सोनम वांगचुकांची १७० दिवसांनंतर होणार सुटका ! केंद्र सरकारने NSA हटवला
लडाखमधील प्रसिद्ध सामाजिक कार्यकर्ते आणि शिक्षणतज्ज्ञ सोनम वांगचुक यांच्याबाबत केंद्र सरकारने एक मोठा निर्णय घेतला आहे. वांगचुक यांच्यावर लावण्यात आलेला राष्ट्रीय सुरक्षा कायदा (NSA) केंद्र सरकारने शनिवारी मागे घेतला असून, हा आदेश तत्काळ लागू करण्यात आला आहे.
२४ सप्टेंबर २०२५ रोजी लेहमध्ये झालेल्या हिंसक आंदोलनानंतर प्रशासनाने ही कारवाई केली होती. या हिंसेला चिथावणी दिल्याचा आरोप वांगचुक यांच्यावर ठेवण्यात आला होता. त्यानंतर २६ सप्टेंबर रोजी त्यांना 'रासुका' अंतर्गत ताब्यात घेऊन जोधपूर जेलमध्ये ठेवण्यात आले होते. या हिंसाचारात ४ जणांचा मृत्यू झाला होता, तर १५० हून अधिक जण जखमी झाले होते.केंद्रीय गृह मंत्रालयाने दिलेल्या माहितीनुसार, वांगचुक यांनी त्यांच्या ताब्यात राहण्याच्या कालावधीचा निम्म्याहून अधिक काळ पूर्ण केला आहे. गेल्या साडेपाच महिन्यांपासून म्हणजेच सुमारे १७० दिवसांपासून ते तुरुंगात होते. आता त्यांची लवकरच सुटका होणार आहे.
सोनम वांगचुक आणि लडाखमधील नागरिक प्रामुख्याने दोन मागण्यांसाठी आंदोलन करत आहेत. लडाखला पूर्ण राज्याचा दर्जा मिळावा. सहाव्या अनुसूचींतर्गत लडाखला घटनात्मक संरक्षण मिळावे. हा एक असा कायदा आहे जो सरकारला 'देशाची सुरक्षा' किंवा 'सार्वजनिक सुव्यवस्था' धोक्यात आणणाऱ्या व्यक्तीला विना खटला ताब्यात घेण्याचा अधिकार देतो. या कायद्यांतर्गत एखाद्या व्यक्तीला जास्तीत जास्त १२ महिन्यांपर्यंत नजरकैदेत ठेवता येते.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
