सांगली दर्पण Exclusive! आक्रमक लढा! पुणे पदवीधर विधानपरिषद मतदारसंघ: दोन 'जाधव' महिला उमेदवारांमधील चुरशीची लढत आणि राजकीय समिकरणे
पुणे पदवीधर विधानपरिषद मतदारसंघाची निवडणूक सध्या राजकीय वर्तुळाचे लक्ष वेधून घेत आहे. या निवडणुकीत दोन 'जाधव' कुटुंबातील महिला उमेदवारांमध्ये अत्यंत चुरशीची आणि अटळ लढत पाहायला मिळत आहे. महाविकास आघाडीकडून हर्षदा देशमुख (जाधव) (माजी सनदी अधिकारी आणि माजी आमदार प्रभाकर देशमुख यांची कन्या) तर महायुतीकडून स्मिता योगेश जाधव (पद्मश्री डॉ. डी. वाय. पाटील यांची नात आणि कोल्हापूरच्या 'पुढारी' वृत्तपत्राचे सर्वेसर्वा डॉ. प्रतापसिंह जाधव यांच्या सूनबाई) आमनेसामने आहेत. हा सामना वरवर पाहता दोन महिला उमेदवारांमधला वाटत असला, तरी प्रत्यक्षात हा भारतीय जनता पक्ष विरुद्ध राष्ट्रवादी काँग्रेस (शरदचंद्र पवार पक्ष) आणि काँग्रेस यांच्यातील थेट राजकीय संघर्ष आहे.
ऐनवेळचे बदल आणि पक्षांतर्गत राजकीय नाराजीचे सावट
या निवडणुकीत दोन्ही बाजूंनी ऐनवेळी झालेल्या उमेदवारी बदलांमुळे राजकीय समिकरणे पूर्णपणे बदलली आहेत:
महायुतीमधील उलथापालथ: भाजपने वर्षभरापूर्वीच कुंडलच्या क्रांतिकारक कारखान्याचे चेअरमन शरद लाड यांच्या नावाची घोषणा केली होती. यासाठी शरद लाड यांनी आपली वैचारिक भूमिका बाजूला ठेवून भाजपमध्ये प्रवेश केला होता आणि वर्षभर जोरदार प्रचारही केला होता. मात्र, ऐनवेळी स्मिता जाधव यांच्या नावावर शिक्कामोर्तब झाल्याने त्यांना उमेदवारी मागे घ्यावी लागली. त्यांनी मोठे मन करत पाठिंबा दिला असला, तरी हा रोष शेवटच्या क्षणापर्यंत टिकणार का, हा मोठा संशोधनाचा विषय ठरला आहे.
महाविकास आघाडीमधील गटबाजी: राष्ट्रवादी (शरद पवार पक्ष) कडून मंत्री हसन मुश्रीफ यांनी आपले निकटवर्ती कार्यकर्ते भैया माने यांच्यासाठी जोरदार प्रयत्न केला होता. मात्र, पक्षाने प्रभाकर देशमुख यांच्या कन्या हर्षदा देशमुख यांना उमेदवारी दिली. यामुळे स्थानिक पातळीवर काहीसा रोष निर्माण झाला होता, परंतु शेवटी पक्षांतर्गत जुळवाजुळव करत सर्वांनी माघार घेत महाविकास आघाडीच्या अधिकृत उमेदवाराला पाठिंबा दिला आहे.
प्रचाराची गती आणि आक्रमक मोर्चेबांधणी
महाविकास आघाडीची धडाकेबाज मोर्चेबांधणी:महाविकास आघाडीच्या उमेदवार हर्षदा जाधव यांनी प्रचारात मोठी आघाडी घेतली आहे. सांगली आणि सातारा जिल्ह्यात त्यांनी बैठका व सभांच्या माध्यमातून मतदारांपर्यंत पोहोचण्याचा सपाटा लावला आहे. विशेष म्हणजे, राष्ट्रवादीचे नेते आमदार जयंत पाटील, प्रदेशाध्यक्ष शशिकांत शिंदे, काँग्रेसचे आमदार डॉ. विश्वजीत कदम, आमदार सतेज पाटील, खासदार विशाल पाटील आणि शिवसेना (उद्धव बाळासाहेब ठाकरे) पक्षाचे अनेक प्रमुख पदाधिकारी प्रत्यक्ष मैदानात उतरून प्रचार करत आहेत.महायुतीच्या प्रचारात समन्वय आणि नेत्यांची अनुपस्थिती:दुसरीकडे, महायुतीच्या उमेदवार स्मिता जाधव यांच्या प्रचाराची पहिली फेरी सांगली जिल्ह्यात म्हणावी तशी प्रभावी ठरलेली नाही. महायुतीच्या प्रचाराची संपूर्ण मदार सांगलीचे पालकमंत्री चंद्रकांत दादा पाटील यांच्यावर आहे. मात्र, राजकारणात मुरलेले आणि चाणक्य मानले जाणारे चंद्रकांत दादा पाटील यांची या महत्त्वाच्या निवडणुकीतील अनुपस्थिती सध्या प्रकर्षाने जाणवत आहे. तसेच, भाजपच्या स्थानिक नेत्यांमध्येही हवासा उत्साह दिसून येत नसल्याची चर्चा राजकीय वर्तुळात आहे.
कोणाची बाजी ठरणार भारी?
दोन्ही उमेदवार उच्चशिक्षित, कर्तबगार आणि प्रचाराच्या प्रत्येक मुद्यावर एकास एक वरचढ असल्याचे स्पष्ट होत आहे. मात्र, महाविकास आघाडीची घट्ट झालेली मोट, दिग्गज नेत्यांचे सक्रीय सहभाग आणि दुसरीकडे महायुतीमधील काही नेत्यांची नाराजी व सुस्त प्रचार यंत्रणा यामुळे हा सामना अत्यंत रंजक बनला आहे. सुशिक्षित आणि पदवीधर मतदार नेमका कोणाच्या पारड्यात आपले मत टाकतात आणि या हायव्होल्टेज निवडणुकीत कोण बाजी मारणार, याची उत्सुकता आता संपूर्ण महाराष्ट्राला लागली आहे.
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
