गावठी दारूने उजळलेलं घर कोळसा! जतच्या लकडेवाडीत दारूच्या नशेत पोटच्या मुलाने बापाचा गळा आवळला; अवैध दारू धंद्यांविरुद्ध ग्रामस्थांचा संताप अनावर!
सांगली / जत : दारूच्या नशेत बाप-लेकात झालेल्या क्षुल्लक वादाचे पर्यावसान थेट रक्ताच्या नात्याचा बळी घेण्यात झाले आहे. सांगली जिल्ह्यातील जत तालुक्यातील लकडेवाडी येथे गुरुवारी रात्री एक काळीज पिळवटून टाकणारी घटना घडली. दारूच्या नशेत धुंद असलेल्या पोटच्या २२ वर्षांच्या मुलाने स्वतःच्या वडिलांचा खून केल्याची धक्कादायक घटना समोर आली आहे. या थरारक घटनेमुळे संपूर्ण जत तालुका हादरला असून, गावात तीव्र संताप आणि भीतीचे वातावरण पसरले आहे.
या घटनेत खंडु श्रीमंत भिसे (वय ४६, व्यवसाय – शेती) यांचा दुर्दैवी मृत्यू झाला असून, त्यांचा मुलगा सोन्या उर्फ पृथ्वीराज खंडु भिसे (वय २२) याला पोलिसांनी ताब्यात घेतले आहे. दरम्यान, या नरसंहाराला गावातील 'अवैध दारू विक्री'च कारणीभूत असल्याचा थेट आरोप करत लकडेवाडीतील महिला आणि ग्रामस्थांनी पोलिसांवर तीव्र संताप व्यक्त केला आहे.
नेमकं काय घडलं त्या काळरात्री?
मिळालेल्या प्राथमिक माहितीनुसार, मयत खंडु भिसे हे शेती करून आपल्या कुटुंबाचा गाडा हाकत होते. मात्र, घरात दारूच्या व्यसनाने विळखा घातला होता. गुरुवारी रात्री खंडु भिसे आणि त्यांचा मुलगा पृथ्वीराज हे दोघेही घरात होते. दोघेही दारूच्या प्रचंड नशेत धुंद होते. रात्रीच्या वेळी त्यांच्यात किरकोळ कारणावरून खटका उडाला.
किरकोळ वादाचं रूपांतर थरारात...
नशेत असल्यामुळे दोघांचाही स्वतःवरील ताबा सुटला आणि वादाचे रूपांतर थेट हाणामारीत झाले. या झटापटी दरम्यान मुलाने रागाच्या भरात वडिलांवर जीवघेणा हल्ला केला. हा हल्ला इतका भीषण होता की खंडु भिसे जागेवरच रक्ताच्या थारोळ्यात पडले. त्यांना उपचारासाठी रुग्णालयात नेण्यापूर्वीच त्यांची प्राणज्योत मालवली होती.
पोलिसांचे 'अर्थपूर्ण' दुर्लक्ष? महिला कार्यकर्त्यांचा गंभीर आरोप!
या अंगावर काटा आणणाऱ्या घटनेनंतर लकडेवाडी गावातून संतापाचा ज्वालामुखी फाटला आहे. "गावात वर्षानुवर्षे उघडपणे अवैध दारू विक्री सुरू आहे, यामुळे अनेक हसती-खेळती कुटुंबे उद्ध्वस्त झाली आहेत, तरुणांचे आयुष्य अंधारात गेले आहे," अशी संतप्त प्रतिक्रिया ग्रामस्थांनी दिली.
विशेष म्हणजे, लकडेवाडीतील महिला सामाजिक कार्यकर्त्यांनी या जीवघेण्या अवैध दारू धंद्यांविरुद्ध उमदी पोलिस ठाण्यात अनेक वेळा लेखी तक्रारी केल्या होत्या, निवेदने दिली होती आणि मोर्चेही काढले होते.
मात्र, पोलिसांच्या ढिसाळ कारभारामुळे आणि कथित अर्थपूर्ण दुर्लक्षामुळे हे अवैध धंदे राजरोसपणे सुरूच राहिले. जर पोलिसांनी वेळीच कारवाई केली असती, तर आज खंडु भिसे यांचा जीव वाचला असता आणि एक तरुण खुनी झाला नसता, असा संतप्त सवाल महिलांनी उपस्थित केला आहे.
आता तरी खाकी जागी होणार का?
लकडेवाडीतील या घटनेने गावातील महिलांमध्ये भीतीचे आणि तीव्र दुःखाचे वातावरण आहे. "गावातील अवैध दारू तात्काळ आणि कायमची बंद झालीच पाहिजे, नाहीतर तीव्र आंदोलन करू," असा इशारा ग्रामस्थांनी दिला आहे.याप्रकरणी उमदी पोलिसांनी गुन्हा दाखल केला असून आरोपी मुलाला अटक केली आहे. मात्र, या खुनानंतर तरी पोलीस प्रशासन जागे होऊन जत तालुक्यातील अवैध दारूचे अड्डे उद्ध्वस्त करणार का? हाच मोठा प्रश्न आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
