जुन्या भांडणाच्या रागातून केला विष्णू वडरचा गेम ! दोन्ही संशयितांची कबुली : विश्रामबाग पोलिसांनी केवळ दोन तासात आवळल्या दोघांच्या मुसक्या
शहरातील माधवनगर रस्त्यावरील कॉलेज कॉर्नर येथे विष्णू वडर या तरुणाच्या खून प्रकरणातील कुपवाड येथील दोन संशयितांच्या दोन तासात मुसक्या आवळण्यात आल्या. पूर्वी झालेल्या भांडणाच्या रागातून खून केल्याची कबुली दोघांनी दिल्याची माहिती विश्रामबाग पोलीस ठाण्याचे प्रभारी निरीक्षक सुधीर भालेराव यांनी दिली. आर्यन हेमंत पाटील (वय २३, रा. रत्नदिप हौसिंग सोसायटी कुपवाड), आदित्य प्रमोद वालकर (वय २१, रा. राणाप्रताप चौक जुन एम.एस.सी.बी ऑफिसजवळ कुपवाड) अशी अटक केलेल्यांची नावे आहेत. विष्णू सतीश वडर (वय 22, रा. वडर कॉलनी, सांगली) असे मृत तरुणाचे नाव आहे.
काही महिन्यापूर्वी मृत वडर आणि पाटील यांच्यात किरकोळ कारणावरून वाद झाला होता. त्यावेळी विष्णू वडर याने आर्यन याला जबर मारहाण केली होती. याप्रकरणी वडर याच्यावर विश्रामबाग पोलीस ठाण्यात गुन्हाही दाखल करण्यात आला होता. गुरुवारी दुपारी दोनच्या सुमारास मृत वडर कॉलेज कॉर्नर परिसरात थांबला होता. त्यावेळी पाटील हा साथीदार वालकर याच्या समवेत तेथे आला होता. त्यांच्यात पुन्हा पूर्वीचा वाद तसेच एकमेकांकडे रागाने बघण्याच्या कारणातून वाद झाला. त्यानंतर पाटील याने त्याच्याकडील धारदार चाकूने वडर याच्यावर वार केले तर वालकर याने लाथा बुक्क्यानी मारहाण केली. तो रक्ताच्या थारोळ्यात पडल्यावर दोघेही हल्लेखोर तेथून पसार झाले.या घटनेची माहिती मिळताच सांगली शहरचे उपविभागीय पोलीस अधिकारी संदीप भागवत, एलसीबीचे पोलीस निरीक्षक संजीव झाडे, विश्रामबागचे पोलीस निरीक्षक सुधीर भालेराव यांनी घटनास्थळी धाव घेतली. जखमी वडर याला सिव्हिल हॉस्पिटलमध्ये हलवण्यात आले. तेथे उपचार सुरु असताना त्याचा मृत्यू झाला. हल्लेखोरांचा शोध घेत असताना विश्रामबाग पोलीस ठाण्यातील प्रशांत माळी, आर्यन देशिंगकर यांना दोघेही संशयित लपलेल्या ठिकाणाची माहिती मिळाली. घटनेनंतर दोन तासात दोघांनाही ताब्यात घेण्यात आले.सांगलीचे उपविभागीय पोलीस अधिकारी संदीप भागवत, विश्रामबागचे निरीक्षक सुधीर भालेराव यांच्या मार्गदर्शनाखाली सहायक निरीक्षक चेतन माने, कविता नाईक, उपनिरीक्षक सतेज कार्वेकर, दादासाहेब मगदुम, दिनेश माने, संदिप साळुंखे, अमर मोहिते, बिरोबा नरळे, प्रशांत माळी, आर्यन देशिगकर, महमद मुलाणी, योगेश पाटील यांच्या पथकाने ही कारवाई केली.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
