महापालिका निवडणुकीनंतर राज्यात भूकंप? अजित पवारांचं मोठं वक्तव्य; शरद पवारांचा उल्लेख करत म्हणाले...
पिंपरी-चिंचवड: राष्ट्रवादीचे अध्यक्ष आणि राज्याचे उपमुख्यमंत्री अजित पवार यांनी पिंपरी- चिंचवड महानगरपालिका निवडणुकीच्या प्रचारादरम्यान घेतलेल्या जाहीर सभेत चौफेर फटकेबाजी करत मोठं वक्तव्य केलं आहे. फक्त महापालिका निवडणुका नव्हे तर नंतरही दोन्ही राष्ट्रवादी एकत्र येण्याच संकेत त्यांनी उघडपणे दिले आहेत.
पिंपरी-चिंचवड आणि पुणे शहरात सध्या दोन्ही राष्ट्रवादी एकत्र निवडणूक लढवत असून, याच पार्श्वभूमीवर अजित पवारांनी प्रचारसभेत सूचक वक्तव्य केलं. "तुतारी आणि घड्याळ सोबत लढतोय. आम्हाला वाद घालायचा नाही. मागचं जे काही झालं ते गंगेला मिळालं," असं म्हणत त्यांनी कार्यकर्त्यांना एकोप्याने काम करण्याचं आवाहन केलं. तसंच "काकांच्या पुण्याईने माझं लई बरं चाललंय. मी खोटं बोलत नाही," असं म्हणत अजित पवारांनी थेट शपथ घेतली. "माझी काळजी करू नका," असं सांगत त्यांनी शरद पवारांचे योगदानही मान्य केलं. हिंजवडीतील आयटी पार्क शरद पवारांनी आणल्याचं त्यांनी आवर्जून सांगितलं.
विरोधकांना इशारा
अजित पवारांनी या प्रचारसभेत आपल्या राजकीय विरोधकांना थेट इशाराही दिला. "ज्या गावच्या बोरी, त्याच गावच्या बाभळी. मी कुणाच्या नादी लागत नाही, पण कोणी माझ्या नादी लागलं तर मी सोडत नाही," असं म्हणत त्यांनी विरोधकांसह नाराज नेत्यांनाही तंबी दिली. दरम्यान, पक्ष सोडून गेलेल्या नेत्यांवर अजित पवारांनी जोरदार हल्लाबोल केला. "मी ज्यांना ताकद दिली, तेच मला सोडून गेले. त्यांच्या मुलांवर काय आरोप होते, हे ते विसरले. दादागिरी, दहशत, गुंडगिरी सुरू होती," असा गंभीर आरोप त्यांनी केला.
भ्रष्टाचार करणाऱ्या 'आकाला' संपवायचं; अप्रत्यक्षपणे महेश लांडगेंना इशारा
पिंपरी-चिंचवड महानगरपालिकेतील भ्रष्टाचारावर बोलताना अजित पवारांनी थेट आव्हान दिलं. "भ्रष्टाचार करणाऱ्या आकाला संपवायचं आहे," असं म्हणत त्यांनी अप्रत्यक्षपणे आमदार महेश लांडगे यांना लक्ष्य केलं. "त्या आकाला आपल्याला जागा दाखवायची आहे. अनेक जण सरड्यासारखे रंग बदलतील, भावनिक आवाहन करतील, ही माझी शेवटची निवडणूक आहे म्हणून पाय धरतील. पण तुम्ही त्यांना पराभूत केल्याशिवाय त्यांची शेवटची निवडणूक होणार नाही," असं आवाहन अजित पवारांनी नागरिकांना केलं. दरम्यान, एकीकडे अजित पवार यांनी दोन्ही राष्ट्रवादी एकत्र येण्याचे संकेत, तर दुसरीकडे भ्रष्टाचार, दहशत आणि गुंडगिरीवर थेट हल्ला केला. अजित पवारांच्या या सभेनंतर पिंपरी- चिंचवडचं राजकारण पुन्हा तापल्याचं पाहायला मिळत आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
