मंत्री जयकुमार गोरेंविरोधात एकतर्फी बातम्यातून बदनामी केल्याचा ठपका; 'लय भारी'यूट्यूब चॅनलच्या पत्रकाराला बेड्या
राज्याच्या आर्थिक अधिवेशनाच्या दरम्यान विरोधकांनी केलेल्या भाजप आमदार जयकुमार गोरे यांच्यावरील आरोपानंतर आता राज्यातील राजकीय वातावरण तापलं आहे. ग्रामविकास मंत्री जयकुमार गोरे यांनी बदनामी करणाऱ्या नेत्यांना नोटीस पाठवणार असल्याचं म्हटलं होतं. तर आता 85 हून अधिक एकतर्फी बातम्यातून
बदनामी करण्यात आल्याचा ठपका ठेवत, 'लय भारी' या यूट्यूब चॅनलचे पत्रकार
तुषार खरात यांना मुंबईतून अटक करण्यात आली आहे. तर अटक केल्यानंतर रात्री
उशिरा वडूजयेथील रुग्णालयात तुषार खरात यांची वैद्यकीय चाचणी करण्यात
आलीय. दरम्यान, आज(10 मार्च) वडूज येथील न्यायालयासमोर पत्रकार तुषार खरात
यांना हजर करणार असल्याची माहिती ही समोर आली आहे.
तुषार खरात यांच्यावर अनेक गंभीर गुन्हे
पुढे आलेल्या माहितीनुसार, न्यायालयाने आदेश देऊन देखील ग्रामविकास मंत्री जयकुमार गोरे यांच्या बदनामीच्या एकतर्फी बातम्या दाखवून न्यायालयाचा अवमान केल्याप्रकरणी तुषार खरात यांच्यावर कारवाई करण्यात आलीय. तुषार खरात यांच्यावर वडूज, दहिवडी, म्हसवड, तळबीड, सोलापूर येथील पोलीस ठाण्यात अनेक गंभीर गुन्हे दाखल असल्याची माहिती पुढे आली आहे. यामध्ये ॲट्रॉसिटी, विनयभंग, खंडणी, बदनामी करणे या गुन्ह्यांचा देखील समावेश आहे.
तुषार खरात यांना झालेली अटक म्हणजे सत्तेचा गैरवापर- रोहित पवार
एका महिलेवर झालेल्या अन्यायाला ज्यांनी वाचा फोडली तसंच मागासवर्गीय आणि ओबीसी समाजाच्या जमिनी बळकावणे, कोविडच्या काळात मेडिकल कॉलेजमध्ये भ्रष्टाचार करून मृतांच्या टाळूवरील लोणी खाणे अशी अनेक प्रकरणं चव्हाट्यावर आणली. ते माण खटाव येथील पत्रकार तुषार खरात यांना झालेली अटक म्हणजे सत्तेचा गैरवापर आहे. सरकारची मनमानी खपवून न घेता अशा प्रकारे जनतेच्या हितासाठी निःस्वार्थीपणे लढणाऱ्या प्रामाणिक पत्रकाराचा आवाज कुणी दाबत असेल तर त्यांच्या मागे आम्ही भक्कमपणे उभं राहू. सर्व मिडियाही त्यांच्या पाठीशी राहील, ही अपेक्षा! अशा शब्दात आमदार रोहित पावर यांनी या प्रकरणावर भाष्य केलंय
माझी बदनामी करणाऱ्यांवर अब्रुनुकसानीचा खटला दाखल करणार- जयकुमार गोरे
राज्याचे ग्रामविकास मंत्री जयकुमार गोरे यांच्यावर एका महिलेने गंभीर आरोप केले आहेत. या महिलेने राज्यपाल आणि विरोधी पक्षातील प्रमुख नेत्यांना पत्र पाठवून मदतीची याचना केली होती. दरम्यान या प्रकरणावर प्रत्युत्तर देताना मंत्री जयकुमार गोरे चांगलेच आक्रमक झाले होते. ज्यांना माझ्यावर आरोप केले त्या प्रत्येकावर मी सभागृहात हक्कभंग प्रस्ताव आणणार आहे. तसेच ज्यांनी माझी बदनामी केली त्या संबधितांवर मी अब्रुनुकसानीचा खटला दाखल करणार आहे. मी अजूनही संबंधित महिलेला त्रास देतोय, असा आरोप केला जात आहे. मी या महिलेला त्रास दिला असेल तर पोलिसांनी त्याची चौकशी करावी. या तपासात मी किंवा संबंधित महिला जो कोणी दोषी आढळेल त्याच्यावर कारवाई करावी, असे जयकुमार गोरे यांनी म्हटले होते.2019 मध्ये सातारा जिल्हा सत्र न्यायालयाने या प्रकरणात जयकुमार गोरे यांची निर्दोष मुक्तता केली होती. जे रेकॉर्ड होतं ते देखील हटवण्याचे आदेश दिले होते, अशी माहिती गोरे यांच्या कार्यालयाकडून देण्यात आली आहे. मात्र,जयकुमार गोरे यांना विवस्त्र फोटो पाठवल्याप्रकरणी त्यावेळी न्यायालयात महिलेची माफी मागितली होती, असा आरोप आता केला जात आहे. त्यानंतर मंत्री जयकुमार गोरे यांनी आक्रमक पवित्रा घेत ही कारवाई केली आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
