विटा पोलिसांची आंतरराष्ट्रीय ड्रग्ज रॅकेटवर धडक कारवाई: ४२ लाख ८२ हजारांचा ९६५ ग्रॅम 'एमडी' ड्रग्जसह अल्टो कार जप्त; केरळ-मुंबई कनेक्शन उघड!
विटा / सांगली :- महाराष्ट्रातील 'नशामुक्त अभियान' आणि सांगली जिल्हा पोलिसांच्या अमली पदार्थविरोधी धडक मोहिमेला मोठे यश मिळाले आहे. सांगली स्थानिक गुन्हे अन्वेषण शाखा (LCB) आणि विटा पोलिसांनी संयुक्त कारवाई करत विटा-तासगाव रस्त्यावरील श्री. मंगल कार्यालयासमोर सापळा रचून ४२ लाख ८२ हजार रुपये किमतीचा ९६५ ग्रॅम मेफॅड्रॉन (M.D.) हा घातक अमली पदार्थ जप्त केला आहे. या कारवाईत एका मुख्य आरोपीला अटक करण्यात आली असून आंतरराष्ट्रीय ड्रग्ज तस्करीचे एक मोठे रॅकेट उघडकीस आले आहे.
कारवाईचा सविस्तर तपशील:
घटना स्थळ व वेळ: दि. १४ सप्टेंबर २०२६ रोजी रात्री २२.३५ वाजण्याच्या सुमारास, श्री. मंगल कार्यालयासमोर, विटा-तासगाव रोड, विटा, ता. खानापूर.गुन्हा नोंद: गु.र.नं. ४५०/२०२६ (एनडीपीएस अॅक्ट कलम ८(क), २१(क), २९).फिर्यादी: पोलीस हवालदार सूर्यकांत यशवंत साळुंखे (स्थानिक गुन्हे अन्वेषण शाखा, सांगली).जप्त केलेला मुद्देमाल (एकूण किंमत: ₹ ४२,८२,०००/-):मेफॅड्रॉन (एम.डी.): ₹ ३८,६०,०००/- किमतीचा ९६५ ग्रॅम फिकट पिवळसर रंगाचा अमली पदार्थ (दर ₹ ४,०००/- प्रति ग्रॅम).वाहने व इतर: ₹ ४,००,०००/- किमतीची मारुती सुझुकी अल्टो K10 CNG कार (क्र. MH 10 EE 6054).मोबाईल फोन: एक 'रियलमी' (₹ ७,०००/-) आणि एक 'वनप्लस' (₹ १५,०००/-) कंपनीचा मोबाईल.इतर साहित्य: अमली पदार्थांच्या वाहतुकीसाठी वापरल्या जाणाऱ्या पांढऱ्या-लाल रंगाच्या रिकाम्या कॅप्सूलची पिशवी.
निष्पन्न झालेले आरोपी:
दत्तात्रय अंकुश पाखरे (वय ३२, रा. हिवरे, ता. खानापूर, जि. सांगली) – ताब्यात/अटक.
अब्दुल निझार मोईद्दीन कुणी ऊर्फ आदिलखान (रा. कासारगोड, राज्य केरळ) – तस्करीचा सूत्रधार.
मोहम्मद शेमीर ऊर्फ समीर (रा. कासारगोड, राज्य केरळ) – मुंबईत ड्रग्ज पुरवणारा हस्तक.
अशी झाली थरारक कारवाई व रॅकेटचा पर्दाफाश:
सांगली एलसीबीचे पोलीस हवालदार सूर्यकांत साळुंखे यांना मिळालेल्या गोपनीय बातमीच्या आधारे सपोनि राजेंद्र यादव व पोउपनि महादेव पोवार यांच्या पथकाने विटा येथील श्री. मंगल कार्यालयासमोर सापळा रचला. संशयास्पद अल्टो कार (MH 10 EE 6054) येताच पोलिसांनी चालकास पळून जाण्याची संधी न देता जागीच ताब्यात घेतले. चालकाचे नाव दत्तात्रय पाखरे असल्याचे निष्पन्न झाले.कारची पंचांसमक्ष झडती घेतली असता ड्रायव्हर सीटखाली ९६५ ग्रॅम एमडी ड्रग्ज आणि डिगीमधील CNG टाकीखाली रिकाम्या कॅप्सूलची पिशवी मिळून आली. फॉरेन्सिक टीमकडून तपासणी केल्यानंतर सदर पदार्थ 'मेफॅड्रॉन' असल्याचे स्पष्ट झाले.
कतारची फ्लाईट अन् आंतरराष्ट्रीय तस्करीचा कट:
पोलीस तपासात आरोपी दत्तात्रय पाखरे याने अत्यंत धक्कादायक माहिती दिली:
तो मुंबई आंतरराष्ट्रीय विमानतळावरून केरळमधील आदिलखान याच्या सांगण्यावरून परदेशात बॅगची ने-आण करण्याचे काम करत होता.
ऑगस्ट २०२६ मध्ये त्याला कतार (दोहा) येथे जाण्याचे तिकीट देण्यात आले होते. मुंबई विमानतळावर 'समीर' नावाच्या इसमाने त्याला कॅप्सूल भरलेली बॅग दिली.
मात्र, पाखरे ती बॅग कतारला न नेता मोबाईल बंद करून आपल्या हिवरे (जि. सांगली) या गावी निघून आला.
गावी आल्यावर बॅगेतील कॅप्सूल फोडून त्यातील मेफॅड्रॉन (MD) पावडर एकत्र केली आणि ती विकण्यासाठी तो अल्टो कारने विटा येथे आला असता पोलिसांच्या जाळ्यात अडकला.
'बैकवर्ड-फॉरवर्ड लिंकेजेस'चा तपास सुरू:
सदर गुन्ह्याचा पुढील तपास एलसीबीचे पोलीस निरीक्षक संजीव झाडे करत आहेत. हे प्रकरण थेट आंतरराष्ट्रीय ड्रग्ज तस्करांशी आणि कॅप्सूलद्वारे होणाऱ्या तस्करीशी जोडलेले असल्याने या गुन्ह्यात 'Backwards and Forwards Linkages' शोधण्याचे काम युद्धपातळीवर सुरू आहे. यामध्ये आणखी काही आंतरराष्ट्रीय आरोपी निष्पन्न होण्याची दाट शक्यता आहे.
मार्गदर्शक व कारवाई करणारे अधिकारी व अंमलदार:
विशेष पोलीस महानिरीक्षक (कोल्हापूर परिक्षेत्र) मा. श्री. रंजन कुमार शर्मा, सांगलीचे पोलीस अधीक्षक मा. श्री. तुषार दोशी, व अप्पर पोलीस अधीक्षक मा. श्रीमती कल्पना बारवकर यांच्या मार्गदर्शनाखाली:
अधिकारी: पोलीस निरीक्षक संजीव झाडे (LCB), पोलीस निरीक्षक सुरेश साळुंखे (प्रभारी विटा पो. ठाणे), सपोनि राजेंद्र यादव, सपोनि रुपाली बोबडे (सायबर), पोउपनि महादेव पोवार, पोउपनि संग्राम पाटील.
अंमलदार: सपोफौ संजय पाटील, पोहेकॉ सूर्यकांत साळुंखे, संदीप पाटील, अतुल माने, हणमंत लोहार, सुशील मस्के, सतीश अलदर, पोकों सुनील जाधव, अभिजित ठाणेकर, ऋतुराज होळकर, सुमित सूर्यवंशी, अजय पाटील, कॅप्टन गुंडवाडे व इतर.
सांगली पोलिसांचे नागरिकांना आवाहन:
"शासनाने बंदी घातलेला आणि मानवी जीवनावर घातक परिणाम करणारा कोणताही अमली पदार्थ (ड्रग्ज) विकणारा, तस्करी करणारा वा साठा करणारा आढळल्यास नागरिकांनी तात्काळ पोलीस अधीक्षक कार्यालय, एलसीबी किंवा स्थानिक पोलीस ठाण्याशी संपर्क साधावा. माहिती देणाऱ्याचे नाव संपूर्णपणे गोपनीय ठेवले जाईल."
— मा. तुषार दोशी (पोलीस अधीक्षक, सांगली)
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
