कडुनिंब कॅन्सरवर उपाय ठरू शकतो, नव्या संशोधनातून आशादायक संकेत

कडुनिंब कॅन्सरवर उपाय ठरू शकतो, नव्या संशोधनातून आशादायक संकेत

मुंबई : आपल्या घराजवळ सहज सापडणारे कडुनिंब  आता गंभीर आजारांवरही उपाय ठरू शकतो का? अशा चर्चांना नव्या संशोधनामुळे उधाण आलं आहे. स्वादुपिंडाचा कर्करोग  सारख्या अत्यंत धोकादायक आजारावर कडुनिंबामधील गेडुनिन  नावाचा नैसर्गिक घटक परिणामकारक ठरू शकतो, असे संकेत वैज्ञानिक अभ्यासातून मिळाले आहेत. मात्र तज्ज्ञांनी याबाबत सावधगिरी बाळगण्याचंही आवाहन केलं आहे.

कडुनिंबातील घटक कॅन्सर पेशींवर परिणाम

संशोधनात असं दिसून आलंय की 'गेडुनिन' हा घटक कॅन्सर पेशींच्या वाढीस कारणीभूत ठरणाऱ्या 'सोनिक हेजहॉग सिग्नलिंग' (Sonic Hedgehog Pathway) या प्रक्रियेत हस्तक्षेप करतो. त्यामुळे कॅन्सर पेशींची वाढ थांबवणं, त्यांचा प्रसार कमी करणं आणि पेशींना नष्ट होण्यासाठी (apoptosis) प्रवृत्त करणं शक्य होऊ शकतं. विशेष म्हणजे पारंपरिक केमोथेरपीच्या तुलनेत याचे साइड इफेक्ट्स कमी असू शकतात, असा अंदाज संशोधकांनी व्यक्त केलाय.

 स्वादुपिंडाचा कर्करोग इतका धोकादायक का?

स्वादुपिंडाचा कर्करोग हा वेगाने वाढणारा आणि लवकर पसरू शकणारा आजार असल्यामुळे त्यावर उपचार करणं कठीण ठरतं. बहुतांश रुग्णांमध्ये हा आजार उशिरा लक्षात येतो. त्यामुळे जगभरातील संशोधक या आजारासाठी नवीन आणि प्रभावी उपचार शोधत आहेत. अशा परिस्थितीत कडुनिंबासारख्या नैसर्गिक घटकांवर होणारं संशोधन महत्त्वाचं मानलं जातंय.

अजूनही संशोधन प्राथमिक टप्प्यात

तज्ज्ञांनी स्पष्ट केलंय की, कडुनिंब हा कॅन्सरवरील इलाज नाही. सध्या हे संशोधन प्रयोगशाळा आणि प्री-क्लिनिकल स्तरावर आहे. मानवांवर चाचण्या होणं बाकी आहे. त्यामुळे कोणताही निष्कर्ष काढण्याआधी आणि कडुनिंबाचा औषध म्हणून वापर करण्याआधी डॉक्टरांचा सल्ला घेणं अत्यावश्यक आहे.

कडुनिंबाचे इतर आरोग्यदायी फायदे

कडुनिंबाचे फायदे फक्त कॅन्सरपुरते मर्यादित नाहीत. शतकानुशतके भारतीय आयुर्वेदात त्याचा वापर केला जातो.

अँटीबॅक्टेरियल गुणधर्मामुळे संसर्गावर नियंत्रण

त्वचेसाठी उपयुक्त, मुरुम आणि एक्झिमावर फायदा

रक्तातील साखर नियंत्रणात ठेवण्यास मदत

रोगप्रतिकारक शक्ती वाढवण्यास उपयोगी

कडुनिंब वापरताना घ्या काळजी

कडुनिंब सहज उपलब्ध असला तरी त्याचा अति वापर टाळणं गरजेचं आहे. विशेषतः गंभीर आजारांवर स्वतःहून उपचार करण्याचा प्रयत्न धोकादायक ठरू शकतो. त्यामुळे डॉक्टरांच्या सल्ल्याशिवाय कोणतीही औषधी पद्धत वापरू नये, असा सल्ला तज्ज्ञ देत आहेत.

➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.