नागराज मंजुळेंच्या 'मटका किंग'चे राहुल गांधींशी काय आहे कनेक्शन? सोशल मीडियावर चर्चांना उधाण
दिग्दर्शक नागराज मंजुळे यांच्या 'मटका किंग' या वेब सीरिजची सध्या जोरदार चर्चा सुरू आहे. 1960 च्या दशकातील मुंबई, मटका जुगाराचा उदय आणि त्यामागची अंडरवर्ल्डची दुनिया या पार्श्वभूमीवर आधारित असलेली ही मालिका प्रेक्षकांमध्ये मोठी उत्सुकता निर्माण करत आहे. मात्र या सीरिजसोबत आणखी एका नावाची चर्चा रंगली आहे आणि ते नाव म्हणजे 'राहुल गांधी'. त्यामुळे अनेकांच्या मनात प्रश्न निर्माण झाला आहे की, या सीरिजचा आणि राहुल गांधींचा नेमका संबंध काय? खरं तर येथे उल्लेख केला जात असलेले राहुल गांधी हे काँग्रेस नेते राहुल गांधी नसून चित्रपटसृष्टीत काम करणारे एक निर्माता आहेत. 'मटका किंग' या वेब सीरिजमध्ये त्यांनी कार्यकारी निर्माता म्हणून काम केलं आहे.
'मटका किंग' ही वेब सिरीज ॲमेझॉन प्राईम व्हिडिओ वर प्रदर्शित झाली आहे. या मालिकेचे दिग्दर्शन नागराज मंजुळे यांनी केले असून, प्रमुख भूमिकांमध्ये विजय वर्मा, सई ताम्हणकर, कृतिका कामरा आणि गुलशन ग्रोव्हर दिसणार आहेत. ही कथा मुंबईतील एका कापूस व्यापाऱ्याभोवती फिरते, ज्याने 'मटका' नावाचा जुगार सुरू केला आणि पुढे तो संपूर्ण शहरात चर्चेचा विषय बनला. त्या काळातील मुंबईतील सामाजिक, आर्थिक आणि गुन्हेगारी जगताचा वास्तववादी पट या सिरीजमध्ये उलगडला आहे.दरम्यान, निर्माता राहुल गांधी यांचे नाव समोर आल्यानंतर सोशल मीडियावर अनेकांनी त्याचा संबंध थेट राजकारणाशी जोडण्यास सुरुवात केली होती. मात्र IMDb वरील माहितीनुसार, हे राहुल गांधी चित्रपट आणि वेब प्रोजेक्ट्सशी संबंधित असून त्यांनी 'धुरंधर' आणि 'धुरंधर: द रिवेंज' यांसारख्या प्रोजेक्टमध्येही काम केले आहे. एकूणच, 'मटका किंग'मधील राहुल गांधी हे राजकीय व्यक्तिमत्त्व नसून मनोरंजन क्षेत्रातील निर्माता आहेत. त्यामुळे सोशल मीडियावर सुरू असलेल्या चर्चांमागचे सत्य आता समोर आले आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
