"विदुषका, राजमुकुट खाली ठेव", डोनाल्ड ट्रम्प यांच्याविरोधात जगभर संताप वाढला, अमेरिका आणि युरोपीय देशांत 'नो किंग्स' मोहिम

"विदुषका, राजमुकुट खाली ठेव", डोनाल्ड ट्रम्प यांच्याविरोधात जगभर संताप वाढला, अमेरिका आणि युरोपीय देशांत 'नो किंग्स' मोहिम

वॉशिंग्टन: अमेरिकेत शनिवारी राष्ट्राध्यक्ष डोनाल्ड ट्रम्प यांच्या विरोधात झालेल्या 'नो किंग्स रॅली'मध्ये तब्बल 80 लाख लोकांनी सहभाग घेतला. मीडिया रिपोर्टनुसार अमेरिकेच्या सर्व 50 राज्यांतील 3,300 हून अधिक ठिकाणी हे आंदोलन आयोजित करण्यात आले होते. ऑक्टोबरमध्ये झालेल्या मागील 'नो किंग्स' आंदोलनांच्या तुलनेत यावेळी सुमारे 10 लाख अधिक लोक सहभागी झाले. तसेच सुमारे 600 अधिक कार्यक्रम आयोजित करण्यात आले. 

प्रदर्शनात सहभागी झालेल्या लोकांनी सांगितले की, ट्रम्प सरकारच्या अनेक धोरणांविरोधात त्यांच्यात नाराजी आहे. विशेषतः इराणसोबत वाढता तणाव, कडक इमिग्रेशन कारवाई आणि वाढती महागाई या मुद्द्यांवर लोकांमध्ये तीव्र असंतोष आहे. अनेक ठिकाणी आंदोलकांनी ट्रम्प आणि उपराष्ट्राध्यक्ष जेडी वेंस यांच्या विरोधात पोस्टर्स दाखवून त्यांना पदावरून हटवण्याची मागणी केली. ट्रम्प यांच्या विरोधात आतापर्यंत राष्ट्रीय स्तरावर तीन वेळा 'नो किंग्स' आंदोलन झाले आहे. पहिले मोठे आंदोलन जून 2025 मध्ये त्यानंतर ऑक्टोबर 2025 मध्ये दुसरे तर तिसरे आंदोलन 28 मार्च रोजी पार पडले.

मिनेसोटा राज्यातील मिनियापोलिस आणि सेंट पॉल येथे सुमारे 2 लाख लोक रस्त्यावर उतरले होते. न्यूयॉर्कमधील टाइम्स स्क्वेअर आणि मॅनहॅटन परिसरातही मोठ्या प्रमाणात गर्दी झाली. एवढी गर्दी होती की पोलिसांना अनेक रस्ते बंद करावे लागले. काही आंदोलकांनी ट्रम्प यांच्या फोटोसोबत 'एपस्टीन' असे लिहिलेले पोस्टर्स दाखवले. ट्रम्प यांचे नाव लैंगिक गुन्हेगार जेफ्री एपस्टीनशी संबंधित फाइल्समध्ये अनेक वेळा समोर आले आहे.

शिकागोमध्येही हजारो लोकांनी 'ट्रम्प हटवा' अशा घोषणा देत आंदोलन केले. तेथील महापौरांनीही लोकांना संबोधित करत हे आंदोलन सातत्याने मजबूत होत असल्याचे सांगितले. राजधानी वॉशिंग्टन डीसीमध्ये 'लिंकन मेमोरियल' आणि 'नॅशनल मॉल' परिसरात मोठ्या प्रमाणात लोक जमले आणि सरकारविरोधात घोषणाबाजी केली.

ओरेगन राज्यातील पोर्टलँड येथे आंदोलनानंतर वातावरण तणावपूर्ण झाले. आंदोलकांनी अमेरिकेच्या इमिग्रेशन एजन्सी (ICE) च्या कार्यालयाबाहेर अमेरिकेचा झेंडा जाळला. अमेरिकेतील बहुतांश ठिकाणी आंदोलने शांततेत पार पडली, मात्र लॉस एंजेलिसमध्ये काही ठिकाणी परिस्थिती बिघडली. तेथे आंदोलक आणि पोलिसांमध्ये संघर्ष झाला असून अनेकांना अटक करण्यात आली.

इटलीची राजधानी रोम येथे 'नो किंग्स' आंदोलनादरम्यान लोकांनी विविध जागतिक नेत्यांचे पोस्टर्स घेऊन निदर्शने केली. आंदोलकांनी इस्रायलचे पंतप्रधान नेतान्याहू, इटलीच्या पंतप्रधान जॉर्जिया मेलोनी आणि डोनाल्ड ट्रम्प यांच्या विरोधात घोषणाबाजी केली.

वॉशिंग्टन डीसीमध्ये आंदोलनादरम्यान एका महिला आंदोलकाने लोकांना स्वतःवर बनावट रक्त ओतण्याचे आवाहन केले. फ्रान्सची राजधानी पॅरिस येथे एक महिला 'स्टॅच्यू ऑफ लिबर्टी'च्या वेशात आंदोलनात सहभागी झाली. वॉशिंग्टन डीसीमध्येच आंदोलकांनी राष्ट्राध्यक्ष ट्रम्प यांच्या पुतळ्याद्वारे आपला निषेध व्यक्त केला.

मिनेसोटामध्ये डेमोक्रॅट नेते बर्नी सँडर्स यांनी लोकांना संबोधित करत सांगितले की, राजकारणात श्रीमंत लोकांचा प्रभाव वाढत आहे. सेंट पॉल येथे सिंगर मॅगी रोजर्स आणि जोन बाएज यांनी आंदोलकांच्या समर्थनार्थ परफॉर्म केले, तर ब्रूस स्प्रिंग्स्टीन यांनीही ट्रम्प प्रशासनाच्या धोरणांविरोधात कार्यक्रम सादर केला.

दरम्यान व्हाइट हाऊसने या आंदोलनांना 'थेरपी सेशन' असे संबोधत सामान्य लोकांवर याचा काही विशेष परिणाम होत नसल्याचे म्हटले आहे. ट्रम्प यांनीही आपले निर्णय देशाला मजबूत करण्यासाठी असल्याचे सांगत, ते 'राजा' नसल्याचे स्पष्ट केले आणि त्यांच्यावरील आरोप फेटाळले.

फक्त अमेरिकेतच नव्हे, तर जगातील इतर भागांतही ट्रम्पविरोधात नाराजी दिसून आली. पॅरिस, लंडन आणि लिस्बनसारख्या शहरांमध्येही लोकांनी रस्त्यावर उतरून ट्रम्प यांच्या विरोधात आंदोलन केले आणि त्यांना पदावरून हटवण्याची मागणी केली.

➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.