सांगलीकरांसाठी खुशखबर! 'काळी खण' सुशोभीकरण प्रकल्प उद्यापासून पुन्हा खुला; सकाळी ६ ते संध्याकाळी ६ प्रवेश विनामूल्य
सांगली शहराच्या वैभवात भर घालणारा आणि नागरिकांचे मुख्य आकर्षण असलेला अत्यंत महत्त्वाकांक्षी 'द इव्हिनिंग रिट्रीट' म्हणजेच काळी खण सुशोभीकरण प्रकल्प उद्यापासून पुन्हा एकदा नागरिकांसाठी खुला करण्यात येत आहे. प्रकल्पातील सर्व तांत्रिक दुरुस्त्या यशस्वीरीत्या पूर्ण झाल्या असून, उद्यापासून हा निसर्गरम्य परिसर नवीन नियमांसह सांगलीकरांच्या सेवेत सज्ज होत असल्याची घोषणा सांगली मिरज आणि कुपवाड शहर महानगरपालिका आयुक्त श्रीम. संजीता महापात्र यांनी केली आहे.
काही दिवसांपूर्वी नागरिकांची सुरक्षितता आणि अत्याधुनिक सुविधांचा दर्जा अधिक उत्तम करण्यासाठी हा प्रकल्प तात्पुरता बंद ठेवण्यात आला होता. मात्र, मनपा प्रशासनाने युद्धपातळीवर काम करून सर्व तांत्रिक त्रुटी दूर केल्या आहेत.
प्रवेशाचे नवीन नियम आणि वेळ:
प्रकल्पाची योग्य देखभाल व्हावी आणि नागरिकांना फिरणे सोयीचे व्हावे, यासाठी प्रशासनाने वेळेचे व शुल्काचे नवीन नियोजन निश्चित केले आहे:सकाळी ६:०० ते संध्याकाळी ६:०० (प्रवेश पूर्णपणे मोफत):दिवसाच्या या १२ तासांच्या कालावधीत सर्व नागरिकांसाठी, विशेषतः मॉर्निंग वॉक आणि इव्हिनिंग वॉकला येणाऱ्यांसाठी प्रवेश पूर्णपणे विनामूल्य राहील.संध्याकाळी ६:०० ते रात्री १०:०० (माफक शुल्क):रात्रीच्या वेळी होणारा विजेचा वापर, अत्याधुनिक प्रकाश व्यवस्था (Lighting), चोख सुरक्षा व्यवस्था आणि प्रकल्पाच्या दैनंदिन देखभालीचा खर्च भागवण्यासाठी या वेळेत प्रवेशासाठी अत्यंत माफक शुल्क आकारले जाणार आहे.
"स्वच्छता आणि शिस्त राखा" - आयुक्त संजीता महापात्र यांचे आवाहन
"काळी खण प्रकल्प हा आपल्या सांगली शहराचे वैभव असून ती संपूर्ण शहराची मालमत्ता आहे. सर्व सांगलीकर नागरिकांनी या नयनरम्य परिसराचा आनंद अवश्य घ्यावा. मात्र, त्याच वेळी येथील स्वच्छता, सौंदर्य, पर्यावरण आणि शिस्त राखण्यासाठी महानगरपालिका प्रशासनाला संपूर्ण सहकार्य करावे."
- श्रीम. संजीता महापात्र (आयुक्त, सांगली मिरज आणि कुपवाड शहर महानगरपालिका)
सांगलीकरांना हक्काचे विरंगुळा केंद्र
तांत्रिक दुरुस्तीनंतर अधिक देखण्या झालेल्या या प्रकल्पामुळे सांगलीकरांना पुन्हा एकदा सहकुटुंब आनंद घेण्यासाठी हक्काचे आणि सुंदर विरंगुळा केंद्र उपलब्ध झाले आहे. मनपा प्रशासनाने स्पष्ट केल्यानुसार, उद्यापासूनच (२३ मे) हे नवीन नियम आणि वेळेचे नियोजन लागू केले जाईल. नागरिकांनी या सुविधेचा लाभ घ्यावा, असे आवाहन मनपा माहिती व जनसंपर्क कार्यालयाकडून करण्यात आले आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
