्यवहार दोघांच्या परस्पर संमतीने पार पडला आहे, तेव्हा या संपूर्ण घडामोडीत 'मराठी माणसावर अन्याय' नेमका कुठे झाला? असा थेट सवाल आता उपस्थित केला जात आहे. वैयक्तिक आचार-विचार आणि धार्मिक श्रद्धेपोटी घेतलेल्या निर्णयाला राजकीय वळण देऊन विनाकारण वातावरण तापवण्याचा प्रयत्न मनसेकडून झाल्याचे स्पष्ट दिसत आहे.
नागरी प्रश्न सोडवण्याऐवजी भलत्याच वादात रस
मुंबईकरांनी लोकप्रतिनिधी आणि पक्षांकडून रस्ते, पाणी, पायाभूत सुविधा आणि रोजच्या जगण्याच्या समस्यांवर काम करण्याची अपेक्षा ठेवली आहे. परंतु, थेट जनहितार्थ कामांकडे लक्ष देण्याऐवजी केवळ खाण्यापिण्याच्या वादावरून आंदोलने उभारण्याच्या या प्रकारामुळे "घेणं ना देणं आणि फुकटचं कंदिल लावून येणं" अशीच काहीशी अवस्था मनसेची झाली आहे.
मराठीच्या नावाने केवळ राजकीय नौटंकी न करता, पक्षाच्या सैनिकांनी आणि नेत्यांनी सामान्य मुंबईकरांच्या खऱ्या समस्यांवर लक्ष केंद्रित करावे, असा सूर आता नागरिकांमधून व्यक्त होत आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
