"NEET आंदोलनानंतर घाबरलेल्या कंगना राणौतची दिल्ली पोलिसांवर स्तुतीसुमने; म्हणाली, 'त्यांनी ढाल बनून रक्षण केले!'"
दिल्ली: दिल्लीच्या जंतर-मंतरवर NEET पेपरफुटी घोटाळ्याविरोधात पेटलेला विद्यार्थ्यांचा व आंदोलकांचा वणवा काल थेट संसदेच्या उंबरठ्यापर्यंत पोहोचला. केंद्रीय शिक्षणमंत्र्यांच्या राजीनाम्याची मागणी करत आंदोलकांनी संसदेच्या दिशेने कूच केल्यानंतर राजधानीत प्रचंड गदारोळ उडाला होता. संसदेबाहेर आंदोलकांचा प्रचंड जमाव आणि निर्माण झालेली तणावपूर्ण परिस्थिती पाहून संसदेच्या आत बसलेल्या खासदारांची भीतीमुळे गाळण उडाली होती. या संपूर्ण थरारावर आता बॉलीवूडची क्वीन आणि भाजप खासदार कंगना राणौत हिने अत्यंत धक्कादायक प्रतिक्रिया दिली आहे. "आम्ही सगळे खासदार आतमध्ये खूपच घाबरलो होतो, जमाव आत घुसून आपल्यावर हल्ला करेल की काय अशीच धडधड प्रत्येकाच्या मनात होती," असा खुलासा कंगनाने केला आहे.
एनडीएच्या बैठकीनंतर कंगनाचा खुलासा
पंतप्रधान नरेंद्र मोदी यांच्या उपस्थितीत पार पडलेल्या एनडीएच्या बैठकीतून बाहेर पडल्यानंतर कंगनाने संसदेच्या आवारात पत्रकारांशी संवाद साधला. CJP आणि विद्यार्थ्यांच्या आंदोलनादरम्यान संसदेत निर्माण झालेल्या वातावरणावर बोलताना तिने दिल्ली पोलिसांचे तोंडभरून कौतुक केले. कंगना म्हणाली, "आम्ही सगळे खासदार संसदेच्या आत उपस्थित असताना बाहेरील परिस्थिती खूपच बिकट झाली होती. तो आक्रमक जमाव कधीही आत घुसून आपल्यावर हल्ला करू शकतो, अशी भीती सर्वांनाच वाटत होती. पण अशा अत्यंत नाजूक प्रसंगी दिल्ली पोलिसांनी ज्या प्रकारे कामगिरी केली, ते कौतुकास्पद आहे."
आपला अनुभव सांगताना कंगना पुढे म्हणाली, "दिल्ली पोलिसांचे जवान कोणत्याही धोक्याची पर्वा न करता आमच्या सुरक्षेसाठी एखाद्या भक्कम ढालीसारखे उभे ठाकले. त्यांनी कोणालाही साधा ओरखडाही येऊ दिला नाही आणि सर्व खासदारांचे रक्षण केले. कोणताही मोठा अनुचित प्रकार न घडू देता परिस्थिती अत्यंत कौशल्याने नियंत्रणात ठेवल्याबद्दल मी दिल्ली पोलिसांचे मनापासून आभार मानत आहे."एनडीएच्या बैठकीत झालेल्या महत्त्वाच्या चर्चेबद्दलही कंगनाने माहिती दिली. पंतप्रधान नरेंद्र मोदी यांनी या बैठकीत सर्व खासदारांना देशातील तरुणांच्या भवितव्याबाबत आणि त्यांच्या आकांक्षा पूर्ण करण्याबाबत मोलाचे मार्गदर्शन केले. विशेषतः देशभरात गाजत असलेल्या NEET परीक्षा आणि पेपरफुटीच्या संवेदनशील मुद्द्यावर केंद्र सरकारची आगामी रणनीती काय असणार आहे, यावर पंतप्रधानांनी सर्वांशी सविस्तर चर्चा केल्याचे कंगनाने स्पष्ट केले.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
