सांगली : घरगुती गॅसचा अवैध वापर प्रकरणी ३ वितरकांवर गुन्हे, तिघांना अटक
सांगली : घरगुती गॅसचा गैरवापर रोखण्यासाठी जिल्हा प्रशासनाकडून उपहारगृहासह वितरकांची झाडाझडती करण्यात येत असून शुक्रवारी ६१ हजारांचा मुद्देमाल जप्त करुन ३ वितरकांविरुध्द गुन्हे दाखल करुन तिघांना अटक करण्यात आली आहे अशी माहिती जिल्हाधिकारी अशोक काकडे यांनी दिली. सद्यस्थितीमध्ये आखाती देशांमध्ये सुरु असलेल्या युध्दाच्या तणावपूर्ण पार्श्वभूमिवर जिल्ह्यात एलपीजी सिलेंडर वितरण, इंधन पुरवठा सुरळीत ठेवण्याकामी जिल्हा प्रशासनामार्फत गॅस एजन्सींची काटेकोर तपासणी करण्यात येत आहे. यासाठी नियुक्त दक्षता व फिरत्या पथकांमार्फत ३७ गॅस एजन्सींची तसेच ३१ हॉटेल्सची तपासणी करण्यात आली. या तपासणीमध्ये एकूण ७१ हजार २०० रूपयांचा मुददेमाल जप्त करून ३ एजन्सीवर गुन्हे दाखल व ३ जणांना अटक करण्यात आली असल्याचे जिल्हाधिकारी अशोक काकडे यांनी सांगितले.
जिल्ह्यातील इंधन पुरवठ्याच्या अनुषंगाने आढावा घेऊन जिल्हाधिकारी अशोक काकडे म्हणाले, सांगली जिल्ह्यात सध्या एलपीजीचा पुरेसा साठा उपलब्ध आहे. त्यानुसार एचपीसीएल कंपनीचा ३६६२ टन, बीपीसीएल कंपनीचा १०३९ टन व आयओसीएल कंपनीचा ५७ टन इतका एलपीजी साठा उपलब्ध आहे. त्यामुळे जिल्ह्यातील घरगुती ग्राहकांना गॅस सिलिंडरचा पुरवठा सुरळीतपणे सुरू राहणार आहे.ऑनलाईन नोंदणी केलेल्या सर्व ग्राहकांना उपलब्धतेनुसार क्रमाने सिलिंडरचा पुरवठा करण्यात येणार असल्याचे त्यांनी स्पष्ट केले. घरगुती एलपीजी गॅसचे सुरळीत वितरण व्हावे तसेच घरगुती गॅसचा अवैध वापर रोखण्यासाठी जिल्हा स्तरावर दक्षता व फिरते पथक नियुक्त करण्यात आले आहे. गॅस एजन्सीकडून सिलिंडरचा गैरमार्गाने पुरवठा केल्याचे आढळल्यास अथवा घरगुती एलपीजीचा वापर व्यावसायिक कारणासाठी होत असल्याचे निदर्शनास आल्यास संबंधितांवर कठोर कारवाई करण्यात येणार असल्याचा इशाराही प्रशासनाने दिला आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
