सांगली जिल्हा पोलीस दलाच्या कार्यक्षमतेत आणखी एक मानाचा तुरा रोवला गेला असून, गुन्हेगारीवर नियंत्रण मिळवण्यासाठी आणि कायदा व सुव्यवस्था अधिक मजबूत करण्यासाठी सांगली जिल्हा पोलीस दलात 'बीट पेट्रोलिंग' उपक्रमाचा धडाक्यात शुभारंभ करण्यात आला आहे. मा. विशेष पोलीस महानीरीक्षक, कोल्हापूर परिक्षेत्र, कोल्हापूर यांच्या संकल्पनेतून हा अभिनव उपक्रम राबवण्यात येत आहे. या नाविन्यपूर्ण उपक्रमाचे अधिकृत उद्घाटन सांगलीचे मा. पोलीस अधीक्षक श्री. तुषार दोशी यांच्या हस्ते नुकतेच पार पडले.
काय आहे 'बीट मार्शल' संकल्पना आणि स्वरूप?
या उपक्रमांतर्गत पोलीस ठाण्याकडील अंमलदार आणि आर.सी.पी. (R.C.P.) कडील नेमणुकीचे पोलीस अंमलदार यांची संयुक्त पथके तयार करण्यात आली आहेत. पेट्रोलिंग करणाऱ्या प्रत्येक अद्ययावत मोटारसायकलवर 'एक पोलीस ठाणे अंमलदार आणि एक आर.सी.पी. अंमलदार' अशी जोडी तैनात असेल. हे बीट मार्शल त्यांना नेमून दिलेल्या विशिष्ट बीट हद्दीत सातत्याने आणि अत्यंत सतर्कपणे गस्त घालणार आहेत.
बीट मार्शल होणार 'हायटेक'
गस्ती दरम्यान कोणतीही कसर राहू नये म्हणून हे बीट मार्शल अत्याधुनिक साधनांनी सज्ज असणार आहेत. त्यांच्याकडे खालील अद्ययावत साहित्य असेल:
अद्ययावत मोटारसायकल (पेट्रोलिंगसाठी विशेष वाहने)
वॉकी टॉकी (त्वरित संपर्कासाठी)
ई-पंचींग मोबाईल (डिजिटल हजेरी आणि अचूक गस्तीसाठी)
सायरन व फ्लॅशर दिवे (तातडीच्या प्रसंगी आणि पोलीस उपस्थिती दर्शवण्यासाठी)
'या' प्रमुख जबाबदाऱ्या पार पाडणार
हे बीट मार्शल केवळ गस्त घालणार नसून, नागरिकांच्या सुरक्षेसाठी विविध पातळ्यांवर काम करणार आहेत. यामध्ये प्रामुख्याने:
बीट हद्दीतील गुन्हेगारी प्रवृत्तींवर कडक नियंत्रण ठेवणे.
शाळा, महाविद्यालये, बाजारपेठा आणि गर्दीच्या ठिकाणांवर विशेष लक्ष ठेवणे.
बँक, ज्वेलरी शॉप्स आणि धार्मिक स्थळांना नियमित भेटी देऊन सुरक्षेची खात्री करणे.
परिसरातील कायदा व सुव्यवस्था अबाधित राखणे.
सांगली आणि मिरज उपविभागात २० जोड्या तैनात
प्रथम टप्प्यात सांगली आणि मिरज उपविभागातील प्रमुख शहरांवर लक्ष केंद्रित करण्यात आले आहे.
सांगली उपविभाग: सांगली शहर, विश्रामबाग आणि संजयनगर पोलीस ठाण्याच्या हद्दीत एकूण १० बीट मार्शल जोड्या.
मिरज उपविभाग: मिरज शहर, म. गांधी चौक आणि एम.आय.डी.सी. कुपवाड पोलीस ठाण्याच्या हद्दीत एकूण १० बीट मार्शल जोड्या.
अशा प्रकारे एकूण २० बीट मार्शल जोड्या (४० पोलीस अंमलदार) २४ तास शहराच्या सुरक्षेसाठी सज्ज राहतील.
वरिष्ठ अधिकाऱ्यांची उपस्थिती
या शानदार उद्घाटन प्रसंगी सांगलीचे पोलीस अधीक्षक श्री. तुषार दोशी यांच्यासह मा. अपर पोलीस अधीक्षक श्रीमती कल्पना बारावकर मॅडम, मा. संदीप भागवत सर (उपविभागीय पोलीस अधिकारी, सांगली विभाग), मा. मुकुंद कुलकर्णी (पोलीस उपअधीक्षक, आ.गु.शा. सांगली तथा अतिरिक्त चार्ज मिरज उपविभाग), तसेच सांगली शहर आणि मिरज उपविभागातील सर्व पोलीस ठाण्यांचे प्रभारी अधिकारी व पोलीस अंमलदार मोठ्या संख्येने उपस्थित होते.
नागरिकांची प्रतिक्रिया: पोलीस प्रशासनाच्या या 'हायटेक' आणि गतिमान उपक्रमामुळे सांगली-मिरज परिसरातील महिला, विद्यार्थी आणि व्यापाऱ्यांमध्ये सुरक्षेचे वातावरण अधिक घट्ट होण्यास मदत होणार असून, नागरिकांनी या निर्णयाचे स्वागत केले आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
