उज्वल निकम यांची राष्ट्रपती नामनिर्देशित खासदार म्हणून नियुक्ती
नवी दिल्ली: उज्वल निकम यांची राष्ट्रपती नामनिर्देशित खासदार म्हणून नियुक्ती करण्यात आली आहे. लोकसभा निवडणूक हरल्यानंतर राज्यसभेत राष्ट्रपती कोट्यातून त्यांची नियुक्ती करण्यात आली आहे. उज्ज्वल निकम यांनी २०२४ लोकसभा निवडणूक लढवली होती. उत्तर मध्य मुंबई मतदारसंघात काँग्रसेच्या मुंबई प्रदेशाध्यक्ष वर्षा गायकवाड यांच्‍याविरोधात त्यांनी लढवलेली निवडणूक चुरशीची ठरली होती. अखेर वर्षा गायकवाड यांनी निसटती आघाडी घेत उज्ज्वल निकम यांचा पराभव केला होता.
भारताच्या राष्ट्रपतींनी संविधानाच्या कलम 80(1)(a) आणि त्याच कलम (3) द्वारे प्रदान केलेल्या अधिकारांनुसार, प्रसिद्ध सरकारी वकील उज्ज्वल देवराव निकम यांच्‍याबरोबरच केरळमधील ज्येष्ठ सामाजिक कार्यकर्ते आणि शिक्षणतज्ज्ञ सी. सदानंदन मास्ते, भारताचे माजी परराष्ट्र सचिव हर्षवर्धन श्रृंगला, प्रख्यात इतिहासकार आणि शिक्षणतज्ज्ञ मीनाक्षी जैन यांना नामांकित केले आहे. पूर्वी नामांकित सदस्यांच्या निवृत्तीमुळे निर्माण झालेल्या रिक्त पदांच्या पार्श्वभूमीवर ही नामांकने आली आहेत.
राष्ट्रपती द्रौपदी मुर्मू यांनी भारतीय संविधानाच्या कलम ८० (१) (अ) अन्वये त्यांना दिलेल्या अधिकारांचा वापर करत या चारही व्यक्तींना राज्यसभेवर नामनिर्देशित केले आहे. या कलमानुसार, राष्ट्रपती साहित्य, विज्ञान, कला आणि समाजसेवा या क्षेत्रांमध्ये विशेष ज्ञान किंवा व्यावहारिक अनुभव असलेल्या व्यक्तींना राज्यसभेवर सदस्य म्हणून नामनिर्देशित करू शकतात. या नामनिर्देशनांमुळे राज्यसभेला विविध क्षेत्रांतील तज्ज्ञ आणि अनुभवी व्यक्तींचे मार्गदर्शन लाभणार आहे. कायदा, आंतरराष्ट्रीय संबंध, इतिहास आणि समाजसेवा यांसारख्या महत्त्वपूर्ण विषयांवरील त्यांच्या ज्ञानाचा आणि अनुभवाचा फायदा देशाच्या धोरणनिर्मितीसाठी होईल, अशी आशा व्यक्त केली जात आहे. या नियुक्त्यांमुळे संसदेच्या वरिष्ठ सभागृहातील चर्चा आणि कामकाजाला एक नवी दिशा मिळण्यास मदत होईल.
देशाला हादरवून सोडवणारे खटले आणि निकम यांची भूमिका
उज्ज्वल निकम यांची ओळख केवळ एक सरकारी वकील म्हणून नाही, तर अत्यंत संवेदनशील आणि गुंतागुंतीच्या खटल्यांमध्ये सरकारची बाजू यशस्वीपणे मांडणारे कायदेतज्ज्ञ म्हणून आहे. त्यांच्या कारकिर्दीतील काही महत्त्वाचे खटले खालीलप्रमाणे:१९९३ मुंबई बॉम्बस्फोट खटला: या खटल्याने निकम यांना देशपातळीवर ओळख मिळवून दिली. त्यांनी अत्यंत नियोजनबद्ध पद्धतीने पुरावे सादर करत अनेक आरोपींना शिक्षा सुनावली.गुलशन कुमार हत्याकांड: संगीत क्षेत्रातील बादशाह गुलशन कुमार यांच्या हत्येचा खटला अत्यंत गुंतागुंतीचा होता. या प्रकरणातही त्यांनी आरोपी नदीम सैफी याच्या प्रत्यार्पणासाठी लंडनपर्यंत लढा दिला. प्रमोद महाजन हत्या प्रकरण: भाजपचे ज्येष्ठ नेते प्रमोद महाजन यांच्या हत्येचा खटलाही त्यांनीच लढवला आणि आरोपी प्रवीण महाजन याला जन्मठेपेची शिक्षा मिळवून दिली.२६/११ मुंबई दहशतवादी हल्ला: हा खटला त्यांच्या कारकिर्दीतील मैलाचा दगड ठरला. जिवंत पकडलेल्या एकमेव दहशतवादी अजमल कसाबविरुद्ध त्यांनी आंतरराष्ट्रीय पातळीवर लक्ष वेधणारा युक्तिवाद केला. कसाबला फाशीची शिक्षा होण्यात त्यांचा सिंहाचा वाटा होता. या व्यतिरिक्त खैरलांजी हत्याकांड, कोपर्डी बलात्कार आणि हत्याकांड यांसारख्या अनेक सामाजिकदृष्ट्या संवेदनशील प्रकरणांमध्ये त्यांनी पीडितांना न्याय मिळवून देण्यासाठी महत्त्वाची भूमिका बजावली.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
