हॉस्पिटलमधील औषध खरेदीच्या सक्तीविरोधात आरोग्य हक्क समितीची एफडीएकडे धडक मागणी; भेसळ करणाऱ्यांवर सदोष मनुष्यवधाचा गुन्हा दाखल करण्याची विनंती
सांगली: खाजगी रुग्णालयांकडून होणारी औषध खरेदीची सक्ती, हॉस्पिटल आणि मेडिकल स्टोअर्सचे बेकायदेशीर व्यावसायिक हितसंबंध, तसेच भेसळयुक्त अन्नपदार्थ व अमली पदार्थांची विक्री या गंभीर प्रकारांविरोधात 'जन आरोग्य अभियान - आरोग्य हक्क समिती, सांगली'च्या वतीने अन्न व औषध प्रशासन (FDA) सांगलीच्या सहाय्यक आयुक्तांना नुकतेच एक निवेदन देण्यात आले. जिल्ह्यातील जागरूक नागरिकांच्या स्वाक्षऱ्या असलेल्या या निवेदनाद्वारे प्रशासनाने या गैरप्रकारांवर तातडीने व कडक पावले उचलावीत, अशी मागणी करण्यात आली आहे.
या निवेदनाद्वारे समितीने खालील प्रमुख मागण्या प्रशासनासमोर मांडल्या आहेत:
औषध खरेदीच्या सक्तीला पायबंद व टोल-फ्री क्रमांक: अनेक खाजगी रुग्णालये रुग्णांना बाहेरील मेडिकलमधून औषधे आणू देत नाहीत आणि स्वतःच्याच हॉस्पिटलमधून औषधे घेण्याची सक्ती करतात. हा थेट ग्राहक हक्कांचा भंग आहे. अशी सक्ती रोखण्यासाठी विशेष मार्गदर्शक तत्वे जारी करावीत आणि रुग्णांच्या तक्रारीसाठी तात्काळ टोल-फ्री क्रमांक सुरू करावा.
हॉस्पिटल परिसरातील मेडिकलचे परवाने रद्द करा: खाजगी हॉस्पिटलच्या आवारातील मेडिकल स्टोअर्सचे हॉस्पिटलशी थेट आर्थिक हितसंबंध असतात. यामुळे औषधांची मक्तेदारी निर्माण होऊन रुग्णांची आर्थिक लूट होते. अशा व्यावसायिक हितसंबंधांची सखोल चौकशी करून त्यांचे परवाने रद्द करण्यात यावेत.
दोषी रुग्णालयांवर कडक कारवाई: जे रुग्णालय प्रशासनाचे नियम डावलून रुग्णांना ठराविक ठिकाणाहूनच औषधे व वैद्यकीय साहित्य घेण्यास भाग पाडतात, त्यांच्यावर केवळ जुजबी दंड न करता कडक कायदेशीर कारवाई व्हावी.
भेसळयुक्त व अमली पदार्थ विक्रेत्यांवर सदोष मनुष्यवधाचा गुन्हा: दुग्धजन्य पदार्थांमधील घातक भेसळ आणि अमली पदार्थांच्या अवैध विक्रीमुळे नागरिकांच्या व बालकांच्या जिवाला थेट धोका निर्माण झाला आहे. त्यामुळे अशा समाजकंटकांवर अन्न सुरक्षा कायद्यासोबतच थेट सदोष मनुष्यवधाचा गुन्हा दाखल करण्यात यावा.
मा. तुकाराम मुंढे यांच्या कारवायांचे कौतुक: आरोग्य व्यवस्थेतील गैरप्रकारांना प्रतिबंध लावून सर्वसामान्य रुग्णांचे प्राण वाचवणाऱ्या व प्रामाणिक कामगिरी करणाऱ्या मा. तुकाराम मुंढे यांच्या धडक कारवायांचे समितीने विशेष अभिनंदन करून गौरव नोंदवला आहे. अन्न व औषध प्रशासन विभाग, सांगली यांनी या सर्व मुद्द्यांची गांभीर्याने दखल घेऊन सर्वसामान्य जनतेच्या आरोग्याचे रक्षण करावे आणि दोषींवर तात्काळ कठोर कारवाई करावी, अशी मागणी निवेदनाच्या शेवटी करण्यात आली आहे.
निवेदन देताना उपस्थित पदाधिकारी: हे निवेदन देतेवेळी आरोग्य समिती अध्यक्ष शाहीन शेख यांच्यासह प्रमोद माळी, प्रदीप पाटील, रमजान खलिफा, नजीर हेरवाडे, संदीप पवार, इलियास शेख, रफीक पटेल आणि अनुज आदी पदाधिकारी व कार्यकर्ते प्रामुख्याने उपस्थित होते.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
