खोटी साखर दाखवून कर्ज घेणाऱ्या कारखानदारांची गोदामे १८ तारखेनंतर तपासणार: आ. गोपीचंद पडळकर
सांगली :-"कागदावर खोटी साखर दाखवून साखर कारखानदारांनी जिल्हा बँकेकडून कोट्यवधी रुपयांची कर्जे उचलली आहेत. १८ तारखेला जिल्हा बँकेच्या अध्यक्ष आणि उपाध्यक्षांची निवड झाल्यानंतर, मी स्वतः बँकेच्या व्यवस्थापकीय संचालकांना (एम.डी.) सोबत घेऊन या सर्व साखर कारखान्यांच्या गोदामांची प्रत्यक्ष तपासणी करणार आहे," असा थेट इशारा भाजप आमदार गोपीचंद पडळकर यांनी दिला आहे.
सांगली जिल्हा मध्यवर्ती सहकारी बँकेच्या निवडणुकीत विजयी झाल्यानंतर एका जाहीर कार्यक्रमात बोलताना आमदार पडळकर यांनी कारखानदारांच्या कारभारावर जोरदार निशाणा साधला.
काय म्हणाले आमदार गोपीचंद पडळकर?
जिल्हा बँकेच्या नुकत्याच पार पडलेल्या निवडणुकीत गोपीचंद पडळकर हे निवडून आले आहेत. या विजयानंतर बोलताना त्यांनी साखर कारखान्यांच्या कर्ज प्रकरणावरून गंभीर आरोप केले. पडळकर यांच्या म्हणण्यानुसार, काही साखर कारखानदारांनी गोदामात साखरेचा साठा असल्याचे भासवून बँकेकडून भरमसाठ कर्जे घेतली आहेत. येत्या १८ तारखेला सांगली जिल्हा मध्यवर्ती बँकेच्या अध्यक्ष आणि उपाध्यक्ष पदाची निवड प्रक्रिया पार पडणार आहे.
ही निवड होताच बँकेचे एम.डी. आणि संबंधित अधिकाऱ्यांना सोबत घेऊन संबंधित साखर कारखान्यांवर धडक देणार असल्याचे आणि गोदामातील प्रत्यक्ष साखर साठ्याची मोजणी व तपासणी करणार असल्याचे त्यांनी स्पष्ट केले. आमदार पडळकर यांच्या या भूमिकेमुळे सांगली जिल्ह्यातील सहकार आणि साखर कारखानदारी क्षेत्रात मोठी खळबळ उडाली असून, १८ तारखेनंतर होणाऱ्या या तपासणीकडे सर्वांचे लक्ष लागले आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
.jpeg)
