शिराळ्यात शरद पवार गटाला मोठा धक्का; प्रमुख पदाधिकाऱ्यांसह कार्यकर्त्यांचा 'जनसुराज्य'मध्ये जाहीर प्रवेश!

शिराळ्यात शरद पवार गटाला मोठा धक्का; प्रमुख पदाधिकाऱ्यांसह कार्यकर्त्यांचा 'जनसुराज्य'मध्ये जाहीर प्रवेश!

सांगली :- शिराळा तालुक्यातील राजकीय घडामोडींना वेग देणाऱ्या एका महत्त्वपूर्ण प्रसंगात, राष्ट्रवादी काँग्रेस (शरदचंद्र पवार) पक्षाचे अनेक पदाधिकारी, कार्यकर्ते व युवा नेत्यांनी 'जनसुराज्य शक्ती' पक्षात जाहीर प्रवेश केला. वारणानगर येथे जनसुराज्य पक्षाचे संस्थापक तथा आमदार डॉ. विनय कोरे, पक्षाचे प्रदेशाध्यक्ष समित कदम आणि जिल्हा परिषद सदस्य साईतेजस्वी सत्यजित देशमुख यांच्या प्रमुख उपस्थितीत हा पक्षप्रवेश सोहळा अत्यंत उत्साहात पार पडला.

​यावेळी माजी ग्रामपंचायत सदस्य व माजी बाजार समिती संचालक प्रताप यादव, शिराळा नगरपंचायतीचे अपक्ष नगरसेवक अभिजीत यादव, राष्ट्रवादी युवक काँग्रेस (शरद पवार गट) शिराळा शहर कार्याध्यक्ष तुषार यादव, युवा उद्योजक स्वानंद महाजन यांच्यासह विशाल लोहार, संदीप यादव, ऋषिकेश यादव, ओंकार यादव, आदित्य परदेशी, अक्षय सुतार, ऋतिक गायकवाड, शहाजी पाटील, मनोहर खिलारे आणि राजेश चौगुले यांनी जनसुराज्य पक्षाचा झेंडा हाती घेतला.

​सर्वसामान्यांच्या प्रश्नांसाठी सक्रिय राहा: आमदार डॉ. विनय कोरे

नवनिर्वाचित कार्यकर्त्यांचे स्वागत करताना आमदार डॉ. विनय कोरे म्हणाले, "जनसुराज्य पक्ष हा विकासाभिमुख आणि सर्वसामान्यांच्या प्रश्नांवर लढणारा पक्ष आहे. शिराळा तालुक्यात संघटनात्मक ताकद वाढवण्यासाठी नवनियुक्त कार्यकर्त्यांनी गावागावात पक्षाची विचारधारा पोहोचवून लोकहितासाठी सक्रिय राहावे." आगामी स्थानिक स्वराज्य संस्थांच्या निवडणुकांच्या पार्श्वभूमीवर शिराळ्यात पक्ष अधिक भक्कम करण्याचा निर्धार त्यांनी व्यक्त केला.

​युवा शक्तीमुळे पक्षाला नवी ऊर्जा: समित कदम

प्रदेशाध्यक्ष समित कदम यांनी प्रवेशकर्त्यांना पक्षात योग्य सन्मान, संधी आणि जबाबदारी देण्याची ग्वाही दिली.  शिराळ्यात संघटन विस्तारासाठी युवा शक्ती महत्त्वाची ठरेल, असा विश्वास त्यांनी व्यक्त केला. तर जिल्हा परिषद सदस्य साईतेजस्वी देशमुख यांनी, युवकांचा जनसुराज्य पक्षाकडे वाढता ओढा हा बदलाचा सकारात्मक संकेत असल्याचे सांगितले.

​या सोहळ्यास जनसुराज्यचे विविध पदाधिकारी आणि तालुक्यातील ग्रामस्थ मोठ्या संख्येने उपस्थित होते. आगामी स्थानिक निवडणुकांच्या पार्श्वभूमीवर या पक्षप्रवेशामुळे शिराळा तालुक्यातील राजकीय समीकरणांवर मोठा परिणाम होणार असल्याचे राजकीय वर्तुळात बोलले जात आहे.

➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.