आरोग्य विभागात महाघोटाळा! माजी महासंचालकाला बेड्या; प्रशासकीय वर्तुळात प्रचंड खळबळ!
दिल्ली सरकारच्या आरोग्य विभागातील मोठ्या आर्थिक घोटाळ्याचा पर्दाफाश झाला असून या प्रकरणात मोठी कारवाई करण्यात आली आहे. लाचलुचपत प्रतिबंधक शाखेने आरोग्य सेवा महासंचालनालयातील कथित गैरव्यवहार प्रकरणी माजी महासंचालक डॉ. वत्सला अग्रवाल यांच्यासह तिघांना अटक केली आहे.
या कारवाईमुळे दिल्लीच्या प्रशासकीय वर्तुळात मोठी खळबळ उडाली आहे.
तपास यंत्रणेनुसार, हा संपूर्ण घोटाळा औषधे, शस्त्रक्रियेसाठी लागणारे साहित्य आणि वैद्यकीय उपकरणांच्या खरेदी प्रक्रियेशी संबंधित आहे. केंद्रीय खरेदी संस्थेमार्फत करण्यात आलेल्या मोठ्या खरेदी व्यवहारांमध्ये गंभीर आर्थिक अनियमितता झाल्याचा संशय व्यक्त केला जात आहे. या खरेदी प्रक्रियेत शेकडो कोटी रुपयांच्या सरकारी निधीचा गैरवापर झाल्याचा आरोप आहे.
चौकशीत अनेक धक्कादायक बाबी समोर आल्या आहेत. पोर्टेबल एक्स-रे मशीन, बेडशीट, चादरी, सी-आर्म उपकरणे, ऍनेस्थेशिया वर्कस्टेशन, औषधे आणि शस्त्रक्रियेचे साहित्य यांच्या खरेदीसाठी काढलेल्या निविदांमध्ये मोठ्या प्रमाणात फेरफार करण्यात आल्याचे तपासात निष्पन्न झाले आहे. काही ठराविक पुरवठादारांना फायदा व्हावा यासाठी निविदेच्या अटी जाणीवपूर्वक बदलण्यात आल्याचा आरोप आहे. त्यामुळे पात्र कंपन्या स्पर्धेबाहेर गेल्या आणि वस्तू वाढीव दराने खरेदी करण्यात आल्या. या प्रकरणात उपलेखा नियंत्रक नीरज चोप्रा यांनाही अटक करण्यात आली आहे. याआधी डॉ. विनोद कुमार रंगा यांनाही अटक झाली होती. त्यांच्या चौकशीनंतरच या प्रकरणातील आणखी धागेदोरे समोर आले आणि अटकेची कारवाई वेगाने पुढे गेली.
घोटाळा उघड झाल्यानंतर प्रशासनानेही कठोर भूमिका घेतली आहे. डॉ. वत्सला अग्रवाल यांना आधी पदावरून हटवण्यात आले आणि त्यानंतर निलंबित करण्यात आले. निष्पक्ष चौकशीसाठी हा निर्णय घेण्यात आल्याचे सांगण्यात आले आहे. याशिवाय औषध खरेदी, साठवणूक आणि व्यवस्थापन प्रक्रियेत गंभीर त्रुटी आढळल्याने पाच फार्मासिस्ट आणि दोन अधिकाऱ्यांवरही निलंबनाची कारवाई करण्यात आली आहे. या प्रकरणातील आर्थिक व्यवहार, अधिकाऱ्यांची भूमिका आणि संपूर्ण खरेदी प्रक्रिया यांचा सखोल तपास सुरू असून पुढील काही दिवसांत आणखी मोठे खुलासे होण्याची शक्यता आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
