सांगली :- कवठेमहांकाळ तालुक्यात सासू व सुनेचा संशयास्पद मृत्यू, दोघांची प्रकृती गंभीर
सांगली :- कवठेमहांकाळ तालुक्यातील नांगोळे या गावातील एकाच कुटुंबातील दोन महिलांचा संशयास्पद मृत्यू झाला असून, या कुटुंबातील दोन पुरुषांची प्रकृती गंभीर आहे. या दोघांना पुढील उपचारासाठी मिरज येथील रुग्णालयात दाखल करण्यात आले आहे. सासू रमेजा अल्लाउद्दीन पाटील (वय ४५) व सुन काजल समीर पाटील (वय ३०) या दोघींचा मृत्यू झाला. घटनास्थळी जत व कवठेमहांकाळ विभागाचे उपविभागीय पोलीस अधिकारी सुनील साळुंखे व पोलीस निरीक्षक जोतीराम पाटील यांनी भेट दिली
कवठेमहांकाळ तालुक्यात एकाच कुटुंबातील चार सदस्यांनी विष प्राशन केले असावे असा पोलिसांचा कयास आहे. नांगोळे या गावांमध्ये पाटील कुटुंबीयांचे ढालगाव रस्त्यालगत घर आहे. या घरामध्ये अल्लाउद्दीन पाटील, रमेजा अल्लाउद्दीन पाटील, समीर अल्लाउद्दीन पाटील, काजल समीर पाटील व दोन लहान मुले असे कुटुंबीय राहतात. या घरामध्ये आज सकाळच्या सुमारास पाटील यांच्या कुटुंबातील एका वयस्कर महिलेने घरातील चौघेजण निपचिप पडलेले आहेत हे पाहिल्यानंतर आरडाओरडा करून, शेजारी राहणाऱ्या सर्वांना बोलविले. घटनास्थळी सर्वांनी पाहिले असता चौघेजण निपचिप पडलेले होते.
घटनास्थळी कवठेमहांकाळ पोलीस ठाण्याचे पोलीस निरीक्षक जोतीराम पाटील यांनी भेट दिली असता त्या ठिकाणी चार ग्लास मिळून आले. त्या ठिकाणी लिंबू कापून ठेवलेला आहे त्या ठिकाणी सूरी देखील मिळालेली आहे. तर त्या ठिकाणावर बाजूलाच जनावरांसाठी वापरले जाणारे विषारी औषध देखील पोलिसांना मिळून आलेले आहे. यामुळे या चार जणांनी विषारी औषध प्राशन केले असावे असा प्राथमिक अंदाज वर्तविण्यात येत आहे. तर घरातील समीर पाटील यांची दोन मुले आहेत एक सहा वर्षाचा आहे तर दुसरा सहा महिन्यांचा आहे. या दोघांना मात्र कोणतीही बाधा झालेली नाही दोन्ही मुले सुरक्षित आहेत.घराशेजारी राहणाऱ्या इतर लोकांनी मदत करून सर्वांना कवठेमहांकाळ येथील उपजिल्हा रुग्णालयात उपचारासाठी दाखल करण्यात आले. मात्र या घटनेतील दोन महिलांचा रुग्णालयात दाखल करण्यापूर्वीच मृत्यू झालेला आहे अशी माहिती डॉक्टरांनी दिली. तर या प्रकरणातील अल्लाउद्दीन पाटील व समीर पाटील या दोघांची प्रकृती गंभीर असल्याने त्यांना मिरज येथील शासकीय रुग्णालयात उपचारासाठी पाठविण्यात आले. घटनेची माहिती समजताच उपविभागीय पोलीस अधिकारी सुनील साळुंखे, पोलीस निरीक्षक जोतीराम पाटील यांनी तातडीने कवठेमहांकाळ येथील उपजिल्हा रुग्णालयात प्रथम भेट दिली त्यानंतर नांगोळे गावातील पाटील ज्या ठिकाणी राहतात त्या घराला भेट देऊन पाहणी केली आहे. या प्रकरणाची कवठेमहांकाळ पोलिसांत नोंद झाली असून पोलिस अधिक तपास करीत आहेत.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
