निवडणुका अचानक पुढे. आता २० डिसेंबरला मतदान! तीन नगरपरिषदांमध्ये नेमका घोळ काय?
महाराष्ट्र राज्य निवडणूक आयोगाने बारामती, फलटण आणि महाबळेश्वर या तीन नगरपरिषदांच्या निवडणुका पुढे ढकलण्याचा निर्णय घेतला आहे. आयोगाने यासंदर्भात अधिकृत परिपत्रकही प्रसिद्ध केले आहे. बारामती नगरपरिषदेतील नगराध्यक्ष पदाच्या उमेदवारासह एकूण सात प्रभागांतील उमेदवारांच्या विरोधात जिल्हा न्यायालयात याचिका दाखल झाल्या होत्या. या याचिकांवरील निकाल अद्याप प्रलंबित असल्याने नैसर्गिक न्यायाच्या तत्त्वांचा आधार घेऊन संपूर्ण निवडणूक प्रक्रिया स्थगित करण्यात आली आहे.
आता या तीन नगरपरिषदांमध्ये मतदान २० डिसेंबर रोजी होईल. निवडणूक प्रक्रियेला पुन्हा सुरुवात ४ डिसेंबरपासून होणार आहे. मात्र, नवीन उमेदवारांना नामनिर्देशनपत्र दाखल करण्याची संधी मिळणार नाही. उमेदवारी मागे घेण्याची अंतिम तारीख १० डिसेंबर ठेवण्यात आली आहे. निवडणूक चिन्ह वाटप आणि अंतिम उमेदवार यादी जाहीर करण्याचे काम ११ डिसेंबर रोजी पूर्ण होईल.
निकाल २१ डिसेंबरला
मतदान २० डिसेंबरला तर मतमोजणी आणि निकाल २१ डिसेंबरला लागेल. या निर्णयामुळे बारामती, फलटण आणि महाबळेश्वरमधील राजकीय वातावरणात प्रचंड खळबळ माजली असून उमेदवार आणि कार्यकर्ते यात मोठ्या संभ्रमात आहेत.
नवीन निवडणूक कार्यक्रम असा राहील :
४ डिसेंबर - निवडणूक कार्यक्रम जाहीर१० डिसेंबर - उमेदवारी अर्ज मागे घेण्याची शेवटची तारीख११ डिसेंबर - अंतिम उमेदवार यादी आणि चिन्ह वाटप२० डिसेंबर - मतदान२१ डिसेंबर - मतमोजणी व निकाल
राजकीय चर्चांना उधाण
यापूर्वी या तीन नगरपरिषदांमध्ये २ डिसेंबरला मतदान आणि ३ डिसेंबरला निकाल जाहीर होणार होता. महाराष्ट्रातील उर्वरित नगरपरिषदांच्या निवडणुका मात्र पूर्वनियोजित वेळेतच पार पडणार आहेत. न्यायालयाने याचिकांवर निकाल देण्यासाठी आठ दिवसांची मुदत मागितल्याने हा बदल करावा लागला आहे. या घडामोडींमुळे संबंधित मतदारसंघांमध्ये राजकीय चर्चांना उधाण आले आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
