सांगली दर्पण Exclusive! युवाशक्तीचा भडका, पण 'भावी' नेतृत्वाची थंड : विद्यार्थी रस्त्यावर उतरले; मग रोहित, आदित्य, अमित देशमुखांसह बडे नेते फक्त सोशल मीडियावरच राहणार का?
महाराष्ट्र सध्या एका अभूतपूर्व शैक्षणिक आणि प्रशासकीय असंतोषाच्या वणव्यात होरपळत आहे. दिल्लीपासून ते राज्यातील नागपूर, पुणे आणि कोल्हापूरपर्यंत स्पर्धा परीक्षा देणारे, फी वाढीचा सामना करणारे आणि नोकरभरतीच्या गोंधळाने त्रस्त झालेले हजारो विद्यार्थी भर उन्हात आणि पावसात रस्त्यावर उतरून आपल्या हक्कासाठी घोषणाबाजी करत आहेत. लाठीमार सहन करत आहेत, रात्र-रात्र रस्त्यावर ठाण मांडून बसले आहेत. मात्र, या सर्व गदारोळात एक प्रश्न संपूर्ण महाराष्ट्राला आणि विशेषतः तरुण पिढीला विचार करायला लावत आहे —
"जनतेचा आणि तरुणांचा हा एल्गार सुरू असताना राज्यातील विरोधी पक्षांचे तरुण चेहरे नेमके कुठे आहेत?" इतिहासाची पाने उलटली तर स्पष्ट दिसते की, जगात आणि देशात कोणताही मोठा सामाजिक किंवा राजकीय बदल (परिवर्तन) नेहमी तरुणाईच्या क्रांतीतूनच झाला आहे. मग ती जयप्रकाश नारायण यांची आंदोलन असो किंवा अलिकडच्या काळातील तरुण लढ्ये. पण आज महाराष्ट्रात चित्र काही वेगळेच पाहायला मिळत आहे.
रस्त्यावरच्या आंदोलनात कोणाची गैरहजेरी खटकतेय?
रोहित पवार (राष्ट्रवादी - शरदचंद्र पवार): अभ्यासू आमदार म्हणून प्रतिमा असलेले रोहित पवार सोशल मीडियावर दररोज ट्विट आणि व्हिडिओच्या माध्यमातून सरकारवर हल्लाबोल करतात, पण विद्यार्थी रस्त्यावर लाठ्या खात असताना ते प्रत्यक्ष तिथे ठिय्या मांडताना का दिसत नाहीत?
आदित्य ठाकरे (शिवसेना - उद्धव बाळासाहेब ठाकरे): तरुण वर्गात लोकप्रिय असलेले आदित्य ठाकरे पत्रकार परिषदा घेऊन खोके सरकारवर टीका करतात. परंतु, पुण्यात किंवा नागपुरात हजारो विद्यार्थी जमले असताना त्यांनी तिथे जाऊन स्वतःच्या उपस्थितीने आंदोलनाला ताकद का दिली नाही?सतेज (बंटी) पाटील व विशाल पाटील (काँग्रेस): कोल्हापूर-सांगलीचे हे बडे नेते पश्चिम महाराष्ट्रातील विद्यार्थ्यांच्या तीव्र आंदोलनात पूर्ण ताकदीने रस्त्यावर उतरण्याऐवजी केवळ निवेदने आणि वक्तव्यांपुरतेच मर्यादित राहिल्याची भावना तरुण व्यक्त करत आहेत.अमित देशमुख व प्रणिती शिंदे (काँग्रेस): लातूरचे अमित देशमुख असोत की सोलापूर-मध्य महाराष्ट्रात प्रभाव असलेल्या खासदार प्रणिती शिंदे; तरुणांचे प्रश्न ऐरणीवर आले असताना या वारसदार आणि आक्रमक नेत्यांची रस्त्यावरील उपस्थिती नगण्य का?अमित ठाकरे (महाराष्ट्र नवनिर्माण सेना): मनसे विद्यार्थी सेनेचे प्रमुख असूनही अमित ठाकरे विद्यार्थी आंदोलनांच्या केंद्रस्थानी प्रत्यक्ष रस्त्यावर उतरून लढा उभारताना का दिसले नाहीत?
रोहित पाटील (राष्ट्रवादी - शरदचंद्र पवार): कवठे महांकाळचे तरुण आमदार रोहित पाटील यांच्याकडून तरुण पिढीला मोठ्या अपेक्षा आहेत, पण पक्षाच्या चौकटीबाहेर पडून विद्यार्थ्यांच्या खांद्याला खांदा लावून लढण्यात तेही मागे पडल्याचे दिसते.
डिजिटल विरोध विरुद्ध प्रत्यक्ष लढा!
आजचा तरुण विचारतोय — विरोध म्हणजे काय? फक्त एसी रूममध्ये बसून ५०० शब्दांचे ट्विट करणे? की टीव्ही कॅमेऱ्यांसमोर येऊन ५ मिनिटांची आक्रमक बाईट देणे?
नागपूर आणि पुण्याच्या रस्त्यावर जेव्हा हजारो मुले-मुली आपल्या भविष्यासाठी ढाल-तलवारीशिवाय पोलिसांशी दोन हात करत होते, तेव्हा या सगळ्या 'भावी' आणि 'आशादायक' नेत्यांनी केवळ डिजिटल सहानुभूती दाखवली. विरोधी पक्षाची ही थंड भूमिका सत्ताधाऱ्यांना अधिक धाडसी बनवत आहे.परिवर्तन तरुणाईच करते; नेत्यांनी भान ठेवावे!इतिहासाचा एकच नियम आहे — जेव्हा तरुण रस्ता व्यापतो, तेव्हा तख्त आणि ताज हादरतात. विरोधी नेत्यांनी हे विसरता कामा नये की, आजचा तरुण केवळ त्यांचा व्होट बँक नाही. तो प्रश्नांची उत्तरे मागणारा एक जागरूक नागरिक आहे.जर जनतेच्या आणि विद्यार्थ्यांच्या या थेट लढ्यात विरोधी पक्षातील ही तरुण फळी रस्त्यावर उतरून नेतृत्वाची धुरा सांभाळणार नसेल, तर उद्याच्या परिवर्तनाच्या लाटेत तरुण पिढी स्वतःचे नेतृत्व स्वतःच उभे करेल आणि या 'ड्रॉईंग रूम' नेत्यांना पूर्णपणे नाकारेल, हाच स्पष्ट इशारा या आंदोलनातून मिळताना दिसत आहे.
वेळ अजूनही गेलेली नाही — 'सोशल मीडिया' सोडून 'सोशल ग्राऊंड'वर कधी उतरणार, याचे उत्तर रोहित, आदित्य, अमित आणि सर्वच तरुणांच्या नेत्यांना द्यावेच लागेल!
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
