"तामिळनाडूत 'खेळाडू' बदलणार? थलापती विजयच्या एका प्रस्तावाने काँग्रेसचे नशीब फळफळणार!"
तामिळनाडूमध्ये अभिनेता असलेल्या आणि आता राजकारणात सक्रिय झालेल्या थलापती विजय याने इतिहास घडवला आहे. विजयच्या टीव्हीके या पक्षाने निवडणुकीच्या रिंगणात उतरून चक्क 108 जागा जिंकल्या आहेत. टीव्हीके पक्ष तेथील सर्वात मोठा पक्ष ठरला आहे. परंतु बहुमताचा आकडा न गाठता आल्याने आता तेथे आघाडी सरकार स्थापन करण्यासाठी हालचाली वाढल्या आहेत. विजयचा टीव्हीके हा पक्ष अन्य पक्षांना घेऊन सरकारची स्थापना करणार असून या पक्षातील काही नेत्यांना मंत्रिपदही दिले जाणार आहे. तामिळनाडूतील सत्तावाटपाचे संभाव्य सूत्र समोर आले आहे.
तामिळनाडूमध्ये कोणाला किती जागा?
तामिळनाडूमध्ये टीव्हीके हा पक्ष सर्वात मोठा ठारला आहे. या पक्षाला 108 जागा मिळाल्या आहेत. दुसऱ्या क्रमांकावर डीएमके हा पक्ष असून त्याला 59 जागा मिळाल्या आहेत. एआयडीएमके या पक्षाला 47 जागा मिळाल्या आहेत. काँग्रेसलाही येथे पाच जागा मिळाल्या आहेत. पीएमके पक्षाला चार तर आययूएमएल या पक्षाला दोन, सीपीआय पक्षाला दोन जागा, सीपीएम पक्षाला दोन जागा मिळालेल्या आहेत.
सत्तावाटपाचा फॉर्म्यूला काय?
सध्याचे आकडे लक्षात घेता सीपीआय, सीपीआयएम, काँग्रेस, व्हीसीके या पक्षांनी पाठिंबा दिल्यास टीव्हीकेचे सरकार स्थापन होऊ शकते. टीव्हीके हा पक्षदेखील या पक्षांनाच सोबत घेऊन सरकारची स्थापना करण्याची शक्यता आहे. टीव्हीके आणि या पक्षांमध्ये अनौपचारिकरित्या चर्चादेखील सुरू झाल्याचे बोलले जात आहे. समोर आलेल्या माहितीनुसार टीव्हीके पक्ष काँग्रेसला दोन मंत्रिपदं, व्हीसीके पक्ष तसेच डाव्या पक्षांना प्रत्येकी एक-एक मंत्रिपद दिलं जाण्याची शक्यता आहे.टीव्हीके हा पक्ष आपल्या मित्रपक्षांना एकूण चार ते सहा मंत्रिपदं देऊ शकतो. टीव्हीके या पक्षात बरेच नेते हे पहिल्यांदाच आमदार झालेले आहेत. त्यामुळे या टीव्हीकेला मंत्रिमंडळात काही अनुभवी नेत्यांची गरज आहे. त्यामुळेही टीव्हीके हा पक्ष अन्य पक्षातील काही अनुभवी आमदारांना मंत्रिपद देऊ शकतो. दरम्यान, टीव्हीके पक्षाकडून थलापती विजय हेच मुख्यमंत्री होण्याची दाट शक्यता आहे. सभागृहात बहुमत सिद्ध करण्यासाठी थलापती विजय एका आठवड्याची मुदत मागण्याची शक्यता आहे. त्यामुळे काय होणार, ते पाहणे महत्त्वाचे ठरणार आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
