सांगलीत कायद्याचा धाक संपला? भरदुपारी स्वामी समर्थ घाटावर थरार; २० वर्षांच्या तरुणाची ४ जणांकडून निर्घृण हत्या!
धक्कादायक: पोलिसांच्या नाकाखाली गुन्हेगारांचे तांडव; पोलीस अधीक्षक तुषार दोषी घटनास्थळी दाखल, शहरात प्रचंड खळबळ!
सांगली शहरात गुन्हेगारांना पोलिसांचा कसलाच धाक उरलेला नाही की काय, असा संतप्त सवाल आता नागरिक विचारू लागले आहेत. सांगलीतील प्रसिद्ध श्री स्वामी समर्थ घाट परिसरात आज भरदुपारी एका २० वर्षांच्या तरुणाची चार जणांनी मिळून अत्यंत निर्घृणपणे हत्या केली. या थरारक आणि रक्तशार करणाऱ्या घटनेमुळे संपूर्ण सांगली शहरात प्रचंड खळबळ उडाली असून नागरिकांमध्ये भीतीचे वातावरण पसरले आहे.
चैतन्य तोरणे (वय २० वर्षे, रा. स्वस्तिक वजन काट्याजवळ, नवीन वसाहत, सांगली) असे खून झालेल्या दुर्दैवी तरुणाचे नाव आहे. पूर्ववैमनस्यातून हा रक्ताचा खेळ खेळला गेल्याची प्राथमिक माहिती समोर येत आहे.
नेमकं काय घडलं?
मिळालेल्या माहितीनुसार, चैतन्य तोरणे हा दुपारी स्वामी समर्थ घाट परिसरात असताना, दबा धरून बसलेल्या चार हल्लेखोरांनी त्याच्यावर अचानक हल्ला चढवला. धारदार शस्त्रांनी चैतन्यवर सपासप वार करण्यात आले.
दिवसाढवळ्या आणि गजबजलेल्या भागात हा हल्ला इतका भीषण होता की, रक्ताच्या थारोळ्यात पडलेल्या चैतन्यचा जागीच मृत्यू झाला. हल्ला केल्यानंतर आरोपी अत्यंत निर्ढावलेल्या मानसिकतेने घटनास्थळावरून पसार झाले.
पोलीस यंत्रणा हलली; वरिष्ठ अधिकारी घटनास्थळी
या थरारक हत्याकांडानंतर सांगली पोलीस दलात प्रचंड
खळबळ उडाली. घटनेची माहिती मिळताच:
पोलीस अधीक्षक तुषार दोषी
अप्पर पोलीस अधीक्षक कल्पना बारावकर
पोलीस उपाधीक्षक संदीप भार्गव
एलसीबीचे पोलीस निरीक्षक संजीव झाडे
यांच्यासह मोठा पोलीस फौजफाटा तातडीने घटनास्थळी दाखल झाला. पोलिसांनी पंचनामा करून मृतदेह उत्तरीय तपासणीसाठी पाठवला असून, आरोपींच्या शोधासाठी विशेष पथके रवाना करण्यात आली आहेत.
सांगलीत गुन्हेगारीचे तांडव; कायदा अन् सुव्यवस्थेचा बोजवारा!
या घटनेमुळे सांगलीतील कायदा आणि सुव्यवस्थेवर पुन्हा एकदा गंभीर प्रश्नचिन्ह निर्माण झाले आहे. गुन्हेगारांमध्ये पोलिसांचा कोणताही धाक उरलेला नाही, हेच या घटनेवरून स्पष्ट होत आहे.
नागरिकांचा संतप्त सवाल:
भरदुपारी, सार्वजनिक ठिकाणी जर अशा प्रकारे टोळी युद्धातून किंवा पूर्ववैमनस्यातून तरुणांची खुलेआम हत्या होत असेल, तर सामान्य जनतेने सुरक्षेसाठी कुणाकडे पाहायचे? सांगलीत गुंडगिरी मोडून काढण्यात पोलीस प्रशासन अपयशी ठरते आहे का?
या प्रकरणातील आरोपींना पोलीस कधीपर्यंत बेड्या ठोकणार आणि सांगलीकरांना भयमुक्त वातावरण कधी मिळणार, याकडे आता संपूर्ण जिल्ह्याचे लक्ष लागले आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
