मोदी सरकारला हादरविणाऱ्या प्रकरणातील फास्ट ट्रॅक कोर्टाच्या न्यायाधीशांबाबत मोठी अपडेट; 8 दिवसांतच हटविल्याने खळबळ
मागील काही महिन्यांपासून देशात नीट पेपरफुटीचे प्रकरण गाजत आहे. कॉक्रोच जनता पार्टीच्या आंदोलनानंतर धर्मेंद्र प्रधान यांना केंद्रीय शिक्षणमंत्रिपदाचा राजीनामा द्यावा लागला. त्यानंतर मोदी सरकारने पेपरफुटीची प्रकरणे लवकर निकाली काढण्यासाठी दिल्लीत तातडीने फास्ट ट्रॅक कोर्ट सुरू केले. मात्र, सुनावणीच्या पहिल्याच दिवशी सरकारी वकिलांअभावी प्रकरणाला ब्रेक लागला. त्यानंतर आता मोठी घडामोड समोर आली आहे.
दिल्लीतील फास्ट ट्रॅक कोर्टाच्या न्यायाधीश अनु ग्रोवर बलीगा यांची आठ दिवसांतच बदली करण्यात आली आहे. अचानक झालेल्या बदलीमुळे चर्चांना उधाण आले आहे. फास्ट ट्रॅक कोर्टाची स्थापना झाल्यानंतर मागील आठवड्यातच त्यांच्यावर विशेष न्यायाधीश म्हणून जबाबदारी सोपविण्यात आली होती. आता नव्या आदेशाने त्यांची जबाबदारी बदलण्यात आली आहे.
दिल्ली हायकोर्टाने न्यायाधीश अनु ग्रोवर यांच्यावर एनआयए कोर्टात बदली केली आहे. दिल्लीत राऊज एव्हेन्यू कोर्टातील विशेष एनआयए कोर्टात त्यात दहशतवादाशी संबंधित प्रकरणांवर सुनावणी करतील. दिल्ली हायकोर्टाने त्यांच्यावर अन्य १३८ न्यायाधीशांचीही बदली केली आहे. हे आदेश शनिवारी (ता. १ ऑगस्ट) जारी करण्यात आले. त्यांचे कामकाज ४ ऑगस्टपासून सुरू होईल.
खुद्द पंतप्रधान नरेंद्र मोदी यांनी फास्ट ट्रॅक कोर्टाची घोषणा केली होती. त्यानंतर हायकोर्टाकडून न्यायाधीश बलीगा यांची नियुक्ती करण्यात आली होती. या संवेदनशील प्रकरणात सरकार वेगाने काम करत असल्याची चर्चा असतानाच वकिलांअभावी पहिलीच सुनावणी टाळल्यानंतर विरोधकांनी सरकारला धारेवर धरले होते. आता न्यायाधीशांच्या बदलीने पुन्हा हा मुद्दा तापण्याची शक्यता आहे.
कोण आहेत न्यायाधीश अनु ग्रोवर बलीगा?
न्यायाधीश अनु ग्रोवर बलीगा या मुळच्या दिल्लीच्या असून गणित विषयातून पदवी प्राप्त केली आहे. त्यानंतर त्यांनी कायद्याचे शिक्षण घेत २००० मध्ये दिल्ली न्यायिक सेवेत पहिले पाऊल टाकले. त्यांची सुरूवात तिहार हजारी कोर्टातून दिवाणी न्यायाधीश म्हणून झाली होती. विविध न्यायालयांमध्ये जबाबदारी सांभाळल्यानंतर २०१० मध्ये त्यांची अतिरिक्त जिल्हा न्यायाधीश म्हणून नियुक्ती झाली. संवेदनशील आणि गंभीर प्रकरणांसी संबंधित न्यायालयांमध्ये त्यांनी विशेष न्यायाधीश म्हणूनही काम केले आहे. त्या २०२९ मध्ये सेवानिवृत्त होणार आहेत.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
