तासगाव अपहरण प्रकरण: नवजात बालकाला पिशवीत भरून पळवणाऱ्या भोंदू परिचारिकेला ७ वर्षे सश्रम कारावास; सांगली न्यायालयाचा दणका
तासगाव :-तासगाव येथील सरस्वती आनंद हॉस्पिटलमधून अवघ्या काही तासांच्या नवजात बालकाचे अपहरण करणाऱ्या स्वाती छबुराव माने उर्फ लक्ष्मी मच्छींद्र पवार (वय २८, रा. रामानंदनगर, किर्लोस्करवाडी) या आरोपी परिचारिकेला सांगलीच्या जिल्हा व सत्र न्यायालयाने दोषी ठरवले आहे. अपहरण आणि बालकाचा जीव धोक्यात घातल्याप्रकरणी तिला ७ वर्षे सश्रम कारावास व दंडाची कठोर शिक्षा सुनावण्यात आली. जिल्हा व सत्र न्यायाधीश क्र. १ व्ही. डी. निंबाळकर यांनी हा महत्त्वपूर्ण निकाल दिला.
घटनेचा थरार आणि न्यायालयाचा निकाल
शिक्षेचा तपशील: मुख्य अपहरणाच्या गुन्ह्यासाठी ७ वर्षे सश्रम कारावास व ३,००० रुपये दंड (दंड न भरल्यास २ महिने साधी कैद). तसेच जुवेनाइल जस्टिस ॲक्टनुसार अतिरिक्त ३ वर्षे सश्रम कारावासाची शिक्षा.
अपहरणाचा बनाव: २२ जुलै २०२२ रोजी दाखल झालेल्या प्रसुती महिलेच्या अवघ्या काही तासांच्या बाळाला 'डॉक्टरांकडे घेऊन जाते' असा बनाव रचून आरोपी परिचारिकेने पिशवीत भरून पळवून नेले होते.
सीटीव्ही आणि रिक्षाचालकाची सतर्कता: तासगाव पोलिसांनी तातडीने तपास चक्र फिरवत मेडिकलचे सीसीटीव्ही फुटेज तपासले. अप्पे रिक्षाचालकाने पिशवीतून बाळाच्या रडण्याचा आवाज आल्याची माहिती देताच पोलिसांनी आरोपीच्या घरावर छापा टाकून बाळाला सुखरूप ताब्यात घेतले.
डीएनए चाचणी अन् निर्णायक पुरावे: बाळाच्या पायावरील हॉस्पिटल टॅग आणि कोल्हापूर न्यायवैद्यकीय प्रयोगशाळेचा (FSL) डीएनए (DNA) रिपोर्ट या प्रकरणातील मुख्य पुरावा ठरला.
१७ साक्षीदारांची साक्ष: अतिरिक्त सरकारी अभियोक्ता माधव कुलकर्णी व आरती देशपांडे यांनी न्यायालयात मजबूत बाजू मांडली. बाळाची आई, आजी, डॉ. अंजली पाटील आणि रिक्षाचालक यांची साक्ष या प्रकरणात निर्णायक ठरली.
तपास अंमलदार एस. एन. गुरुव यांच्यासह तासगाव पोलीस ठाण्याच्या पथकाने केलेल्या जलद व अचूक तपासामुळे आरोपी परिचारिकेला तिचे पाप महागात पडले आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
