सातारा : वैद्यकीय अधिकार्‍यांना जागेवरच केले पदमुक्त
कराड : येथील स्व. वेणूताई चव्हाण रुग्णालयामध्ये रुग्णांची हेळसांड होत असल्याच्या तक्रारी करण्यात आल्या होत्या. त्यानुसार माजी उपनगराध्यक्ष राजेंद्रसिंह यादव यांनी उपजिल्हा रूग्णालयात जाऊन याबाबत तत्काळ जाब विचारला व अधिकार्‍यांची झाडाझडती घेतली.
त्यावर संंबंधित महिला वैद्यकीय अधिकार्‍यांनी उडवाउडवीची उत्तरे दिली. त्यामुळे रुग्णांच्या जीवाशी खेळणार्‍या अधिकार्‍यांवर जोपर्यंत कारवाई होत नाही, तोपर्यंत येथून हलणार नाही, असा आक्रमक पवित्रा राजेंद्रसिंह यादव यांनी घेतला. घटनेचे गांभीर्य ओळखून संबंधित वैद्यकीय अधिकार्‍यांना तत्काळ पदमुक्त करण्याची कारवाई करण्यात आली. यावेळी माजी नगरसेविका स्मिता हुलवान, गजेंद्र कांबळे, प्रितम यादव, निशांत ढेकळे, विनोद भोसले, ओंकार मुळे, मनोज माळी आदी उपस्थित होते.
दरम्यान, स्व. वेणूताई चव्हाण रुग्णालयामधील वैद्यकीय अधिकार्‍यांचा मनमानी कारभार, रुग्णालयात असणार्‍या असुविधा, अस्वच्छता याबाबत राजेंद्रसिंह यादव यांनी पाहणी करून आरोग्यमंत्री यांच्याशी संपर्क साधला असून आरोग्यमंत्री, पालकमंत्र्यांसमवेत याबाबतची आढावा बैठक घेण्यात येणार असल्याचे सांगितले. कराड येथील एका युवकास रविवारी कुत्र्याने चावा घेतला होता. त्यामुळे त्याला तत्काळ येथील स्व. वेणूताई चव्हाण उपजिल्हा रुग्णालयामध्ये उपचारासाठी नेला होते. त्यावेळी तेथे उपस्थित असलेल्या डॉक्टरांनी रेबिज लस देण्याची गरज असल्याचे सांगितले. त्यानुसार त्यांनी महिला वैद्यकीय अधिकारी यांच्याशी संपर्क साधला. मात्र त्यांनी रेबिज लस शिल्लक नसल्याचे सांगून उपचारास टाळाटाळ केली, असल्याचा आरोप युवकाने केला व याबाबतची तक्रार केली. रेबिज लस कुत्र्याने चावा घेतल्यापासून 24 तासांच्या आत रुग्णाला देणे गरजेचे असतानाही लस दिली गेली नाही.याबाबतची माहिती मिळताच राजेंद्रसिंह यादव यांनी तात्काळ रूग्णालयात धाव घेत माहिती घेतली. त्यावेळी या महिला डॉक्टरांनी उडवाउडवीची उत्तरे दिली. याबाबत यादव यांनी वैद्यकीय अधिक्षक डॉ. सुनिला लाळे यांच्याशी संपर्क साधला असता रेबिज लस शिल्लक असल्याची माहिती त्यांनी दिली. रुग्णांवर उपचार करण्यात येणारी दिरंगाई व त्याबाबत जाब विचारल्यावर उडवाउडवीची उत्तरे दिल्यामुळे रूग्णांच्या उपचारात दिरंगाई होत असल्यामुळे यादव यांनी संबंधित डॉक्टरांवर कारवाई करण्यात यावी अन्यथा येथून हलणार नाही असा पवित्रा घेतला. तसेच नगरपालिकेतील एका कर्मचार्‍यालाही तत्काळ उपचाराची गरज असताना त्यांनाही व्यवस्थित उपचार दिला नसल्याचाही आरोप यादव यांनी केला. त्यामुळे संबंधित डॉ. जडगे यांच्यावर तत्काळ कारवाई करण्यात येऊन त्यांना जागेवरच पदमुक्त करण्यात आले.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
